Breaking News

ကိုသန်းလွင် ● ကက်ရှမီးယားပြဿနာ

ကိုသန်းလွင် ● ကက်ရှမီးယားပြဿနာ
(မိုးမခ) သြဂုတ် ၂၇၊ ၂၀၁၉

(၁)
ကက်ရှမီးယားပြည်နယ်၏ အကြီးဆုံးမြို့တော် ရှရီနာဂါ (Srinagar) မြို့တွင် လုံခြုံရေးတပ်ဖွဲ့များက မြို့တော်၏ နေရာအနှံ့ သေနပ်ကို အသင့်ကိုင်ကာ စောင့်ကြပ်နေကြသည်။ မြို့နေလူထုက အပြင်ကို မထွက်ရဲကြဘဲ သူတို့ ၏ ပြတင်းပေါက်များကသာ အပြင်ကို ကြည့်နေကြရသည်။ အချို့မှာ အစာပြတ်လပ်၍ ဆာလောင်မွတ်သိပ်နေကြသည်။

မြို့တော်ပါတ်ဝန်းကျင်တစ်ခုလုံးတိတ်ဆိတ်နေပြီး ယမန်နေ့ကဆန္ဒပြခဲ့ကြသော အရှိန်က မသေသေး။ ထိုစဉ်က မြို့လူထုနှင့် အိန္ဒိယစစ်တပ်တို့ ထိပ်တိုက်တွေ့ဆုံခဲ့ကြရသည်။

ဈေးဆိုင်များကိုလည်း ပိတ်ထားရပြီး ပိုက်ဆံထုတ်သော (ATM-Automated Teller Machine) စက်များမှာလည်း ပိုက်ဆံမရှိ တော့။ အင်တာနက်၊ မိုဘိုင်းဖုန်း၊ တယ်လီဖုန်းအားလုံးမှာပြတ်တောက်နေပြီး သန်းပေါင်းများစွာသော လူများမှာ ပြင်ပကမ္ဘာ နှင့် အဆက်အသွယ် မရှိဖြစ်နေပါသည်။

(၂)
 ပထမဆုံးသတင်းထောက်တစ်ဦးရောက်ရှိသွားရာမှ ရှုပ်ထွေးပြီး ကြောက်ရွံ့နေကြသောပြည်သူများကိုတွေ့ကြရပါသည်။ တစ်ပါတ်လုံးတွေ့ကြုံခဲ့ရသောအတွေ့အကြုံများကြောင့်အများစုမှာစိတ်ညစ်ညူးနေကြပါသည်။ တစ်ချို့တလေ အပြင်ကို ထွက်လာကြကာ အိန္ဒိယစစ်သားများကို တောင်းပန်၍ သူတို့အတွက်လိုအပ်သောပစ္စည်း များ ကို ဝယ်ကြခြမ်းကြရပါသည်။ အကာအကွယ်ရရန် ချထားသောသဲအိတ်များ၊ ကျိုးပဲ့ပျက်စီးနေသော ကားများအကြားမှ သွားကြရပါသည်။ တစ်ချို့မှာ အိန္ဒိယစစ်သားများ၏ ရိုက်နှက်နှိပ်စက်ခြင်းကို ခံကြရပါသည်။

အိန္ဒိယအစိုးရက ကက်ရှမီးယား၏ လွတ်လပ်သော အခြေအနေ (Status) ကို ပယ်ဖျက်လိုက်ပါသည်။ ၎င်း၏ ရန်သူ ပါကစ္စ တန်နိုင်ငံကိုအတိုက်အခံပြုကာ ပြုလုပ်လိုက်ခြင်းဖြစ်ပါသည်။ ဤကိစ္စကို ပါကစ္စတန်က ကြိုက်စရာအကြောင်းမရှိပါ။ အိန္ဒိယ အစိုးရ၏ လုပ်ရပ်ကြောင့် နယ်မြေတစ်လျှောက် ဆွဲလှုပ်လိုက်သလိုဖြစ်နေပါသည်။ ပါကစ္စတန်ကလည်း ကက်ရှမီးယား၏ ဒေသတစ်ချို့ကို ပိုင်ဆိုင်နေသေးရာ အခြေအနေမှာ တင်းမာနေပါသည်။

သောကြာနေ့ (သြဂုတ်လ ၉ရက်နေ့) ကရှရီနာဂါမြို့မှထောင်ပေါင်းများစွာသောလူအုပ်သည် ကက်ရှမီးယားနိုင်ငံ တော်အလံ ကိုဝှေ့ရမ်းကာ လွတ်လပ်ရေးကြွေးကြော်သံများကို ကြွေးကြော်ခဲ့ကြပါသည်။ အိန္ဒိယစစ်တပ်ကလူ အုပ်တွင်းသို့ သေနပ်နှင့် ပစ်ဖေါက်ကာ လူစုခွဲခဲ့ပါသည်။

အိန္ဒိယရဲတပ်ဖွဲ့က ဂျမူးနှင့် ကက်ရှမီးယား လူငယ်ကွန်ရက်မှ ခေါင်းဆောင်များကို စနေနေ့က ဖမ်းဆီးထိန်းသိမ်းခဲ့ပါသည်။ ကြီးမားသော လူအုပ်ကြီးမှာ ပစ်ခတ်မှုကြောင့် အံ့အားသင့်ပြီး လူစုကွဲသွားကြပါသည်။ လူ ၈ ဦးမှာ ထိခိုက်ဒဏ်ရာရပြီး ဆေး ရုံရောက် ဆေးကုသမှုခံယူနေကြပါသည်။ လူအုပ်မှာ အဆက်မပြတ်ပစ်ခတ်နေသော အော်တိုမက်တစ် သေနတ်သံများကို ကြားခဲ့ကြရပါသည်။

လူဦးရေရှစ်သန်းခန့်ရှိသော ကက်ရှမီးယားပြည်နယ်ကိုလွတ်လပ်သော (Autonomous Region) အဖြစ် သတ်မှတ် ထား သောနယ်ဖြစ်သည်။ ဟိန္ဒူလူမျိုးရေးဝါဒ ပြင်းပြနေသော အိန္ဒိယအစိုးရ ဝန်ကြီးချုပ်မိုဒီက မွတ်စလင်အများစုနေထိုင်သော ဤဒေသကို နှစ်ပေါင်းများစွာကြာအောင် ပြင်ဆင်လေ့လာပြီးမှ လုပ်ဆောင်ခဲ့ခြင်းဖြစ်ပါသည်။ အိန္ဒိယတွင် ဟိန္ဒူလူမျိုး များကအများစုဖြစ်ပြီး ကြီးစိုးနေသည်။ ကက်ရှမီးယားတွင် မွတ်စလင် အများစုနေထိုင်ပြီး အကြမ်းဖက်သမားများကလည်း ခွဲထွက်ရေးကိုစကားပြောနေကြရာ ဤပြဿနာသည် မနေ့တစ်နေ့ကမှ ဖြစ်ခဲ့ သောပြဿနာတော့မဟုတ်ပေ။  လွန်ခဲ့သော အနှစ် ၃၀ ကာလပတ်လုံးတောတောင်ထူထပ်သော ကက်ရှမီးယား တောင်ကြားသည် အိန္ဒိယအုပ်ချုပ်သည့်အပိုင်းတွင် ခွဲထွက်ရေးသမားများနှင့် ပြည့်နှက်နေခဲ့ပါသည်။ ၁၉၉၀ ခုနှစ်များတွင် ပါကစ္စတန်က အစ္စလာမ် (Jihadis) များကိုလွှတ်ပေးပြီး ပြဿနာကို အစဖော်ခဲ့ပါသည်။

ကက်ရှမီးယားတွင် နေထိုင်သူတို့အဖို့မှာမှု အိန္ဒိယသည် နိုင်ငံရပ်ခြားမှ လွှမ်းမိုးသူဖြစ်သည်။ ၁၉၄၇ ခုနှစ်မှစ၍  နှစ်ပေါင်း တာရှည်အပြောင်းအလဲ လုပ်ခဲ့သမျှသည် သူတို့၏ ကိုယ်ပိုင်အုပ်ချုပ်ရေးကို ဝေးသထက်ဝေးအောင် ပြုလုပ်ခြင်းများသာ ဖြစ်သည်။ အင်္ဂလိပ်ထံမှ လွတ်လပ်ရေးရခဲ့စဉ်ကကက်ရှမီးယားကိုအုပ်ချုပ်သော မဟာရာဂျာကြီးများသည် အိန္ဒိယနိုင်ငံနှင့် ပူးပေါင်းရန်သဘောတူညီခဲ့ကြပါသည်။ အိန္ဒိယနှင့် ပူးပေါင်းလျင်တစ်ချိန်တွင် ကိုယ်ပိုင်အုပ်ချုပ်ရေး ရရှိလိမ့်မည်ဟူ၍ဖြစ် သည်။

ကက်ရှမီးယားသည် အပြောင်းအလဲကို လိုလားနေသည်။ ပြောင်းဖို့လည်း လိုအပ်နေသည်။ လူပေါင်း ထောင်ပေါင်းမြောက် များစွာ သေဆုံးခဲ့ကြပြီး စီးပွားရေးမှာလည်းချွတ်ခြုံကျလျက်ရှိသည်။

၁၅ရက်နေ့က ပြောကြားသော မိန့်ခွန်းတစ်ခုတွင် မစ္စတာမိုဒီက ကက်ရှမီးယား၏ အခြေအနေအသစ်သည် နိုင်ငံကို ပိုမို အေးချမ်းပြီး ပိုမိုချမ်းသာ ကြွယ်ဝစေပါလိမ့်မည်ဟု ပြောသည်။ သူ့မိန့်ခွန်းကို ကက်ရှမီးယားနိုင်ငံ သားများ ကြည့်ရှုကြရမည် မဟုတ်ပေ။ အဘယ့်ကြောင့်ဆိုသော် တယ်လီဗေးရှင်း အပါအဝင် ဆက်သွယ်ရေးကိရိယာအားလုံး အဖြတ်အတောက် ခံထားရသောကြောင့် ဖြစ်ပါသည်။

သတင်းထောက်က အင်တာဗျုးရနိုင်သမျှ လူ ၅၀ ခန့်ကမူ အိန္ဒိယ၏ အပြုအမှုသည် ပို၍ နိုင်ငံခြားဆန်ပြီး အုံကြွဆူပူရန် အထောက်အကူဖြစ်စေမည်ဟု ဆိုပါသည်။ ရပ်ကွက်အတွင်းမှ လူငယ်များမှာ  အိမ်များမှထွက်ခွာ ရန် ပြင်ဆင်နေကြပြီး သူတို့သည် သူပုန်တို့နှင့် ပူးပေါင်းကြမည်ဖြစ်သည်။ အိန္ဒိယဖွဲ့စည်းပုံ ဥပဒေတွင် အာတီကယ် (Article ၃၇၀)  မှာ ကက်ရှမီးယားလွတ်လပ်ရေးနှင့်ဆိုင်သည်။ ထိုအာတီကယ်က ကက်ရှမီးယားသည် အိန္ဒိယ နှင့် ပူးပေါင်းသည်မှန်စေ၊ လွတ်လပ်မှုက ရရှိပြီးဖြစ်သည်။

အီန္ဒိယအစိုးရအရာရှိများကမူ ဈေးရောင်းချနေသူများ လူသွားလူလာရှုပ်ထွေးနေသော လူများကို ကြည့်ကာ ကက်ရှမီးယား တွင် မှုလအခြေအနေသို့ ပြန်လည်ရောက် ရှိနေပြီးဟု ပြောနေကြသည်။ သို့သော် ကက်ရှမီးယား ရှိ လုံခြုံရေးတပ်များ ကမှု ဆူပူအုံကြွမှုသည် ဟိုတစသည်တစရှိနေတုန်းပင်ဖြစ်သည်။ လူတစ်ဒါဇင် နှစ်ဒါဇင်မျှ သော လူထုသည်မိန်းမသားများအပါအဝင်လုံခြုံရေးတပ်သားများကို ကျောက်ခဲများ၊ ရရှိနိုင်သော ပစ္စည်းများနှင့် ပစ်ပေါက်နေကြဆဲပင်ဖြစ်သည်ဟု ဆိုသည်။ “လူတွေဟာသိပ်ကိုစိတ်တိုနေကြတယ်၊ ကြောက်လဲမကြောက်ဖူး၊  အလျော့လည်း ပေးမဲ့သဘောမရှိဘူး” ဟုပြောနေကြ သည်။

အိန္ဒိယစစ်တပ်နှင့် ကက်ရှမီးယားရှိ လုံခြုံရေး တပ်ဖွဲ့ဝင်များပူးပေါင်း၍ နေရာအနှံ့ချထားသည်။ တချို့နေရာများ ဆိုလျှင် အိမ်တိုင်းလိုလို အိမ်အပေါက်ဝများတွင် လုံခြုံရေးတပ်သားများကို တွေ့နိုင်ကြပါသည်။

အစိုးရရုံးတွင် လူ ၄၀၀ခန့်က တယ်လီဖုန်းတစ်လုံးကို တန်းစီပြီး ပြင်ပရှိ ဆွေမျိုးများရှိရာသို့ အဆက်အသွယ်ရရှိ စေရန် စောင့်ဆိုင်းနေကြရသည်။ ကျောင်းများကို ပိတ်ထားရပြီး၊ ဥယျာဉ်များတွင်လူမရှိ။ အစာရေစာကလည်း ပြတ်လတ်နေပြီးဆေးရုံ ဆေးခန်းသွားရန် ကာဖြူး (Pass) သွားခွင့်လက်မှတ်များလိုအပ်ပါသည်။ ကက်ရှမီးယား ပြည်သူတို့က ဤကဲ့သို့ကြပ်တည်း မှုမျိုးကို ယခင်က ကြုံတွေ့ခဲ့ကြဘူးသော်လည်း ယခုတစ်ကြိမ်ကတော့အဆိုး ဝါးဆုံးဖြစ်သည်ဟု ဆိုသည်။

၁၉၉၀ခုကစပြီး သူပုန်ထခဲ့ကြသော ကက်ရှမီးယား ရာပေါင်းအနည်းငယ်မျှသော သူပုန်များသည် ကက်ရှမီးယား တောင် ကြားတွင် ရှိနေကြသည်။ အိန္ဒိယစစ်တပ်နှင့် နှိုင်းယှဉ်သော် အင်အားက သေးလွန်းသည်။  တစ်ထောင်နှင့် တစ်ယောက်မျှ နှိုင်းယှဉ်နေရသည်။ သို့သော်လည်း အိန္ဒိယစစ်တပ်က အမြစ်ပြတ်သွားအောင်မရှင်းနိုင်ပါ။

ကက်ရှမီးယားကို လွတ်လပ်ခွင့်ကို ရုတ်သိမ်းခြင်းနှင့် ပါတ်သတ်၍ အစိုးရသည် ကက်ရှမီးယားခေါင်းဆောင်တစ် ဦးတစ် ယောက်ကိုမျှ ဆွေးနွေးခဲ့ခြင်းမရှိမှုအပေါ် ဥပဒေနှင့်မညီဘူးဟု အိန္ဒိယ ဥပဒေဆိုင်ရာ ကျွမ်းကျင်သူများက ဆိုသည်။ လွတ်လပ်ရေးရစဉ်က သဘောတူညီခဲ့ကြသည်မှာ မည်သည့် ပြောင်းလဲမှုပင်လုပ်လုပ် ကက်ရှမီးယား ခေါင်းဆောင်များနှင့် ဆွေးနွေးတိုင်ပင်ရမည်ဟု ဆိုထားသည်။

(၃)
ကက်ရှမီးယားနည်းတူ အာသံပြည်နယ်တွင်လည်း အိန္ဒိယနိုင်ငံသားဟုတ်မဟုတ် စီစစ်နေသည်။ လူဦးရေ ၃၃ သန်းနေထိုင် သော ပြည်နယ်တွင် အစိုးရ၏ ဦးတည်ချက်မှာ မွတ်စလင်များဖြစ်သည်။ မွတ်စလင်လေးသန်းခန့် မှာအစိုးရက နိုင်ငံသား မဟုတ်ကြောင်း ကြေညာခံရရန်ရှိနေသည်။ ထိမ်းသိမ်းရေးဌာနများ အကျဉ်းထောင်များ ကိုပြင်ဆင်ပြီး စီစစ်နေသည်။ ၁၉၇၀ ခုနှစ်ဆီက ရသမျှ စာရွက်စာတမ်းများကို ကိုင်ကာ လူအများက အိန္ဒိယ နိုင်ငံသားဖြစ်ကြောင်း သက်သေပြနေရသည်။

အစိုးရကပါလီမန်တွင်ခရစ္စယမ်များ၊ ဗုဒ္ဓဘာသာဝင်များ ဟိန္ဒူများကို ကင်းလွတ်ခွင့် ပြုသည့် ဥပဒေကို တင်သွင်း နေသည်။
အတိုက်အခံတို့ကမူကက်ရှမီးယားနှင့် အာသံနယ်တို့မှ အဖြစ်အပျက်များကို Exhibit A နှင့် Exhibit B ဟူ၍ပြော ဆိုနေကြပြီး ဟိန္ဒူလူမျိူးကြီးဝါဒသည် ခေတ်နှင့် မလျှော်ညီတော့ကြောင်းပြောဆိုနေကြသည်။

ကိုသန်းလွင်
Ref: A dragnet to find who is and who isn’t Indian, by J. Gettleman, New York Times August 19 2019