တိုက်ပွဲများဖြစ်ပွားနေသော်လည်း ရခိုင်တပြည်နယ်လုံးတွင် ရွေးကောက်ပွဲကျင်းပမည်

ရခိုင်ပြည်နယ်မဲဆန္ဒနယ်မြေများတွင် ရခိုင်ပါတီများသည် ရလာဒ်ကောင်းများ ရလေ့ရှိသည်။

ဟန်ထူးအောင် Myanmar NOW

(မိုးမခ) နိုဝင်ဘာ ၃၀၊ ၂၀၁၉

တိုက်ပွဲများဖြစ်ပွားနေသော်လည်း ၂၀၂၀ ရွေးကောက်ပွဲကို ရခိုင်တပြည်နယ်လုံးတွင် ကျင်းပနိုင်ရန် ပြင်ဆင်နေကြောင်း ပြည်နယ်ရွေးကောက်ပွဲကော်မရှင် ပြောခွင့်ရအရာရှိက အတည်ပြုသည်။

“မဲရုံတွေ၊ မဲဆန္ဒရှင်တွေကအစ အားလုံးတွက်ချက်မှုတွေ။ မဲရုံသုံးပစ္စည်းတွေကအစ ကျွန်တော်တို့ လုပ်ထားပြီးသားပါ” ဟု ရခိုင်ပြည်နယ် ရွေးကောက်ပွဲကော်မရှင်အဖွဲ့ခွဲ အတွင်းရေးမှူး ဦးသူရိန်ထွဋ်က ပြောသည်။

တိုက်ပွဲများဖြစ်ပွားနေသော ရခိုင်ပြည်နယ်မြောက်ပိုင်းအပါအဝင် ပြည်နယ်အတွင်းရှိ မြို့နယ်အားလုံးတွင် မဲဆန္ဒရှင်စာရင်း ကောက်ယူပြီးစီးထားပြီး စစ်ဘေးရှောင်စခန်းနေသူများနှင့် အဝေးရောက် မဲဆန္ဒရှင်အချို့သာ ကျန်သည်ဟုလည်း သူက ဆိုသည်။

၂၀၁၅ ရွေးကောက်ပွဲကို ရခိုင်ပြည်နယ် ၁၇ မြို့နယ်စလုံးတွင် ကျင်းပခဲ့ပြီး မဲရုံပေါင်း ၂၅၀၀ ကျော်နှင့် မဲပေးခဲ့သူ ၁ ဒသမ ၄ သန်းကျော် ရှိခဲ့ကြောင်း ပြည်နယ်ရွေးကောက်ပွဲကော်မရှင်မှ သိရသည်။

ရခိုင်နိုင်ငံရေးပါတီများကလည်း ရွေးကောက်ပွဲကျင်းပနိုင်ရန် လိုလားနေကြပြီး တပ်မတော် နှင့် ရက္ခိုင့်တပ်တော် AA တို့အကြား ဖြစ်ပွားနေသည့် တိုက်ပွဲများကြောင့် ရွေးကောက်ပွဲထိခိုက်မည်ကို စိုးရိမ်နေကြသည်။

“လူသားချင်းစာနာထောက်ထားပြီး နှစ်ဖက်ညှိနှိုင်းပြီးတော့ တိကျတဲ့အဖြေတစ်ခု ထုတ်နိုင်မယ်ဆိုရင် တစ်နှစ်လောက်ရှိတဲ့ အချိန်အတွင်းမှာ ကြိုးစားမယ်ဆိုရင် ရခိုင်ပြည်နယ်မြို့နယ်တိုင်းမှာ ရွေးကောက်ပွဲကျင်းပနိုင်မယ်” ဟု

စစ်တွေမြို့အခြေစိုက် ရခိုင်အမျိုးသားပါတီ (ANP) ၏ မူဝါဒရေးရာ ဦးဆောင်ကော်မတီ အဖွဲ့ဝင် ဦးထွန်းအောင်ကျော်က ဆိုသည်။

ကော်မရှင်က မဲဆန္ဒရှင်စာရင်းများ ကောက်ယူပြီးသော်လည်း ပြည်နယ်မြောက်ပိုင်းတွင် နေ့စဉ်ဖြစ်ပွားနေသည့် တိုက်ပွဲများကြောင့် ထွက်ပြေးနေရသူများရှိနေသည့်အတွက် တိကျသည့်မဲစာရင်း မရမည်ကိုလည်း စိုးရိမ်ကြောင်း ၎င်းကဆိုသည်။

ရခိုင်တိုင်းရင်းသားမျိုးနွယ်များ အစည်းအရုံး၏ နိုဝင်ဘာအတွင်းကောက်ယူထားသည့် နောက်ဆုံးရ အချက်အလက်များအရ ရခိုင်မြောက်ပိုင်းရှိ ၇ မြို့နယ်တွင် စစ်ဘေးရှောင် ၉ သောင်းကျော် ရှိနေပြီဖြစ်သည်။

ပါတီများက ကြိုဆို
တိုက်ပွဲများဖြစ်ပွားနေသော်လည်း ၂၀၂၀ ရွေးကောက်ပွဲကို ရခိုင်ပြည်နယ်လုံးတွင်ကျင်းပမည့်သတင်းကို ရခိုင်ဒီမိုကရေစီအဖွဲ့ချုပ် (ALD) က ကြိုဆိုကြောင်း ပါတီအတွင်းရေးမှူး ဦးမျိုးကျော်က ပြောသည်။ ရခိုင်ပြည်နယ် ကျောက်တော်မြို့အခြေစိုက် ၎င်းတို့ပါတီသည် ပြည်နယ်တောင်ပိုင်း နယ်မြေများတွင် အဓိက ဝင်ရောက်ယှဉ်ပြိုင်မည် ဖြစ်သည်။

ရွေးကောက်ပွဲကျင်းပတိုင်း ရခိုင်ပြည်နယ်မဲဆန္ဒနယ်မြေများတွင် ရခိုင်ပါတီများသည် ရလာဒ်ကောင်းများ ရလေ့ရှိသည်။ ၁၉၉၀ ရွေးကောက်ပွဲတွင် ရခိုင်ဒီမိုကရေစီအဖွဲ့ချုပ် နှင့် ၂၀၁၀ ရွေးကောက်ပွဲတွင် ရခိုင်တိုင်းရင်းသားများ တိုးတက်ရေးပါတီ (RNDP) တို့သည် ရခိုင်ပြည်နယ်တွင်း နေရာအများစုတွင် အနိုင်ရခဲ့ကြသည်။

၂၀၁၅ ရွေးကောက်ပွဲတွင် ALD နှင့် RNDP တို့ ပူးပေါင်းတည်ထောင်ထားသည့် ရခိုင်အမျိုးသားပါတီ(ANP) က ရခိုင်ပြည်နယ်တွင်း နေရာအများစုတွင် အနိုင်ရခဲ့သည်။

၂၀၁၅ ရွေးကောက်ပွဲမတိုင်ခင် ALD နှင့် RNDP ပူးပေါင်းပြီး ANPအဖြစ် တည်ထောင်ခဲ့သော်လည်း ALD ဗဟိုအလုပ်အမှုဆောင်ဟောင်းများ အထုတ်ခံရပြီးနောက်ပိုင်း ရခိုင်ဒီမိုကရေစီအဖွဲ့ချုပ်(ALD)ကို ၂၀၁၇ခုနှစ်တွင် ပြန်လည်ဖွဲ့စည်းခဲ့သည်။ ထို့နောက် ဒေါက်တာအေးမောင်ဦးဆောင်မှုဖြင့် နာမည်ကြီးခဲ့သည့် ANP ပါတီလည်း နှစ်ခြမ်းကွဲခဲ့သည်။