တရုတ်နိုင်ငံဘက်ကလာတဲ့ သတိပေးစာနဲ့ ဖိအားပိုကြီးလာတဲ့ တရုတ်ရဲ့ ဖိအား

မြန်မာနွေဦး ခရိုနီကယ် - သြဂုတ် ၃၀ မြင်ကွင်း

(မိုးမခ) ဩဂုတ် ၃၁၊ ၂၀၂၄ 

တရုတ်နိုင်ငံဘက်ကလာတဲ့ သတိပေးစာနဲ့ ဖိအားပိုကြီးလာတဲ့ တရုတ်ရဲ့ ဖိအား

သြဂုတ်လ ၂၉ ရက်နေ့စွဲတပ်ထားတဲ့ ရွှေလီမြို့ လုံခြုံရေးကော်မတီ ရဲ့ TNLA လက်နက်ကိုင် အဖွဲ့ဆီ ပေးပို့တဲ့စာက နောက်တနေ့မှာပဲ ရှမ်းမြောက် တအန်းတိုင်းရင်းသားမီဒီယာတခုဖြစ်တဲ့ ရွှေဖီမြေမှာ စတင်ဖော်ပြခဲ့ပြီး နာရီပိုင်းအတွင်းမှာ အခြားသော သတင်းမီဒီယာတွေကလည်း ဖော်ပြခဲ့ကြပါတယ်။ 

“စစ်ရေးလေ့ကျင့်မှု အကြောင်းကြားကြော်ငြာချက်”  လို့ ခေါင်းစဥ်တပ်ထားတဲ့ စာမှာ “တရုတ်နိုင်ငံဘက်မှာ စစ်ရေးလေ့ကျင့်မှု ပြီးဆုံးတော့မည် ဖြစ်ပြီး မြန်မာတအာင်း အမျိုးသားလွတ်မြောက်ရေး တပ်မတော်သည် တိုက်ပွဲများကို ချက်ချင်း ရပ်တန့်ကာ မြန်မာပြည်မြောက်ပိုင်းနှင့် တရုတ်နယ်စပ်ဒေသများတွင် အေးချမ်းတည်ငြိမ်မှုကို ထိန်းသိမ်းရန် တရုတ်နိုင်ငံနှင့် ပူးပေါင်းဆောင်ရွက်သွားမည် ဟု မျှော်လင့်ပါသည်” လို့ အစချီထားတဲ့ စာဟာ မြန်မာနိုင်ငံနဲ့ နယ်နိမိတ်ထိစပ်နေတဲ့ တရုတ်နိုင်ငံထဲက စစ်ရေးလေ့ကျင့်မှု ပြီးဆုံးမယ့် အကြောင်းကို ဆက်စပ်ဖော်ပြကာ စစ်ရေးအင်အားကို သတိပြုစေလိုတဲ့ ရည်ရွယ်ချက်နဲ့ ထည့်သွင်းထားတာလို့လည်း အဓိပ္ပာယ်ကောက်ယူလို့ ရနိုင်ပါတယ်။ 

နောက်စာပိုဒ်မှာတော့ “တရုတ်နယ်စပ်ဒေသ၊ နယ်စပ် အရပ်သူအရပ်သားများနှင့် မြန်မာပြည်တွင်းရှိ တရုတ်ပြည်သားများ၊ လုပ်ငန်းများနှင့် သက်ဆိုင်သော လုံခြုံမှုများကို အာမခံပေးရန်၊ တရုတ်နယ်စပ်ဒေသက အေးချမ်းတည်ငြိမ်ရေးနှင့် တရုတ်နိုင်ငံသား အသက်၊ ပစ္စည်း၊ ဥစ္စာ လုံခြုံရေးကို ထိခိုက်စေပြီး အန္တရာယ်ရှိ စစ်ရေးအပြုအမူကို ပပျောက်အောင် ဆောင်ရွက်ရမည်” လို့ ဖော်ပြထားရာမှာ နယ်စပ်ဒေသဖြစ်တဲ့ ရွှေလီဘက်အခြမ်း၊ မူဆယ်ဘက်အခြမ်းတို့လို နယ်စပ်တင်မကပဲ မြန်မာနိုင်ငံထဲက တရုတ်နိုင်ငံသားနဲ့ တရုတ်နိုင်ငံ ရင်းနှီးမြှုပ်နှံမှုတွေနဲ့ ပတ်သက်တာကိုပါ ရည်ညွှန်းထားတာလို့ နားလည်နိုင်ပါတယ်။ 

ရွှေလီမြို့ လုံခြုံရေးကောင်စီ အနေနဲ့ အခုလို မြန်မာနိုင်ငံတွင်းက အခြားသော တရုတ်နိုင်ငံရဲ့ အကျိုးစီးပွားတွေကိုပါ ရည်ညွှန်းထားတာကို ကြည့်ရင် ဒီစာက ရွှေလီမြို့လုံခြုံရေး ကော်မတီရဲ့ သဘောထား ဆိုတာထက် ဗဟိုချုပ်ကိုင်မှု အပြည့်အဝရှိတဲ့ တရုတ်ပြည် ဗဟိုအစိုးရရဲ့ အသံ၊ ပြောချင်တဲ့ သတင်းစကားကို ထည့်သွင်းထားတဲ့ သဘောလို့ ကောက်ချက်ချနိုင်ပါလိမ့်မယ်။ တအန်းအမျိုးသား လွတ်မြောက်ရေး လက်နက်ကိုင်အဖွဲ့ကို တရုတ်ဗဟိုအစိုးရ အနေနဲ့ တိုက်ရိုက်ဆက်ဆံပြောဆိုတဲ့ ပရိုတိုကောလ်မျိုးကို မသုံးလိုတဲ့ ရည်ရွယ်ချက်နဲ့ ဒေသန္တရ အုပ်ချုပ်ရေး ကော်မတီတခုရဲ့ အနေအထားကို ယူပြီး TNLA ကို သတိပေးတာလားလို့လည်း ယူဆမယ်ဆို ယူဆစရာ ဖြစ်ပါတယ်။ ဒီသတိပေးချက်ထဲမှာ သဘောပေါက် နားလည်ရတဲ့ အချက်တွေကတော့ နယ်စပ်က အကျိုးစီးပွားတွေသာမကပဲ ရှမ်းမြောက်ကနေ ထိစပ်နေတဲ့ မန္တလေးတိုင်း စစ်ကိုင်းအစပ်ဧရိယာတွေ အထိ PDF တွေနဲ့ တွဲဖက်လှုပ်ရှားနေတဲ့ မိုးကုတ်၊ နောင်ချို တို့လိုဒေသတွေက တိုက်ပွဲတွေ အထိ ရည်ညွှန်းပြောဆိုထားတယ်ဆိုတဲ့ အချက်ပါ။ မန္တလေးတိုင်း၊ ပုသိမ်ကြီးမြို့နယ်ထဲက အယ်လ်ဖာ ဘိလပ်မြေစက်ရုံလိုမျိုး၊ ရှမ်းမြောက်ဒေသက ရေနံနဲ့ သဘာဝဓာတ်ငွေ့ ပိုက်လိုင်းတွေ ဖြတ်သန်းရာတွေ နဲ့ ပတ်သက်လို့လည်း ရည်ညွှန်းထားတာလို့ နားလည်နိုင်ပါတယ်။ ခုနှစ် ဇန်နဝါရီလမှာ သဘောတူထားခဲ့တဲ့ ဟိုင်ဂင် သဘောတူညီချက်လိုမျိုးက နယ်စပ်ဒေသမဟုတ်တဲ့ ရှမ်းမြောက်နဲ့ ထိစပ်နေတဲ့ မန္တလေးတိုင်းရဲ့ နယ်မြေတွေ မပါဝင်ဘူးလို့ TNLA အနေနဲ့ အဓိပ္ပာယ်ကောက် ယူဆပြီး ဒုတိယအကျော့ စစ်ဆင်ရေးတွေ လုပ်ဆောင်ခဲ့တာမျိုး ဖြစ်ကောင်းလည်း ဖြစ်ပါလိမ့်မယ်။ 

အခု သတိပေးစာမှာတော့ မြန်မာနိုင်ငံအတွင်းဘက်က တိုက်ပွဲတွေကိုပါ ရပ်တန့်ဖို့ ရည်ညွှန်းပြောဆိုလာတဲ့ သဘောဖြစ်ပြီး တဖက်က ကြည့်ရင် မြန်မာနိုင်ငံရဲ့ အချုပ်အချာအာဏာနယ်မြေထဲက တိုက်ပွဲတွေကို ရပ်တန့်ဖို့ သတိပေးခြင်းက ဝင်ရောက်စွက်ဖက်တဲ့ သဘောမျိုးလည်း ပါဝင်နေတဲ့ သဘောပါ။ 

အဲဒီသတိပေးချက်နောက်မှာ ဆက်လက်ရေးသားတဲ့ “တရုတ်ဘက်သည် ကြောက်ရွံ့ကျိုးနွံနှင့် ဆုံးမသွန်သင်နည်းလမ်းများကို ပိုမိုလုပ်ဆောင်မည်” စကားလုံးက ဘာသာပြန်တဲ့ စကားလုံးရွေးချယ်မှု မဆီလျော်ခြင်း သို့မဟုတ် မူရင်း တရုတ်ဘာသာမှာသည်ပင်လျှင် အခုလို ခြိမ်းခြောက်မှု စကားလုံးတွေကို သုံးစွဲထားသလား ဆိုတာ မရှင်းလင်းပါဘူး။ ဖြစ်ပေါ်လာတဲ့ အကျိုးဆက်တွေကို သင်တို့ ကိုယ်တိုင် တာဝန်ယူရမည်လို့လည်း ပြင်းထန်တဲ့ သတိပေးစကားကို ဆက်လက်ကြည့်ခြင်းအားဖြင့် အခုစာရဲ့ သဘောထားက ပြင်းပြင်းထန်ထန် သတိပေးခြင်း ၊ သံတမန် မဆန်ခြင်းကို ထင်ထင်ရှားရှား တွေ့နိုင်ပါတယ်။ 

စာရဲ့ အဆုံးသတ်အပိုင်းမှာတော့ ငြိမ်းချမ်းရေးမြှင့်တင်ရန် ကြိုးပမ်းမှုမြှင့်တင်ဖို့ ဆိုတဲ့ စကားလုံးနဲ့ တရုတ်က မြန်မာနိုင်ငံ မြောက်ပိုင်း ငြိမ်းချမ်းရေးလုပ်ငန်းစဥ်ကို ကူညီပြီး သင်တို့အတွက် သင့်လျော် တရားဝင် အခွင့်အရေးများနှင့် အကျိုးစီးပွားများကို ရရှိစေရန် ကူညီရမည် ဖြစ်ပြီး ဘယ်နေရာ ဘယ်ဒေသရောက်ရောက် တရုတ်ဘက်သည် စောင့်မျှော်ကြည့်ရှုရမည် ဖြစ်သည် ဆိုတဲ့ စကားလုံးနဲ့ အဆုံးသတ်ထားတာ တွေ့ရပါတယ်။ 

စာက တရုတ်ဘာသာနဲ့ နကိုမူလဖြစ်ပြီး မြန်မာဘာသာနဲ့ ပြန်ဆိုထားတဲ့ ဘာသာပြန်စာလည်း ရှေ့နောက်ဆိုသလို ထွက်ပေါ်လာခဲ့ရာမှာ အချို့သော နိုင်ငံရေးသမားတွေက ဒီစာဟာ အစစ်မဟုတ်နိုင်ဘူးလို့ သံသယရှိခဲ့ကြတာ ဖြစ်ပါတယ်။  သို့ပေမယ့် စာက အစစ်ဖြစ်ကြောင်းကို TNLA ရဲ့ ခေါင်းဆောင်တွေနဲ့ ပြောရေးဆိုခွင့်ရှိသူတွေက သတင်းမီဒီယာအချို့ကို အတည်ပြုခဲ့ကြပါတယ်။ 

ဒုတိယ အကျော့ ၁၀၂၇ စစ်ဆင်ရေး အပေါ် တရုတ်နိုင်ငံရဲ့ ဘဝင်မကျဖြစ်မှု မကျေနပ်မှုက ဒီစာမှာ ထင်ထင်ရှားရှား ဖေါ်ပြလာတာ ဖြစ်ပါတယ်။ ဒါ့အပြင် မကြာသေးခင်က ကျင်းပခဲ့တဲ့ တရုတ်နိုင်ငံခြားရေး ဝန်ကြီးရဲ့  စကစ ခေါင်းဆောင်ဆီ လာရောက်ခဲ့တဲ့ ခရီးစဥ်၊ မဲခေါင်-လန်ချန်း အစည်းအဝေး အပြီး မြန်မာ၊ ထိုင်း၊ လာအိုနိုင်ငံခြားရေး ဝန်ကြီးတို့နဲ့ တွေ့ဆုံမှုတို့ကလည်း မြန်မာ့အရေးနဲ့ ပတ်သက်ပြီး တရုတ်ရဲ့  ရပ်တည်ချက်၊ မောင်းနှင်လိုတဲ့ လမ်းကြောင်းတွေကို ပုံဖော်ဖို့ ကြိုးစားလာတယ်လို့ ကောက်ချက်ချနိုင်ပြီး ရှမ်းမြောက်ဒေသက တိုင်းရင်းသား လက်နက်ကိုင်တွေ အနေနဲ့ တရုတ်နိုင်ငံရဲ့ အခန်းကဏ္ဍကို ပြန်လည်သုံးသပ်ဖို့ အရေးကြီးလာပြီ ဖြစ်ပါတယ်။

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar