ရုရှားတွေ နွေဦးကို မမြင်ရသေးဘူး နဲ့ အပိုင်းအစများ

ရုရှားတွေ နွေဦးကို မမြင်ရသေးဘူး နဲ့ အပိုင်းအစများ

မောင်ရစ်  (မိုးမခ) မတ် ၁၆၊ ၂၀၂၄

မြန်မာပြည်သူတွေက နွေဦးကိုပဲ အထူးအာရုံပြုကြတယ်။ စစ်ကောင်စီ၏ အဓမ္မစစ်မှုထမ်းဆင့်ခေါ်တဲ့ မတရားတဲ့အမိန့်ဟာ မိဘပြည်သူတွေကို ကြိမ်မီးအုံးသလို အပူတွေ ဆင့်စေပါတယ်။ တော်လှန်ရေးကနေ စစ်အာဏာရှင်တွေကို အပြီးတိုင် နိုင်ငံရေးစင်မြင့်ကနေ ဖယ်ရှားရေးဟာ အရှိန်တွေ တဆင့်ပြီး တဆင့် မြှင့်တင်ရမယ့် အခြေအနေဆိုတာ ထင်ရှားလာပါတယ်။

အဲသည်အအချိန်မှာ ရုရှားစစ်အာဏာရှင် ပူတင်က သူ့၏ အတိုက်အခံခေါင်းဆောင် အလက်စီကို ထောင်ထဲမှာ အဆိပ်ခတ် သတ်ပစ်လိုက်ပါတယ် (ဟု စွပ်စွဲခံရ)။ ပြီးတော့ အခု ရွေးကောက်ပွဲ ကျင်းပတယ်။ သူပဲ ဆက်ပြီး တိုင်းပြည်ကို ဦးဆောင်ဖို့ အနိုင်ရမှာ သေချာပါတယ်။ ရုရှားပြည်သူတွေက မြန်မာပြည်သူတွေလို နွေဦးကို မမြင်နိုင်ကြသေးဘူး။ မြန်မာတွေကတော့ သူတို့နွေဦးကို သူတို့ဘာသာသူတို့ ဆောင်ကြဉ်းဖို့ ဆုံးဖြတ်လိုက်ကြပါတယ်။ ရုရှားပြည်သူတွေက လက်နက်ကိုင်တော်လှန်ကြဖို့လည်း အဆင်သင့် မဖြစ်ကြသေးဘူးလို့ ဆိုကြတယ်။ အနောက်တိုင်းသတင်းစာတွေကတော့ ရုရှားပြည်သူတွေဟာ သူတို့သမိုင်းဖြတ်သန်းမှု အတွေ့အကြုံအရ အာဏာရှင်ကို တော်လှန်ဖို့ထက် အာဏာရှင်အောက်မှာပဲ အသက်ရှင် နေထိုင်ဖို့ကိုပဲ ရွေးချယ်ခဲ့ကြတယ်လို့ ကောက်ချက်ဆွဲကြပါတယ်။ 

ဒါကြောင့် ရုရှားအာဏာရှင်က ယူကရိန်းကို ကျူးကျော်စစ် ဆင်နွှဲတဲ့အခါ ရုရှားပြည်သူတွေက ခေါင်းငုံ့ မျက်နှာလွှဲနေကြပြီး ယူကရိန်းသမ္မတကိုယ်တိုင်က ပြည်သူနဲ့အတူ လက်တွဲပြီး ခုခံတွန်းလှန် တိုက်ပွဲဝင်ကြတဲ့အခါ သူတို့ဘ၀မှာ သူတို့သမိုင်းမှာ မကြုံစဖူးတဲ့ သမိုင်းအလှည့်အပြောင်းဖြစ်သလို ခံစားကြတယ်။ အုတ်နံရံကြီးကို မိုက်ရူးရဲဆန်စွာ ခေါင်းနဲ့ တိုက်နေတယ်လို့ တွေးကြတယ်။ 

ယူကရိန်းပြည်သူတွေက ရုရှားကျုးကျော်စစ် ရုရှားအာဏာရှင်တွေကို တော်လှန်တိုက်ခိုက်ဖို့ ရွေးချယ်ခဲ့ကြတယ်။ မြန်မာပြည်သူတွေကလည်း မြန်မာစစ်အာဏာရှင်ကို တိုက်ခိုက်တွန်းလှန် ဖယ်ရှားဖို့ ဆုံးဖြတ်ရွေးချယ်ခဲ့ကြတယ်။ ခေါက်ရိုးကျိုးနေတဲ့ ချိုးဖဲ့ နှိမ်နင်းခံထားရတဲ့ ဘယ်နိုင်ငံသားကမှ သည်လိုမျိုး ကြီးကျယ်ခမ်းနားတဲ့ ရွေးချယ်မှုမျိုးကို လုပ်ရဲမှာ မဟုတ်ဘူး။ ယူကရိန်းတွေကလည်း မြန်မာတွေကို ကြည့်ပြီး ဂုဏ်ယူ အားကျနေကြမှာ သေချာပါတယ်။

အမေရိကန်မှာလည်း သည်လိုစိန်ခေါ်မှုတွေ ရင်ဆိုင်နေရာတာပဲလို့ ဆိုနိုင်ပါတယ်။ ပြင်ပက အနှောင့်အယှက်တွေ ပယောဂတွေရယ် ပြည်တွင်းက အစွန်းရောက်မှုတွေရယ်ကြောင့် အမေရိကန်ပြည်သူတွေအချင်းချင်းဟာ မကြုံစဖူး စိတ်ဝမ်းတွေ ကွဲ၊ သံသယတွေ ကြီးထွားပြီး အချင်းချင်း ရန်သူသဖွယ် ရူမြင် ရန်စောင်နေကြ ရန်လိုနေကြတယ်။ သမ္မတကြီး အိုဘားမားဟာ ၂၀၀၈ မှာ သမတအဖြစ် ပထမဆုံးအရွေးခံရတော့ တိုင်းပြည်ဟာ ပေါင်းစည်းညီညွတ်မှု သင့်မြတ်မှုတွေဆီ သွားတော့မယ်လို့ အထင်ရောက်ခဲ့ကြတယ်။ ဒါဟာ အလွဲကြီး လွဲခဲ့တာပဲ။ အမေရိကန်ပြည်သူတွေကြားထဲကို လက်ယာ ရှေးရိုးစွဲအစွန်းရောက်တွေက သပ်လျှိုသွေးခွဲမှုတွေနဲ့ တိုင်းပြည်စည်းလုံးညီညွတ်မှုကို ဖြိုခွဲဖို့ ဖြစ်လာတယ်။ သမ္မတ ထရန့် ၂၀၁၆ မှာ မင်းဖြစ်တော့ အဲသည်အကြောင်းက ထင်ရှားလာတယ်။ ကိုဗစ်ဗိုင်းရပ်စ်ပိုးကိုတောင် တစုတစည်းတည်း မတွန်းလှန် မကာကွယ်နိုင်ကြတော့ လူ ၁ ဒသမ ၂ သန်း ပျက်စီးခဲ့ရတယ်။ ခုချိန်ထိ ကိုဗစ်ကို သေစေနိုင်တဲ့ ရောဂါဆိုတာကို လက်မခံနိုင်တဲ့ ကြပ်မပြည့်တဲ့သူတွေ ရှေ့တန်းရောက်နေတာကနေ၊ ၂၀၂၀ ရွေးကောက်ပွဲရလဒ်ကိုပါ လက်မခံနိုင်တဲ့ အစွန်းရောက်တွေပါ လွှတ်တော်တက် မီးတိုက်ဖို့ ကြံစည်တဲ့အထိ ဖြစ်လာတာ ဆိုတော့ သည်တိုင်းပြည်လည်း ချောက်ထဲ ကျမတတ် ဖြစ်နေတာ အမှန်ပါပဲ။

သို့သော် ဒီမိုကရေစီနဲ့ ဖယ်ဒရယ်စနစ်အတွက် သမိုင်းမှာ မှတ်ကျောက်အတင်နိုင်ဆုံး တိုင်းပြည်ဆိုလို့ အမေရိကန်ပဲ ရှိတာ မို့ သူတို့တွေကတော့ သည်လို မိုးထဲ ရေထဲကနေ ပြန်ပြီး ရုန်းထကြ၊ သင်ခန်းစာယူကြမယ်လို့ ယုံကြည်ပါတယ်။ ခုနင်ကလို အစွန်းရောက်ရူးသွပ်နေသူတွေအပြင် ကိုယ်ယုံကြည်တာနဲ့ အများအကျိုး အမှန်တရား လွတ်လပ်ခွင့်ဆိုတာအတွက် အစွမ်းကုန် ရုန်းကန်ကာကွယ်ကြဖို့ နိုင်ငံသားတွေ မွေးဖွားထားတဲ့ နိုင်ငံကြီးတခု ဖြစ်သလို တပြည်တရွာ နိုင်ငံတကာကနေ သည်အမေရိကန်ပြည်ကို ပြောင်းရွှေ့အခြေစိုက်လာတဲ့ လူတန်းစားပေါင်းစုံ စိတ်ဓာတ်ပေါင်းစုံ ရည်မှန်းချက်ပေါင်းစုံနဲ့ နိုင်ငံတကာလူသားတွေ အများကြီး ရောက်ရှိနေတဲ့ နိုင်ငံဖြစ်တာမို့  သည်လို တိုင်းပြည်ဟာ ရူးရင် ရူး ၊ မရူးရင် ထူးဖို့ပဲ ရှိပါတယ်။ အဲသည်အတွက်လည်း နိုင်ငံတကာက အမေရိကန်ကို မော်ကြည့်နေကြရတာ ဖြစ်ပါတယ်။ ဒါကြောင့် လွယ်လွယ်နဲ့ နှိုင်းပြရရင် အမေရိကန်တွေဟာ bastards တွေလို့ ဟိုးတုန်းက ပြောကြတယ်။ အဖေမပေါ်ဘဲ မွေးတဲ့ ကလေက၀တွေပေါ့၊ ကမြင်းမသားသမီးတွေပေါ့။ အမေရိကန်ကို စထူထောင်တဲ့တာ သည်လို လူမိုက်တွေ နယ်ချဲ့တွေ ၀ရမ်းပြေးတွေနဲ့ စခဲ့ကြတာလို့ ပြောချင်တာပါ။ ခုလည်း သူများတိုင်းပြည်ကနေ ပြေးလာတဲ့လူတွေ ဝင်လာမစဲ တသဲသဲ မဟုတ်လား။

အမေရိကန်မှာက ရုရှားလို တရုတ်လို ဂျပန်တို့ စင်ကာပူတို့လို တသွေးတည်း တသံတည်း တပုံစံတည်း ကုန်ထုတ်လုပ်မှု တိုးတက်ရေး၊ ကောင်းမွန်ရေး၊ အစွမ်းကုန် လှပပြည့်စုံရေး (productivity) (perfectionsit) (idealist) ဆိုတာကို သွားတဲ့ပန်းတိုင်မှ မရှိတာကိုး။ အရင်းရှင်ကြီးတွေက လုပ်ချင်တိုင်းလုပ်၊ နိုင်ငံရေးသမားက ဖြစ်ချင်တိုင်းဖြစ်၊ ပြည်သူတွေကလည်း သူတို့အာရုံ သူတို့အကျိုးအတွက် ပါချင်မှ ပါကြတာ ဖြစ်ပါတယ်။ အဲသည်ထဲမှာ အလုပ်ဖြစ်ရေးလမ်းစဉ်ကိုပဲ သွားကြတာ ဖြစ်ပါတယ်။ အမေရိကန်တွေက သူတို့နွေဦးကို သူတို့ ဖြတ်ကျော်ခဲ့ပြီလို့ ဆိုနိုင်ပါတယ်။ သူတို့နွေဦးမှာ သူတို့ အနုပညာ၊ သူတို့ ခေါင်းမာမှု၊ သူတို့ စိတ်ကူးယဉ်ရူးသွပ်မှုတွေ ပါသလို သူတို့ ခါးမှာလည်း သေနတ်တလက်တော့ ထိုးထားသေးတာမို့ သူတို့တွေအတွက် ရှေ့လျောက် မျော်လင့်ချက်တွေ တပုံတခေါင်းလို့ ဆိုနိုင်မယ် ထင်ရပါကြောင်း။

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar