မျက်မှောက် အပြောင်းအလဲ အမေရိကန်၊ တရုတ်နဲ့ မြန်မာတို့၏ တုံ့ပြန်ချက်တွေ

မြန်မာနွေဦး ခရိုနီကယ် - နိုဝင်ဘာ ၈ မြင်ကွင်း

(မိုးမခ) နိုဝင်ဘာ ၉၊ ၂၀၂၄⁨⁨⁨⁨⁨⁨

မျက်မှောက် အပြောင်းအလဲ အမေရိကန်၊ တရုတ်နဲ့ မြန်မာတို့၏ တုံ့ပြန်ချက်တွေ

စစ်ကောင်စီခေါင်းဆောင် မင်းအောင်လှိုင်၏ တရုတ်ပြည်ခရီးစဉ်နဲ့ တပတ်တည်းမှာပဲ အမေရိကန်ရွေးကောက်ပွဲ ဖြစ်ပါတယ်။ အမေရိကန် ရွေးကောက်ပွဲရလဒ်က အမေရိကန်ပြည်တွင်း ပြည်ပသာမက မြန်မာလူမျိုးတွေကြားမှာပါ ကြီးမားသောဂယက်ကို ထိခိုက်စေပါတယ်။ မင်းအောင်လှိုင်၏ ခရီးစဉ်နဲ့ပတ်သက်ပြီးတော့လည်း မြန်မာတွေအကြားမှာ ဆွေးနွေးပြောဆိုစရာတွေ ဝေဖန်အငြင်းပွားစရာတွေ ဖြစ်နေကြတာလည်း တွေ့ရပါတယ်။

တရုတ်နိုင်ငံခြားရေးဝန်ကြီးဌာနက သတင်းစာရှင်းလင်းပွဲတခုမှာ ထုတ်ပြန်ရာမှာ - မြန်မာဘက်အသီးသီးတို့အား ချစ်ခင်ရင်းနှီးစွာ  တိုင်ပင်ဆွေးနွေးခြင်းဖြင့် နိုင်ငံရေးဆိုင်ရာ သင့်မြတ်သာယာရေးကို အကောင်အထည် ဖော်ဆောင်ရန် အားပေးထောက်ခံသည်ဟု တရုတ် နိုင်ငံခြားရေး ဝန်ကြီးဌာနဆိုတယ်လို့ ဆိုပါတယ်။ အသေးစိတ်ဖော်ပြချက်ကတော့ - မိမိတို့သည် မြန်မာနိုင်ငံအား လွတ်လပ်ရေး၊ အချုပ်အခြာအာဏာ၊ နိုင်ငံတော် တစ်ပေါင်းတစ်စည်းတည်း ဖြစ်ရေးနှင့် နယ်မြေတည်တံ့ခိုင်မြဲခြင်းကို ထိန်းသိမ်းကာကွယ်ရန် အားပေးထောက်ခံကြောင်း၊ မြန်မာ ဘက်အသီးသီးတို့အား ချစ်ခင်ရင်းနှီးစွာ တိုင်ပင် ဆွေးနွေးခြင်းဖြင့် နိုင်ငံရေးဆိုင်ရာ သင့်မြတ်သာယာရေးကို အကောင်အထည် ဖော်ဆောင်ရန် အားပေးထောက်ခံ ကြောင်း၊ မြန်မာနိုင်ငံ၏ နိုင်ငံရေးအသွင်ကူးပြောင်းရေးလုပ်ငန်းစဉ်များ ပြန်လည်စတင်မှုကိုလည်း အားပေးကြောင်းလို့ ဆိုလိုက်ပါတယ်။

အဲသည်အချက်နဲ့ပတ်သက်ပြီး ညီနောင်မဟာမိတ်အဖွဲ့ထဲက TNLA ၏ သဘောထားကို ကြည့်မယ်ဆိုရင် သည်လို ဆိုထားတာကို တွေ့နိုင်ပါတယ်။

စစ် ကောင်စီ ငြိမ်းချမ်းရေး ဆွေးနွေးလိုလျှင် အချက် ၂ ချက် လိုက်နာရမည်ဟု TNLA  ပြောတယ်လို့ People Spring က ရေးထားတာပါ။ 

▪︎"နံပါတ် ၁ အချက်က ကျွန်မတို့ကို အကြမ်းဖက်အုပ်စုကနေ ပယ်ဖျက်ရမှာ ဖြစ်ပါတယ်။ နံပါတ် ၂ အချက်က စစ်ကောင်စီဟာ လက်ရှိမြန်မာနိုင်ငံမှာ ကျူးလွန်နေတဲ့ စစ်ရာဇဝတ်မှုနဲ့ ဒုစရိုက်မှုတွေကို ဝန်ခံပြီးတော့မှ နိုင်ငံရေးကနေ ထွက်ခွာမယ်ဆိုရင် ကျွန်မတို့ဘက်ကလည်း ငြိမ်းချမ်းရေးဆွေးနွေးဖို့ ရှိပါတယ်”

-လွေးယေဦး (TNLAပြောရေးဆိုခွင့်ရှိသူ)

တိုင်းရင်းသားတွေအနေနဲ့ သဘောထားက စစ်ကောင်စီက နိုင်ငံရေးအာဏာချုပ်ကိုင်မှုကနေ ဆုတ်ခွာပေးမယ်ဆိုရင် ဆွေးနွေးအဖြေရှာဖို့ အဆင်သင့်ပဲလို့ တရုတ်အစိုးရ အပါအဝင် နိုင်ငံတကာအသိုင်းအဝိုင်းကို အသိပေးတာ ဖြစ်ပါတယ်။ ဒါဟာ တိုင်းပြည်၏ ရေရှည်အကျိုးစီးပွားဖြစ်တဲ့ တစုတစည်းတည်းဖြစ်ခြင်း၊ သင့်မြတ်ခြင်းနဲ့ အသွင် ကူးပြောင်းနိုင်ရေးအတွက် လမ်းစလည်း ဖြစ်တယ်ဆိုတာကို မီးမောင်းထိုးပြပေးတာလည်း ဖြစ်ပါတယ်။ ဒါကို မြန်မာတော်လှန်ရေးသမားတွေကလည်း ငြင်းပယ်ကြမှာ မဟုတ်ပါဘူး။ NUG က ထုတ်ပြန်ထားတဲ့ ဘုံသဘောတူညီချက်ထဲက အချက်လည်း ဖြစ်ပါတယ်။

အမေရိကန်မှာ ဒီမိုကရက်ပါတီ အထွေထွေရွေးကောက်ပွဲမှာ သမ္မတ၊ အထက်အောက် လွှတ်တော်တွေမှာ မဲရှုံးနိမ့်ကြတဲ့အခါ ဒီမိုကရက်ပါတီက ခေါင်းဆောင်တွေထဲက သမ္မဘိုင်ဒင်၊ ဒုသမ္မတ ကင်မလာဟဲရစ်အပါအဝင် ပါတီခေါင်းဆောင်အများအပြားက ပြိုင်ဘက်ကို ချီးကျုးဂုဏ်ပြုခြင်းကို ပြုလုပ်ခြင်း၊ ချောမွေ့စွာ အာဏာလွှဲပြောင်းပေးမည်ဟု ကတိပေးခြင်းတို့နဲ့အတူ သူတို့ပါတီ၏ လမ်းစဉ်နဲ့ ရည်မှန်းချက်များ ဆက်လက်အကောင်အထည်ဖော်သွားဖို့ ဆက်လက်တိုက်ပွဲဝင်သွားမယ်လို့ အားပေးစကား၊ သတိပေးစကားကို ပြောကြားလိုက်ပါတယ်။ အများပြည်သူတို့ စိုးရိမ်နေတဲ့ နိုင်ငံသားများ၊ ရွှေ့ပြောင်းခိုလှုံလာသူများ၏ လွတ်လပ်ခွင့်၊ လုံခြုံမှု၊ အကာအကွယ်ရှိမှုတို့အတွက် အစွမ်းကုန် ဆက်လက်ဆောင်ရွက်ပေးသွားမယ်လို့လည်း သူတို့က ထုတ်ဖော် ပြောကြားပါတယ်။ 

အမေရိကန်ရောက် မြန်မာပြည်သူတွေထဲက နိုင်ငံရေးကြောင့် ပြောင်းရွှေ့ခိုလှုံလာသူတွေအတွက် အခုလာမယ့် သမ္မတထရန့်လက်အောက်မှာ ဆက်လက်နေထိုင်ခွင့် အကာအကွယ်ပေးမှုတွေ ရုပ်သိမ်းခံရမှာကို စိုးရိမ်ကြောင်း ပြောဆိုကြတာတွေလည်း ရှိပါတယ်။ နောက်ထပ်ပြောင်းရွှေ့ခိုလှုံရန် စောင့်ဆိုင်းနေသူ မြန်မာနယ်စပ်ဒေသက ဒုက္ခသည်တွေအတွက် မျှော်လင့်ချက်တွေ မသေချာတော့မှာကိုလည်း ပူပန်ကြပါတယ်။ သည်အတွက် ဥပဒေပညာရှင်တွေကကော ဒီမိုကရက်လွှတ်တော်အမတ်တွေကပါ မြန်မာတွေသာမက ပြည်ပက ပြောင်းရွှေ့ခိုလှုံသူများအတွက် အကာအကွယ်ပေးကြဖို့ ဆောင်ရွက်ကြမယ့်အကြောင်း၊ နောက်လာမယ့် အစိုးရနဲ့ လွှတ်တော်က တရားလက်လွတ် လုပ်ကိုင်လာမယ်ဆိုရင် သူတို့အနေနဲ့ တရားနည်းလမ်း ဥပဒေကြောင်းများနဲ့ ပြန်လည်တုံ့ပြန်ကြမယ်လို့ ထုတ်ပြန်ကြပါတယ်။

