Breaking News

နေသွင်ညိဏ်း - တရုတ်တန်ခိုးထွားမလား (ကိုရိုနာ ဗိုင်းရပ်စ် အလွန်ကမ္ဘာ)



တရုတ်တန်ခိုးထွားမလား 
(ကိုရိုနာ ဗိုင်းရပ်စ် အလွန်ကမ္ဘာ)
နေသွင်ညိဏ်း
(မိုးမခ) ဧပြီ ၂၂၊ ၂၀၂၀

ထိုမေးခွန်းကို တိုတိုဖြေရလျှင် တရုတ်ကို သိဒ္ဓိတင်လွန်းရာရောက်ပါသည်။ နိုင်ငံအသီးသီးမှာ ကိုယ့်အား ကိုယ်ကိုးလိုစိတ် ပြန်လည်အားကောင်းလာခြင်းက ကမ္ဘာမှာ အမေရိကန်ပြည်ထောင်စု၏ အဆင့်နေရာအတွက် ကောင်းသော ကိစ္စ ဖြစ်ပါ သည်။
မတ်လ ၁၈ ရက်နေ့တွင် သမ္မတ ဒေါ်နယ်ထရမ်က ကိုရီယားစစ်ပွဲကာလ ကာကွယ်ရေးပစ္စည်းများ ထုတ်လုပ်ခြင်းဆိုင်ရာ ဥပဒေကိုပြန်အသက်သွင်းပြီး သူ့ကိုယ်သူလည်း မမြင်ရသောရန်သူကို အမြစ်ပြတ်ချေမှုန်းပစ်မည့် စစ်ပွဲကာလ သမ္မတဟု ကြွေးကြော်လာသည်။ ထိုမတိုင်ခင် နှစ်ရက်မှာ ပြင်သစ် သမ္မတမာခရွန်းကလည်း ကိုရိုနာ ဗိုင်းရပ်စ်ကို စစ်ကြေညာခဲ့ပါသည်။ ဗြိတိန်ဝန်ကြီးချုပ် ဘောရစ်ဂျွန်ဆင်အတွက် ကိုရိုနာ ဗိုင်းရပ်စ် စစ်ပွဲက ပို၍ ကိုယ်ရေးကိုယ်တာ ဆန်ပါသည်။ သူကိုယ်တိုင် လူနာစာရင်းမှာပါခဲ့ရပြီး တစ်ပတ်ခန့် ဆေးရုံ တက်ခဲ့ရသည်။ သြစတြေလျအိန္ဒိယ၊ တောင်အာဖရိက၊ တောင်ကိုရီးယာနှင့် တရုတ်သည်ပင်လည် ကိုရိုနာဗိုင်းရပ်စ်နှင့် ရင်ဆိုင်ရာတွင် စစ်ပွဲကာလဆန်ဆန် တုံ့ပြန်ခဲ့ကြသည်။ ဘရာဇီးတွင် ဥပဒေပြုအမတ်များက သမ္မတဘိုလ်ဆိုနာရို၏ ဆန္ဒကိုဆန့်ကျင်ပြီး စစ်ကြေညာဖို့ ဖိအားပေးခဲ့ကြသည်။
ကိုရိုနာ ဗိုင်းရပ်စ်နှင့်ရင်ဆိုင်ရာတွင် နိုင်ငံအသီးသီးက စစ်ပွဲဟုတွင်တွင်ပြောလာကြသဖြင့် စစ်ပွဲအလွန်ကမ္ဘာကြီး၏ အခင်း အကျင်းကို မေးစရာပေါ်လာရသည်။ ဖော်ရိန်းပေါ်လစီမဂ္ဂဇင်းကြီးကမေးမြန်းခဲ့သောစစ်တမ်း တွင်လည်း လေ့လာသူများအားလုံးက ကိုရိုနာဗိုင်းရပ်စ်ကြောင့် ကမ္ဘာကြီးတွင် အပြောင်းအလဲများဖြစ်ပေါ်မည်ဆိုတာ သဘောတူကြသည်။ သို့သော် မည်သို့ မည်ပုံပြောင်းလဲမည်ကိုကာ အယူအဆကွဲပြားကြသည်။ ကူးစက်ရောဂါမှ လွန်မြောက်သောအခါမှာ မြင်တွေ့ရမည့်ကမ္ဘာသည် ကပ်ဘေးမတိုင်ခင် သူတို့ ကြိုတင်မှန်းဆခဲ့ သို့မဟုတ် ကြိုတင်သတိပေးခဲ့သော လမ်းကြောင်းအတိုင်း ပုံပေါ်လာလိမ့်မည်ဟု လေ့လာသူ တစ်ဦးချင်းက ယူဆနေကြပုံ ရပါသည်။

ထပ်ပြန်တလဲလဲပြောဆိုနေကြသောကိစ္စမှာ ကိုရိုနာဗိုင်းရပ်စ်ကဖန်တီးပေးလိုက်သော စိတ်မချမ်းမြေ့ဖွယ်ရာ ပထဝီနိုင်ငံရေးအခင်းအကျင်းတွင် အမေရိကန်ခေါင်းဆောင်မှုကျဆုံးခြင်းနှင့် တရုတ်အင်အားကြီးထွားလာခြင်း ဖြစ်သည်။ အီရတ်စစ်ပွဲ၊ ကမ္ဘာစီးပွားပျက်ကပ်၊ ထရမ့်သမ္မတ ဖြစ်လာခြင်းတို့ကိုလည်း အမေရိကန်၏ ခေါင်းဆောင်မှုနိဂုံးဟု ဆိုခဲ့ကြသည်ချည်း ဖြစ်ရာ နောက်ထပ်ဆုံးရှုံးနိုင်စရာနည်းသွားပါပြီ၊ ဟောကိန်းဆရာများက ယခုအကြိမ်သည် ယခင်အချိန်များနှင့်မတူဟုဆိုပါလျှင် ဖြစ်တန်ခြေရှိသော်လည်း မဖြစ်တန်ရာဟု ယုံကြည်စရာလည်း သေချာရှိနေပါသည်။ ကမ္ဘာကြီး ပုံမှန်လည်ပတ်နေချိန်တွင် အမေရိကန်၏မိတ်ဆွေများက အကူအညီကို အပူအပင်ကင်းကင်း ရယူခဲ့ကြသဖြင့်၊ ရန်သူတော်များ အကြိုက်တွေ့ခဲ့ကြသည်။ အခက်ကြုံလာသောအချိန်ကျတော့မှ ကမ္ဘာကြီးသည် အမေရိကန် ခေါင်းဆောင်မှု၏အရေးပါမှုကို နားလည်လာကြသည်။
ကမ္ဘာကြီးကို ဦးဆောင်မှုဟု ဆိုလိုက်လျှင် ဖမ်းဆုပ်ရမလွယ်သော အယူအဆတစ်ခုဖြစ်နေသည်။ ဒေသတစ်ခု၊ အကြောင်း အရာ တစ်ခုကို ဦးဆောင်မှုသည် ဖမ်းဆုပ်ရ၊ လေ့လာရ၊ သုံးသပ်ရတာ ပို၍ လွယ်ကူပါသည်။

ကမ္ဘာ့မြေပုံကိုကြည့်လိုက်လျှင် တရုတ်၏ ကိုရိုနာဗိုင်းရပ်စ်ဝါဒဖြန့်ချိရေးက သတိထားစရာပင်။ ဘေဂျင်းမှ အလွန်ဝေးသောနိုင်ငံများ၊ ဥပမာ အီသီယိုပီးယား(တရုတ်က အာဖရိကနိုင်ငံများအတွက် ရောဂါထိန်းချုပ်ရေးနှင့် ကာကွယ်ရေးစင်တာများကို ဆောက်လုပ်ရန် စီစဉ်နေ) ၊ ဆာဗီးယား(သမ္မတအလက်ဆန်းဒါး ဘူးစစ်က ဘီလာရုလေဆိပ်တွင် တရုတ်ပြည်မှဆေးပစ္စည်းများကို အကြိုထောက်ခဲ့)၊ ဗီနီဇွဲလား ( အစိုးရ၏ရိက္ခာဂိုဒေါင်များရှိ ရိက္ခာတဝက်သည် တရုတ်ပြည်မှပေးပို့ခြင်းဖြစ်) တို့မှာ နမူနာများဖြစ်သည်။ ထိုသို့သော ဝါဒ ဖြန့်ချိရေးများကို စီးပွားရှုထောင့်ကကြည့်လျှင် အရေးမပါလှပါ။

အာဖရိကရှိ တရုတ်၏ မဟာမိတ်များဖြစ်သော အီသီယိုးပီးယားနှင့် အန်ဂိုလာတို့ကို နမူနာအဖြစ် ကြည့်ရ အောင်။ နှစ်နိုင်ငံစလုံး၏ စီးပွားရေးသည် နိုက်ဂျီးရီးယား ကဲ့သို့ အာဖရိကထိပ်တန်း နိုင်ငံများနှင့် နှိုင်းယှဉ်လျှင် မိုးနှင့်မြေလို ကွာပါသည်။ နိုက်ဂျီးရီးယားသည် အမေရိကန် ပြည်ထောင်စု၏ စိတ်ချရသောလုံခြုံရေး မိတ်ဖက်ဖြစ်သည်။ အာဖရိကတွင် ဒုတိယ စီးပွားရေးအင်အား အတောင့်တင်းဆုံးနိုင်ငံဖြစ်သော တောင်အာဖရိကနိုင်ငံတွင်လည်း တရုတ်၏ရင်းနှီးမြှုပ်နှံမှုအပေါ် မကျေနပ်မှုများ တိုးနေသည်။ ထိုသို့သော အမှားမခံသော ပထဝီ နိုင်ငံရေးအခြေအနေသည် အီဘိုလာကပ်ဘေးနှင့်ဘိုကိုဟာရမ် သူပုန်ထမှုတို့တွင် စမ်းသပ်ခံပြီးဖြစ်နေရာ ကိုရိုနာဗိုင်းရပ်စ်ကြောင့် ထပ်ပြီးထူးလာစရာ အကြောင်းမရှိတော့ပါ။ တရုတ်အစိုးရအတွက် အာဖရိကရှိ ပို၍ဆင်းရဲ၊ ပို၍အားနည်း၊ ပို၍အုပ်ချုပ်မှုညံ့ဖျင်းသောအစိုးရများနှင့်သာ မိတ်ဆွေသစ်ဖွဲ့၍ရကောင်းလိမ့်မည်။ တကယ့်တန်ဖိုးရှိသောအပိုင်းမှာ အမေရိကန် ဦးဆောင်သော နိုင်ငံတကာစနစ်နှင့် ခွဲမရအောင် တွဲချိတ်လျက် ရှိနေသည်။

အရှေ့ဥရောပတွင်လည်း ထိုနည်းအတိုင်းသာ။ ဆားဗီးယား ပြည်သူလူထုသည် တရုတ်၏ ရင်းနှီးမြှုပ်နှံမှု၊ တရုတ်နှင့် စစ်ရေးလေ့ကျင့်မှု၊ တရုတ်နှင့် ရဲတပ်ဖွဲ့ပညာရပ်ဆိုင်ရာ နည်းပညာများကို ဖက်လဲတကင်းဖြစ်လွန်းသဖြင့် လေ့လာသူများအတွက် သတိထားစရာ ဖြစ်ရသည်။ ဆာဗီးယားသည် လူအများရှေ့တွင် မည်သို့အသံပြုပြု၊ တကယ်တမ်းလုံခြုံရေးကဏ္ဍတွင် အနောက်နှင့် နီးကပ်မြဲပင် ဖြစ်သည်။ ထို့ပြင် ဆာဗီးယားသည် အရှေ့ဥရောပတွင် ပီဘိ ကလေးသာသာ ရှိသေးသည်။ ပိုလန်၊ ချက်သမ္မတ နိုင်ငံ၊ ရိုမေနီးယား၊ ဂရိကဲ့သို့ နေတိုးမဟာမိတ် နိုင်ငံများနှင့် ဆာဗီးယားကို စီးပွားရေးချင်း နှိုင်းယှဉ်လျှင် လေးဆမှ ဆယ်ဆအထိ ကွာခြားနေ သည်။ ထို့အပြင် တရုတ်သည် လက်တင်အမေရိကား၏အင်အားကြီးနှစ်နိုင်ငံဖြစ်သော ဘရာဇီးနှင့်မက္ကဆီ ကိုတို့တွင် နိုင်ငံရေးခြေချစရာ နေရာမရှိပေ။ ထိုနှစ်နိုင်ငံ၏ စီးပွားရေးကိုပေါင်းစည်းလိုက်လျှင် ဒေသတစ်ခုလုံး စီးပွားရေး၏ ထက်ဝက်ကျော် ရှိနေသည်။

အနောက် ဥရောပတွင်လည်း တရုတ်အကူအညီတွေ အီတလီကို အချိန်ကိုက်ဝင်ခဲ့သဖြင့် အီတလီတွင် အီးယူ၏လူကြိုက်များမှုအပါ် ထိခိုက်သွားနိုင်ပါသည်။ အီးယူ ကော်မရှင်နာမင်းကြီးဟောင်း ဂျက်ကော့ ဒဲလော့စ်က အီးယူ၏ ညီညွတ်ရေး ဝါးအစည်းပြေမှုကို ဥရောပသမဂ္ဂ၏ ကျင့်ဝတ်ပိုင်းဆိုင်ရာ အန္တရာယ်ဟုပင်ဆိုခဲ့သည်။ ထိုပြဿနာမှာ တရုတ်၏ ဝင်ခလောက် ဆန်ခြင်းထက် အီးယူ၏အတွင်းပိုင်း ဖွဲ့စည်းတည်ဆောက်ပုံ ပြဿနာဟုသာ ဆိုရပါမည်။ နောက်ဆုံး ကပ်ဘေးကြီးကြောင့် အဆိုးဆုံး အခြေအနေ ကြုံရရင်လည်း အနောက်ဥရောပတွင် တရုတ်က အမေရိကန်ထက် ပထဝီနိုင်ငံရေးတွင် တပမ်းသာသွားလိမ့်မည်ဟု ယုံ ကြည်စရာ အကြောင်း မရှိပါ။

အာရှဘက်လှည့်ရလျှင် အမေရိကန်ပြည်ထောင်စုနှင့် တရုတ်တို့၏ ပထဝီနိုင်ငံရေး အားပြိုင်မှုနယ်ပယ်သည် ဂျပန်မှသြစတြေလျကို ‌‌ကျော်ကာ အိန္ဒိယအထိ ကျယ်ပြန့်သော အင်ဒိုပစိဖိတ် ဒေသတွင် ဖြစ်သည်။ ကိုရိုနာ ဗိုင်းရပ်စ်ကြောင့် ဂျပန်၊ တောင်ကိုရီးယား၊ ထိုင်ဝမ်တို့တွင်တရုတ်အတွက် မိတ်ဆွေသစ်များ တိုးပွားလာစရာ အကြောင်းမရှိပါ။ တရုတ်အင်အားနှင့် အနီးကပ်တွေ့နေရသော အရှေ့အာရှ နိုင်ငံများသည် တရုတ်၏လွှမ်းမိုး မှု တိုးမပေါက်နိုင်သောနိုင်ငံများလည်း ဖြစ်သည်။ သြစတြေလျတွင်လည်း ကိုရိုနာ ဗိုင်းရပ်စ်ကြောင့် တရုတ်အပေါ် သံသယစိတ်ပိုများလာကြသည်ကိုသာ တွေ့ရသည်။ ဇန်နဝါရီလောက်က သြစတြေးလျနိုင်ငံထုတ် အရည်အသွေးမြင့် နှာခေါင်းစည်းများကို တရုတ်က ဝယ်ယူခဲ့ပြီး ယခုအခါမှာ သြစတြေလျက တရုတ်နိုင်ငံထုတ် နှာခေါင်းစည်းများကို သြစတြေလျက ပြန်ဝယ်နေသော အခြေအနေမျိုးဖြစ်သည်။

အိန္ဒိယနှင့် အမေရိကန် ဆက်ဆံရေးတွင် အတည်မပြုရသေးသောဆေးဝါးများ ကိစ္စနှင့်ပတ်သက်၍ ထရမ့်၏ သံတမန် မဆန်သော တောင်းဆိုမှုများကြောင့် အဖုအထစ်များ ဖြစ်ပေါ်ခဲ့သော်လည်််း ပါကစ္စတန်နှင့် ပနံ သင့်လှသောတရုတ်သည် အိန္ဒိယနှင့် ဆက်ဆံရေးလမ်းကြောင်း ဖောက်နိုင်ရန် ခက်ခဲနေဦးမည် ဖြစ်သည်။ အိန္ဒိယ အနေဖြင့် အမေရိကန် ပြည် ထောင်စုနှင့် ခပ်ခွာခွာ နေရန် စိတ်ကူးရှိခဲ့လျှင်လည်း ရုရှားဆီသာ ပူးကပ်သွားစရာ အကြောင်း ရှိပါသည်။ တရုတ်နှင့် ပေါင်းမည် မဟုတ်ပါ။ သို့သော်လည်း ရုရှား၏ စီးပွားရေးလည်း တရှိန်ထိုး ကျဆင်းနေပြန်ရာ ကိုရိုနာဗိုင်းရပ်ကိုအကြောင်းပြု၍ အမေရိကန် - အိန္ဒိယဆက်ဆံရေးမှာ အက် ကြောင်းထင်လာတာကို ရုရှားက အမြတ်ဝင်ထုတ်နိုင်မည့်အခြေအနေ မရှိပြန်ပေ။

တဖက်တွင် ကိုရိုနာ ဗိုင်းရပ်စ်ကိုအကြောင်းပြု၍ အမေရိကန်နှင့်တချို့သော မဟာမိတ်များ (အထူးသဖြင့် အနောက် ဥရောပ နိုင်ငံများကြား) တွင် ဆက်ဆံရေး ပိုမို ကောင်းမွန်လာနိုင်သေးသည်။ ကိုရိုနာကပ်ဘေးတွင် ထရမ့်၏အမေရိကန်သာ ပထမ မူကို ဥရောပနိုင်ငံများက မနှစ်မြို့သော်လည်း နိုင်ငံအသီးသီး၏ လုပ်ပုံကိုင်ပုံမှာ ထူးမခြား နားပင် ဖြစ်သည်။ ဂျာမနီ၊ ပြင်သစ် အပါအဝင် တချို့သော ဥရောပနိုင်ငံများသည် ဥရောပတွင် နိုင်ငံနယ်နိမိတ်မရှိ၊ စျေးကွက်တခုတည်းဟုဆိုကြသော်လည်း ဆေးဝါးပစ္စည်းတင်ပို့မှုကို အစောပိုင်းတွင် ခေတ္တ ပိတ်ချခဲ့သေးသည်။ ဆွစ်ဇလန်အတွက် တရုတ်နိုင်ငံမှ နှာခေါင်းစည်းများတင်ပို့မှုကို ဂျာမနီက ကြားဝင်ဖမ်းဆီးသည့်ကိစ္စပင် ဖြစ်ခဲ့သေးသည်။

အကယ်၍ ကိုရိုနာဗိုင်းရပ်စ်ကူးစက်ရောဂါကြောင့် ပထဝီ နိုင်ငံရေးတွင် သက်ရောက်မှုရှိလာမည်ဆိုလျှင် ဤသို့မှန်းဆရပါသည်။ နိုင်ငံများသည် ကမ္ဘာသား၊ ကမ္ဘာ့ဝါဒအယူအဆကို ပိုပြီး သံသယရှိလာကာ၊ ငါ့နိုင် ငံ၊ ငါ့လူမျိုး အယူအဆ ပိုအားကောင်းနိုင်လာနိုင်ပါသည်။ သို့သော် ထိုသို့သောတိမ်းညွတ်မှုမျိုးသည် အမေရိကန် ခေါင်းဆောင်မှုအတွက် အဆိုးမဟုတ်ရုံမက ဖြောင့်ဖြောင့်ကြီး ဆန့်ကျင်ပါသည်။
အမေရိကန်ပြည်ထောင်စုသည် နေတိုးမဟာမိတ်များကို ကာကွယ်ရေးတာဝန်ပိုယူရန် တိုက်တွန်းနေသည်မှာ နှစ်ချီနေပါပြီ၊ ဥရောပ တခွင့်တွင် ကိုယ့်အားကိုယ်ကိုးလာကြလျှင် အမေရိကန်အတွက် ပို တန်ခိုးထွားလာဖို့သာ ဖြစ်ပါလိမ့်မည်။ အမျိုး သားရေးဝါဒ အားကောင်းလာခြင်း၊ သဟဇာတဖြစ်မှုအားနည်းသောဥရောပတွင် အီးယူက အမေရိကန်နှင့်အပြိုင်ဖြစ်မည့် မဟာဗျူဟာ ရည်မှန်းချက်များ နောက်ကိုလိုက်တော့မည်မဟုတ်ရာ အမေရိကန်၏ ဂလိုဘယ် ခေါင်းဆောင်မှုကို မြှင့်တင်ရာ ရောက်ပါသည်။

အီးယူထီးရိပ်အောက်မှာမဟုတ်ဘဲ ဥရောပ နိုင်ငံများ တသီးတခြားစီ ဆောင်ရွက်ကြလျှင်လည်း တရုတ်၊ ရုရှားတို့နှင့် ရွှေ လမ်းငွေလမ်းဖောက်ရန် ပို၍ပင်မဖြစ်နိုင်ပါ။ အီးယူ အဖွဲ့ အနေဖြင့် တစုတစည်းတည်းမဖြစ်လျှင် ဂျာမနီအနေဖြင့် ရုရှားနှင့် ဓာတ်ငွေ့ ဝယ်ယူရေး သဘောတူညီချက်အပါအဝင် တခြားသော သဘောတူညီချက်များ ရရှိရန် ကြိုးစားလာမည်။ ထို့အတူ အလယ်နှင့်အရှေ့ ဥရောပရှိနိုင်ငံများကလည်း သူတို့ နောက်ကျောတွင် ဥရောပသမဂ္ဂဆိုသောအဖွဲ့ကြီး၏အန္တရာယ်ကိုစိုးရိမ်စရာမရှိတော့လျှင် လောလောဆယ်မှာ တရုတ်ကို အင်အားနှင့် အာဏာချိန်ခွင်ထိန်းညှိရေး ကြိုးပမ်းမှု 17+1 initiative ကို ပြန်စဉ်းစားလာကြလိမ့်မည်။

အမေရိကန် အမြင်အရ ကုန်ကျစရိတ်အနည်းဆုံး၊ အထိရောက်ဆုံး ကမ္ဘာ ခေါင်းဆောင်မှုဆိုသည်မှာ ကိုယ့်အားကိုယ်ကိုးသောနိုင်ငံများကို အမေရိကန် ပြန်ကူညီပေးသောပုံစံသာ ဖြစ်ပါသည်။ ထိုသို့သော ကူညီမှုမျိုးသည် အရှေ့ အာရှတွင် ဂျပန် ၊ တောင်ကိုရီးယား၊ ထိုင်ဝမ် တို့နှင့် အမေရိကန်နှင့် နှုတ်ဆက်ပွေ့ဖက်ရုံ ဖြင့် မိမိကိုယ်ကို ကာကွယ်နိုင်စေရန် အပြန်အလှန် အားပေးသော မဟာမိတ်ဆက်ဆံရေးကို အောင်မြင်စွာတည်ဆောက်နိုင်ခြင်း၏လျှို့ဝှက်ချက် ဖြစ်ပါသည်။

ကိုရိုနာ ဗိုင်းရပ်စ်ကပ်ဘေးကို စစ်ပွဲဟု အမှန်တကယ်အဓိပ္ပါယ်ဖွင့်လျှင် စစ်ပွဲ အလွန်တွင် အမေရိကန်၏ ဂလိုဘယ်ခေါင်း ဆောင်မှုတွင် အပေါင်းလက္ခဏာဆောင်ဖို့သာ ဖြစ်နိုင်ပါသည်။ သို့သော် ထရမ့်သည် နိုင်ငံတကာ ဆက်ဆံရေးတွင် ထိုအချက်များအပေါ် အခြေမခံသော လမ်းကြောင်းကို ရွေးချယ်ထားပါသည်။ တကယ်တော့ တကမ္ဘာလုံးက လိုလား တောင့်တနေသော ကူညီမှုနှင့် ပူးပေါင်းဆောင်ရွက်မှု လမ်းကြောင်းကို ပို၍ အားကောင်းစေရန်သာ ရွေးချယ်ခဲ့သင့်ပါသည်။ မည်သို့ပင် ဆိုစေ အကြပ်အတည်းကြီးပြီးသွားသောအခါ အမေရိကန် ပြည်ထောင်စုသည် ကမ္ဘာကြီးတွင် ယခင်ထက် ပို၍ အဓိကကျတော့ နေရာသို့ ရောက်လာလိမ့်မည်။ တရုတ်အတွက် စိတ်အနှောင့်အယှက် ဖြစ်စေလိမ့်မည်။ သို့သော် တရုတ်နိုင်ငံအတွက်လည်း လွတ်လပ်၊ ပွင့်လင်းသောနိုင်ငံတကာ စနစ်မျိုးကို တခြား နိုင်ငံများလိုအပ်တာထက် ပို၍ လိုအပ်လာပါသည်။ ထိုသို့သော စနစ်မျိုးအတွက် အမေရိကန်၏ခေါင်းဆောင်မှုကသာ အာမခံနိုင်ပါသည်။
https://www.facebook.com/nethwin.nyein/posts/1008765862873835 ...မှ ယူပါသည်။