မောင်စွမ်းရည် - ပြန်လည်ထုတ်ဝေသင့်သည့် စာအုပ်များ (၁)

(မိုးမခ)အောက်တိုဘာ ၂၀၊ ၂၀၂၀

သခင်ကိုယ်တော်မှိုင်းနှင့် ကဗျာ — ရေးသူ မောင်ဟုန်ဝမ်

သခင်ကိုယ်တော်မှိုင်းရဲ့ ဘဝနှင့် စာပေဆိုင်ရာ စာအုပ်တွေဆိုရင် ဘာစာအုပ်မဆို ပြန်လည်ထုတ်ဝေသင့်တာ ချည်း ဖြစ်ပါတယ်။ ဆရာကြီးရဲ့ လေးချိုးပေါင်းချုပ် ကဗျာစာအုပ်တွေ၊ ဦးသိန်းဖေမြင့်၊ လူထုဒေါ်အမာ၊ ဝိဓူရသခင်ချစ်မောင် စတဲ့ ပုဂ္ဂိုလ်တွေ ရေးကြတဲ့ စာအုပ်တွေ။ ဒီနေ့ လူငယ်တွေဟာ ဆရာကြီးရဲ့ အတ္ထုပ္ပတ္တိ၊ ဆရာကြီးရဲ့စာပေများနဲ့ အလှမ်းဝေးနေကြဟန် ရှိပါတယ်။ ဒါ့ကြောင့် ဆရာကြီးရဲ့ အတ္ထုပ္ပတ္တိကို ရုပ်ပြ ရေးတာကစပြီး လူငယ်ဖတ်၊ လူကြီးဖတ် စာအုပ်မျိုးစုံ ပြန်ထုတ်သင့်ပါတယ်။

ဆရာကြီးသခင်ကိုယ်တော်မှိုင်း ဆိုတာ မြန်မာ့ခေတ်သစ် စာပေသမိုင်းမှာ ထိပ်ဆုံးက ရှိသကိုး။ ဦးနု၊ ဦးအောင်ဆန်းလို နိုင်ငံရေးသမားတွေအားလုံးရဲ့ ဖခင်ကြီးသဖွယ်လည်း ဖြစ်ပါတယ်။ ဒါပေမဲ့ ဆရာကြီးရဲ့ စာပေတွေက ရှေးဟန်နဲ့ ရေးထားတာတွေဖြစ်လို့ ခေတ်လူငယ်တွေ ရုတ်ခြည်း ဖတ်ရှု နားလည်လို့ လွယ်မယ် မဟုတ်ပါဘူး။ သူ့ခေတ်နဲ့ သူတော့ လူထုဟန် ဖြစ်ပါတယ်။

ဆရာကြီးရဲ့ခေတ်မှာ ဖိုးစိန်၊ စိန်ကတုံး၊ အောင်ဗလ စတဲ့ ဇာတ်မင်းသားတွေ ခေတ်စားပါတယ်။ သာမန်လူထု အသည်းစွဲ ဖြစ်ကြပြီး သူတို ဆိုကြတဲ့ တေးကဗျာတွေ၊ စာသားတွေကလည်း အများလူထု နားလည် ခံစားနိုင်ကြပါတယ်။ အထူးသဖြင့် ဆရာကြီး လက်စွဲပြု ရေးလေ့ရှိတဲ့ လေးချိုးကြီးတေွဟာဆိုရင် ရုပ်သေးစင်နဲ့ ဇာတ်စင်တွေပေါ်မှာ အထူးခေတ်စား တွင်ကျယ်ခဲ့တဲ့ သီချင်းတွေ ဖြစ်ပါတယ်။ ဆရာကြီးကလည်း အများ နားလည်အောင် ရည်ရွယ်ချက်နဲ့ သူ့ခေတ်မှာ ခေတ်စားတွင်ကျယ်နေတဲ့ လူထုကြိုက် လေးချိုး၊ ငိုချင်းတွေကို ကောက်ယူ သုံးစွဲခဲ့တာ ဖြစ်ပါတယ်။ ယောဂီရသေ့ကြီးအသွင်နဲ့ လေးချိုးကြီးတွေ ဆိုလိုက်၊ ဒကာမ ပရိသတ်နဲ့ ရှင်းပြ ပြောဆိုလိုက်၊ စကားဖန် တလှည့်၊ လေးချိုးကြီး တလှည့် ရေးခဲ့တာတွေ ဖြစ်ပါတယ်။ ဆရာကြီးရဲ့ လေးချိုးကြီးတွေဟာ သူ့ခေတ်နဲ့သူ စာဖတ်သူတွေ နားလည် ခံစားနိုင်ကြပေမယ့် ခုခေတ် လူငယ် စာဖတ်ပရိသတ်အတွက်တော့ နောက်ခံသမိုင်းနဲ့တကွ ကဗျာ ရှင်းလင်း ဖြေဆိုချက်တွေ ရေးဖို့ လိုပါတယ်။

ဆရာကြီးရဲ့ လေးချိုးကြီး ကဗျာတွေကို နှစ်သက် နားလည်ကြဖို့ရာမှာ ဆရာကြီးရဲ့ ခေတ်နောက်ခံ အကြောင်းအရာ၊ စီးပွားရေး၊ လူမှုရေး၊ နိုင်ငံရေး စတဲ့ အခြေအနေများကိုလည်း သိရှိနားလည်ဖို့ လိုပါတယ်။

နိုင်ငံရေးခေတ်အနေနဲ့ ပြောရရင် ဝိုင်အမ်ဘီအေ၊ ဂျီစီဘီအေ၊ ဝံသာနု နိုင်ငံရေးလှုပ်ရှားမှုခေတ်နဲ့ တို့ဗမာ အစည်းအရုံး၊ သခင်လှုပ်ရှားမှုခေတ်တွေအကြောင်းကို သိဖို့ လိုအပ်ပါတယ်။ ဝံသာနုခေတ်က ဖေ၊ ပုရှိန်တို့ ခေတ်ပေါ့။ သခင်ခေတ်ကတော့ သခင်နု၊ သခင်သိန်းဖေ၊ သခင်အောင်ဆန်း တို့ ခေတ်ပေါ့။ အဲဒီခေတ်နောက်ခံ တွေကို မသိဘဲ ဆရာကြီးရဲ့ စာပေတွေကို ကောင်းကောင်းသိရှိ ခံစားနိုင်ဖို့ မလွယ်ပါ။

ဆရာကြီးသခင်ကိုယ်တော်မှိုင်းရဲ့ အတ္ထုပ္ပတ္တိအကျယ် စာအုပ်တွေ ဖတ်ချင်ရင်တော့ ဆရာကြီးရဲ့ တပည့်ရင်းတွေ ရေးသားပြုစုထားတဲ့ စာအုပ်တွေ အများကြီး ရှိပါတယ်။ ဦးသိန်းဖေမြင့်၊ လူထုဒေါ်အမာ၊ သခင်ချစ်မောင်တို့ ရေးတဲ့ စာအုပ်တွေ ရှိပါတယ်။ ပြန်လည်ထုတ်ဝေပေးကြဖို့ လိုမယ် ထင်ပါတယ်။

ဆရာကြီးရဲ့ ကဗျာတွေကို ဖွင့်ဆိုတဲ့ စာအုပ်ကတော့ ရှားပါးလှပါတယ်။ ဒါပေမဲ့ မရှိတာတော့ မဟုတ်ပါ။ ဆရာဇော်ဂျီရဲ့ သခင်ကိုယ်တော်မှိုင်းဋီကာဟာ အစောဆုံးနဲ့ အကောင်းဆုံးစာအုပ် ဖြစ်ပါတယ်။ မကြာခင်က ထုတ်တဲ့ စာအုပ်တအုပ်ကို ကျွန်တော့်အနေနဲ့ အမေရိကကို ရောက်မှ ဖတ်ရှုခွင့် ရရှိပါတယ်။ မောင်ဟုန်ဝမ်(ကထိက) ရေးတဲ့ ‘သခင်ကိုယ်တော်မှိုင်းနှင့် ကဗျာ’ ဆိုတဲ့ စာအုပ် ဖြစ်ပါတယ်။ ၂၀၁၆ စက်တင်ဘာက ထုတ်တာ။

ဦးဟုန်ဝမ် အနေနဲ့ ဆရာဇော်ဂျီတို့ရဲ့ ကဗျာနဲ့ ဆရာမင်းသုဝဏ်တို့ရဲ့ ကဗျာတွေကို ဖွင့်ဆိုရေးသားခဲ့ဖူးပြီး ဖြစ်ပါတယ်။ စာအုပ်အဖြစ်လည်း ထုတ်ဝေခဲ့ဖူးပြီး ဖြစ်ပါတယ်။ ဒါပေမဲ့ ခု စာအုပ်ကတော့ စာအုပ်ထုတ်ဖို့ ရေးခဲ့တာ မဟုတ်ပါ။ သူ့ရဲ့ မဟာဝိဇ္ဇာဘွဲ့ယူကျမ်းအဖြစ် ပြုစုတာ ဖြစ်ပါတယ်။ ပြုစုပြီး ကြာမှ… ကြာဆို နှစ်ပေါင်း ငါးဆယ်ကျော်ကြာမှာ လူငယ် စာပေဝါသနာအိုးတဦးက သူ တည်ထောင်ထားတဲ့ စာအုပ်တိုက် (ပိတောက်ရနံ့ စာအုပ်တိုက်)က ထုတ်ဝေပါရစေ တောင်းဆိုလို့ ထုတ်ဖြစ်ခဲ့တာ ဖြစ်ပါတယ်။

၂၀၁၆ စက်တင်ဘာက ထုတ်ဝေခဲ့တာဆိုတော့ ခု ၂၀၂၀ စက်တင်ဘာဆိုရင် ၄ နှစ်တိတိပဲ ကြာပါသေးတယ်။ ကျွန်တော်က ၂၀၀၃ လောက်က ပြည်ပကို ထွက်ခဲ့တာဆိုတော့ မြန်မာစာပေလောကနဲ့ အဆက်ပြတ်နေတာ ကြာပါပြီ။ အထူးသဖြင့် စစ်အာဏာရှင်ခေတ် ကြားခံလိုက်တဲ့အခါ ဆရာကြီးမှိုင်း၊ ဗိုလ်ချုပ်အောင်ဆန်း စတဲ့ လွတ်လပ်ရေးဘိုးအေ၊ လွတ်လပ်ရေးဖခင်များရဲ့ စာအုပ်တွေတောင် လွတ်လွတ်လပ်လပ် ထုတ်ဝေ ဖတ်ရှုခွင့် မရခဲ့ပါ။ အထူးသဖြင့် ပြည်ပရောက်နေသူတွေအဖို့ ပိုဆိုးတာပေါ့။ ပြည်ပကို ရောက်ကြရတာလည်း ‘စစ်’ဘေးကြောင့် မဟုတ်လား။

ဦးဟုန်ဝမ်ကြောင့် ရေးသား ပြုစုတဲ့ သခင်ကိုယ်တော်မှိုင်းနဲ့ ကဗျာ ဆိုတာက အထက်မှာ ဖော်ပြခဲ့တဲ့အတိုင်း ကျမ်းစာအုပ်ပါ။ မဟာဝိဇ္ဇာဘွဲ့ယူဖို့ ရေးတဲ့ကျမ်းအဖြစ်လို့ ကျမ်းကြီးကျမ်းခိုင် ဂုဏ်ရည်နဲ့တူအောင် တခြား ကျမ်းစာအုပ်တွေ အများကြီးကို စာရင်းလုပ်ပြထားတာ အလွန်စုံလင်ပြီး အားရဖွယ် ဖြစ်ပါတယ်။ ကျမ်းပြုလိုက်တော့လည်း နိုင်ငံ့ရေးခေတ်၊ စာပေခေတ် ဆက်စပ်ပြီး လေ့လာပြုစုထားတာ ဖြစ်လို့ စာပေ လေ့လာလိုသူတွေအတွက် အထူးကောင်းမွန်တဲ့စာအုပ် ဖြစ်ပါတယ်။ ‘ကောင်းမွန်တယ်’ ဆိုတာက အတ္ထုပ္ပတ္တိပိုင်းကို အထူးရည်ညွှန်းလိုပါတယ်။ သခင်ကိုယ်တော်မှိုင်း အတ္ထုပ္ပတ္တိစာအုပ် တအုပ်လို့ပဲ ဆိုရပါလိမ့်မယ်။ ဘာဖြစ်လို့လဲဆိုတော့ ကဗျာအဖွင့်ရေးတဲ့ အပိုင်းက နည်းလွန်း၊ တိုလွန်းတယ်လို့ ဆိုချင်ပါတယ်။ အတ္ထုပ္ပတ္တိ လေ့လာ ရေးသားရတာနဲ့ပဲ အားကုန်သွားခဲ့ရသလို ဖြစ်နေပါတယ်။

ဆရာကြီးရဲ့ လေးချိုးကြီးတွေဟာ သူ့ခေတ်နဲ့သူ လူ နားလည်အောင် ရေးထားတာ ဖြစ်ပေမဲ့ ခုခေတ် လူငယ်များအဖို့တော့ ဝေါဟာရတလုံးစီ ခက်ဆစ်အဓိပ္ပာယ် ဖွင့်ဆိုပေးရမှာတွေကိုက အများကြီး ပါရှိပါတယ်။ တချို့ စကားလုံးက လုံးကောက်အဓိပ္ပာယ်သာမက ခေတ်နောက်ခံနဲ့ပါ ရှင်းမှ နားလည်မှာပါ။ ဥပမာ ဆိုပါစို့…

မှိုင်းဆရာ တပသ

တိုင်းက နှိုင်းက ပြလိုက်ချင်ရဲ့

ဗိုင်းတာမ ကံဆိုးတွေ….

ဒါလေးပဲ ကြည့်။

‘တပသ’ ဆိုတာ သူ့ကိုယ်သူ ရသေ့ကြီးလို့ ပြောဆိုတာပေါ့။

‘တိုင်းက နှိုင်းကာ ပြလိုက်ချင်ရဲ့’ ဆိုတာ တိုင်းထွာပြီး ဆဲရေးလိုက်ချင်တယ်လို့ ကရုဏာဒေါသော ပြောဆိုတာပါပဲ။

‘ဗိုင်းတာမ’ ဆိုတာ ဆဲတဲ့ စကား။ ခုခေတ် အသုံးနည်းနေပါပြီ။

အဲဒါတွေကို ဖွင့်ဆိုရမှာပါ။

နိုင်ငံရေး စကားလုံးတွေ၊ သမိုင်းဝေါဟာရတွေကလည်း အများကြီးပါ။ ဒါတွေ ရှင်းလင်းအောင် ခက်ဆစ်ပေးရမယ် ဆိုရင် အသေးစိတ် လုပ်ရတော့မှာပါ။ ခုစာအုပ်မှာ ဝေါဟာရ ဖွင့်တာရော၊ ကဗျာဖွင့်တာရော နည်းပါတယ်။ ဒါပေမဲ့ အရှေ့ပိုင်းက အတ္ထုပ္ပတ္တိက စာပေလေ့လာရေးအတွက် ခေတ်နောက်ခံ လေ့လာဖို့ အလွန်အသုံးဝင်ပါတယ်။ မဖတ် မဖြစ် ဖတ်ရမှာပါ။

လူထုဦးလှ၊ ဗန်းမော်တင်အောင်၊ သခင်ချစ်မောင်၊ လူထုဒေါ်အမာ စတဲ့ တပည့်ရင်းချာများက ‘ဆရာကြီးရဲ့ သမိုင်းက မြန်မာနိုင်ငံရဲ့ သမိုင်းပါပဲ’လို့ ဆိုခဲ့ကြပါတယ်။

ဦးဟုန်ဝမ်က ဒီသဘောကို ဆိုက်တာပါပဲ။ ခေတ်သမိုင်းကို လေ့လာတာဟာ ဆရာကြီးရဲ့ အတ္ထုပ္ပတ္တိကို လေ့လာတာနဲ့ အတူတူပါပဲ။ ခေတ်လူငယ်များအနေနဲ့ ခေတ်သမိုင်း၊ ခေတ်စာပေကို လေ့လာကြဖို့ တာဝန်ရှိပါတယ်။ ခေတ်သမိုင်း ခေတ်စာပေကို လေ့လာရင် ဆရာကြီးသခင်ကိုယ်တော်မှိုင်းရဲ့ အတ္ထုပ္ပတ္တိနဲ့ စာပေတို့ကို လေ့လာရမှာပဲ ဖြစ်ပါတယ်။

အထက်မှာ ဖော်ပြခဲ့တဲ့ ဦးသိန်းဖေမြင့်၊ ဝိဓူရသခင်ချစ်မောင်၊ လူထုဒေါ်အမာ၊ ဆရာဇော်ဂျီ တို့ရဲ့ စာအုပ်တွေနဲ့ အတူ ဦးဟုန်ဝမ်ရဲ့ စာအုပ်ကိုပါ ပူးတွဲလေ့လာသင့်လှပါတယ်။

ဦးဟုန်ဝမ်ရဲ့ စာအုပ်ကိုလည်း ပိတောက်ရနံ့စာအုပ်တိုက်က အဆက်မပြတ် ပြန်လည်ထုတ်ဝေပေးသင့်ပါ ကြောင်း တိုက်တွန်းလိုက်ပါရစေ။



မောင်စွမ်းရည်

၂၅ စက်တင်ဘာ ၂၀၂၀

နယူးယောက်