မြန်မာ့အရေး လှုံ့ဆော်သူတွေထဲမှာ အချို့ကတော့ ထရန့်အစိုးရနဲ့ လွှတ်တော်ကို ပြန်လှန်စိန်ခေါ်ဖို့ ခြေလှမ်းတွေ ပြင်ကြတာက တပိုင်းဖြစ်ပြီး အချို့အစုအဖွဲ့တွေကတော့ ထရန့်အစိုးရနဲ့ လွှတ်တော်ကို ဆက်လက်ချဉ်းကပ်ပြီး မိမိတို့ပြောချင်တဲ့စကား ဆက်လက်နားပေါက်အောင် လုပ်ကြဖို့ကလည်း အရေးကြီးတယ်လို့ သဘောထားတွေ ပေးကြပါတယ်။ တရုတ်နိုင်ငံနဲ့ ဆက်ဆံရေးမှာ အမေရိကန်အစိုးရနဲ့ လွှတ်တော်အသစ်က တင်းမာတဲ့ သဘောထားတွေ ထုတ်ပြန်လာရင် မိမိတို့ မြန်မာပြည်အရေးအတွက် အကွက်ပဲလို့လည်း စဉ်းစားဆွေးနွေးကြတာ ရှိပါတယ်။ အမေရိကန်က တရုတ်ကို ကန့်သတ်ဖို့  ယခုထက်ပိုပြီး မြန်မာအရေးကို စိတ်ဝင်စားလာမယ်၊ ပတ်သက်လာမယ်လို့လည်း မြင်ကြပါတယ်။ ဘာပဲဖြစ်ဖြစ် ဒီမိုကရက်ပါတီကော အာဏာရရီပတ်ဘလစ်ကန်ပါတီတွေကိုယ်ပါ မိမိတို့ ပြည်သူတွေအရေး တိုင်းပြည်အရေးအတွက် စည်းရုံးချည်းကပ်ရမယ်ဆိုတဲ့ သဘော ဖြစ်ပါတယ်။

စစ်ကောင်စီဘက်ကို တရုတ်က အလေးသာလာတာနဲ့ ပတ်သက်ပြီးတော့လည်း ချဉ်းကပ်ရမှာ ခုနင်ကလို ကိုယ်နဲ့ သဘောထားမတူသူတိုင်း ရန်သူလို သဘောထားပြီး တုံ့ပြန်မလား၊ ဘုံသဘောထား သို့မဟုတ် တဖက်အစုအဖွဲ့၏ အကျိုးစီးပွားနဲ့ မိမိတို့အကျိုးစီးပွားချင်း မျှခြေဖြစ်အောင် ချိန်ညှိ စဉ်းစားမလား ဆိုတာကလည်း အချက်တချက် ဖြစ်ပါတယ်။ တရုတ်က အတင်းအကျပ်ဖိအားတွေပေး ဖြတ်တောက်ပိတ်ဆို့တာတွေ လုပ်နေတဲ့ကြားက လက်တုံ့ပြန်တဲ့အနေနဲ့ တရုတ်အကျိုးစီးပွားတွေကို တိုက်ခိုက် ဖျက်ဆီးတာတွေကို နွေဦးတော်လှန်ရေးအဖွဲ့တွေ မဟာမိတ်အဖွဲ့တွေက ပြန်မလုပ်ကြတာက တရုတ်အာဏာပိုင်တွေကို မိမိတို့က မီးမောင်းထိုးပြသင့်တဲ့အချက် ဖြစ်ပါတယ်။

အိမ်နီးချင်းနိုင်ငံများနဲ့ ဆက်ဆံရေးမှာ ငြိမ်းချမ်းရေး၊ လုံခြုံရေး၊ တည်တံ့ခိုင်မြဲရေးတွေကို စစ်ကောင်စီထက် တော်လှန်ရေးအဖွဲ့အစည်းတွေက ပေးစွမ်းနိုင်စွမ်းရှိတယ် ဆိုတာက တချက်၊ ပြီးတော့ စစ်ကောင်စီလက်ချက်နဲ့ စစ်ဘေးသင့်နေတဲ့ အငတ်ဘေးသင့်နေတဲ့ မြန်မာပြည်သူတွေအတွက် အကာအကွယ်နဲ့ ယုံကြည်စိတ်ချမှု အသက်အာမခံချက်တွေကို မိမိတို့ တော်လှန်ရေးအဖွဲ့အစည်းတွေက လုပ်ပေးနိုင်စွမ်းနဲ့ အာသီသရှိတယ်ဆိုတာကို ဆက်လက်ပြသနေကြရမှာ ဖြစ်ပါတယ်။

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar