ဒေါက်တာခင်မောင်ဝင်း(သင်္ချာ) ဘာသာပြန် - Death and the Senator - လွှတ်တော်အမတ်ကြီးနှင့် သေခြင်းတရား

(မိုးမခ) ဇန်န၀ါရီ ၁၀၊ ၂၀၂၀

Arthur C. Clarke (1917-2008) - Tales of Ten World — ဆယ်ကမ္ဘာ ဝတ္ထုများမှ

လွှတ်တော်အမတ်ကြီး စတီ(လ်)မင် (Stealman) သည် မကြာမီ သေရတော့မည် ဖြစ်သည်။ ဆရာဝန်က သူ့ရောဂါ အခြေအနေနှင့် ပတ်သက်၍ ပြောကြားချက်အရ သူသည် နောက်ထပ် ခြောက်လသာ နေရတော့မည် ဖြစ်သည်။ သူသည် နောက်ရွေးကောက်ပွဲတွင် အမေရိကန် သမ္မတ ဖြစ်ဖို့ မှန်းထားသည်။ သို့သော် ယခုတော့ သူ့အတွက် မျှော်လင့်ချက် မရှိတော့ချေ။

သူသည် ကားဖြင့် နေပြည်တော်မှ ပြန်လာစဉ် စဉ်စားနေသည်။ သူသည် သေခြင်းအကြောင်းကို မစဉ်းစားဘဲနေရန် ကြိုးစားသည်။ သူ သေသွားလျှင် ဘယ်သူတွေ သူ့ကို သတိရနေကြမည် နည်း။ သူ့အတွက် ဘယ်သူက ဝမ်းနည်းနေမည်နည်း။ သူ့မှာ နိုင်ငံရေးအရ ပြိုင်ဘက်များစွာ ရှိ သည်။ သူ့တို့ကတော့ သူ သေသွားလျှင် ဝမ်းနည်းမည် မဟုတ်ပါ။ သူ့မိသားစုကော၊ ဘယ်လိုနေ ကြမည်နည်း။ သူ့မြေးများကို နောက်ဆုံး ဘယ်တုန်းက တွေ့ခဲ့သနည်း။ သူ့မြေးများအတွက် တခုခုတော့ လုပ်ပေးမှ ဖြစ်မည်။

သူသည် မော်တော်ကားထဲရှိ တယ်လီဖုန်းကို ကောက်ကိုင်လိုက်သည်။ ပြီး သူ့သမီး အိုင်ရင်း (Irene) ထံသို့ ဆက်လိုက်သည်။ သူ့သမီးသည် တော်တော်အံ့ဩသွားသည်။

“သမီးရေ… ဖေဖေပါ။ မနက်ဖြန်ကျရင် မင်း က‌ေးလတွေကို ဖေဖေ လာခေါ်ချင်တယ်။ သူတို့ ကို ပြတိုက် ခေါ်သွားချင်လို့ပါ”

အိုင်ရင်းသည် ပို၍အံ့ဩသွားသည်။ သို့သော် အံ့ဩသည့်စိတ်ထက် ပျော်သည့်စိတ်က ပို၍များပါ သည်။

နောက်နေ့တွင် စတီ(လ်)မင်သည် သူ့မြေးနှစ်ယောက် ဖြစ်သော စူစန် (Susan) နှင့် ဂျိုဝီ (Joey) တို့ကို ပြတိုက်သို့ ခေါ်သွားသည်။

ကလေးနှစ်ယောက်သည် တော်တော်ပျော်ကြသည်။ မေးခွန်းတွေလည်း မေးကြသည်။ စတီ(လ်)မင်သည် မေးခွန်းအချို့ကိုသာ ဖြေနိုင်ပါသည်။ သူ မဖြေတတ်သော မေးခွန်းများကို သူ်စိတ်ကူးဖြင့် လျှောက်ဖြေသည်။ သူတို့သည် ကမ္ဘာ့ရှေးဟောင်းရုပ်ကြွင်းများကို ကြည့်နေကြ သည်။ သူတို့ ကြည့်နေသော အရာမှာ လွန်ခဲ့သော နှစ်ပေါင်း သန်းပေါင်းများစွာက ကမ္ဘာပေါ် တွင် ရှိခဲ့သော သတ္တဝါကြီးတကောင်၏ အရိုးစုများ ဖြစ်သည်။ ဒီသတ္တဝါကြီးတွေဟာ တချိန်က ဒီကမ္ဘာပေါ်မှာ မင်းမူခဲ့ကြတာပဲ။ အခုတော့ သူတို့တွေဟာ အရိုးပဲ ကျန်တော့တယ်ဟု တွေးရင်း စတီ(လ်)မင်သည် သူ့အဖြစ်ကို စဉ်းစားနေမိသည်။ သူဟာ တကယ်တော့ ဒီကမ္ဘာကြီးထဲကို ခဏ ရောက်လာပြီး အချိန်တန်တော့ ထွက်သွားရတဲ့ သတ္တဝါတခုပါပဲလား။ ရုပ်ပိုင်းဆိုင်ရာ သက်သက် ကြည့်လိုက်လျှင် သူဟာ ဒိုင်နိုဆော သတ္တဝါကြီးတွေနဲ့စာလျှင် သေးသေးလေးပဲ။

နောက်နေ့တွင် စတီ(လ်)မင်သည် သူ့ရုံးခန်းသို့ သွားသည်။ သူ့မှာ လက်စသတ်စရာ အလုပ်များ ရှိသည်။ နှစ်ပတ်ကြာသော် သူ့ဇနီးထံသို့ ဖုန်းဆက်သည်။ သူ့ဇနီးသည် ရောမမြို့တွင် ရှိနေသည်။ သူ့ဇနီး၏ မျက်နှာကို ရုပ်မြင်ဖန်သားပေါ်တွင် တွေ့လိုက်သည်။ သူသည် သူ့ဇနီးကို ကိုယ်တိုင် တွေ့ချင်စိတ်များ ပေါ်လာသည်။

သူ့ဇနီးကို ဆရာဝန် ပြောသည့်စကားများ ပြောပြလိုက်သောအခါ စိတ်တော်တော်ထိခိုက်သွား သည်။ ခဏလောက် ငြိမ်နေပြီး သူ့ဇနီးက ပြောလိုက်သည်။

“အခုချက်ချင်း လာခဲ့မယ်”

ဤစကားများကို ကြားလိုက်သောအခါ စတီ(လ်)မင်သည် တော်တော်ဝမ်းသာသွားသည်။

သူ့ဇနီးနှင့် သမီးတို့သည် ထိုအချိန်မှစ၍ မြေးများ ဖြစ်ကြသော ဂျိုဝီနှင့် စူစန်တို့ကို နေ့စဉ်နီးပါး သူ့ထံသို့ ခေါ်လာကြသည်။ သူသည် သူ့မြေးများနှင့်အတူ အနားယူခရီးထွက်ရန် ကြံစည်ထား သည်။ သို့သော် အလုပ်များ မပြတ်သေး၍ မသွားဖြစ်ပါ။ နေ့စဉ် နေ့တိုင်း သူ့ကို ဧည့်သည်များ မပြတ် လာတွေ့နေကြသည်။

တနေ့တွင် အထူးဧည့်သည်တယောက် သူ့ထံ ရောက်လာသည်။ ထိုသူမှာ ဒေါက်တာဟပ်နက် (Dr. Harkness) ဖြစ်သည်။ သူသည် အရပ်ရှည်ရှည်၊ ပိန်ပိန်ပါးပါး ဖြစ်သည်။ စတီ(လ်)မင်သည် ဒေါက်တာဟပ်နက်ကို ရုံးခန်းသို့ ဖိတ်ခေါ်လိုက်သည်။

“ထိုင်ပါ ခင်ဗျာ။ ဆရာ့ကို တွေ့တာ တော်တော်အံ့ဩမိပါတယ်”

ဟု စတီ(လ်)မင်က စကားစလိုက်သည်။ သူသည် ဒေါက်တာဟပ်နက်နှင့် လွန်ခဲ့သော နှစ် အနည်းငယ်က တွေ့ဖူးသည်။ ထိုအချိန်က ဒေါက်တာဟပ်နက်သည် သူ့ထံမှ ဆေးသိပ္ပံဆိုင်ရာ သုတေသနလုပ်ရန်အတွက် ဘတ်ဂျက်ငွေ ချပေးရန် လာရောက်တောင်းခံခြင်း ဖြစ်သည်။ ထိုနေ့ က စတီ(လ်)မင်သည် သူ တောင်းခံခြင်းကို ငြင်းပယ်ခဲ့သည်။

စတီ(လ်)မင်သည် ဒေါက်တာဟပ်နက်ကို လှမ်းကြည့်ရင်း စဉ်းစားနေသည်။ သူ ဘာကြောင့် လာပါလိမ့်။

ဒေါက်တာဟပ်နက်သည် စတီ(လ်)မင်ကို သိပ္ပံဂျာနယ်တခုထဲမှ ဆောင်းပါးတပုဒ်ကို ပြလိုက် သည်။ ထိုဆောင်းပါးမှာ ရုရှား ဆေးသိပ္ပံဂျာနယ် (Journal of Space Medicine) အာကာသ ဆေးပညာဂျာနယ်ထဲ၌ ရုရှားဘာသာဖြင့် ရေးထားခြင်း ဖြစ်သည်။

စတီ(လ်)မင်က– “ကျွန်တော်က ရုရှားလို မဖတ်တတ်တော့ ခင်ဗျားပဲ ပြောပြပါ” ဟု ပြောလိုက် သည်။

“အကြောင်းအရာကတော့ ရုရှား စက်တယ်လိုက်ဆေးရုံအကြောင်း ဖြစ်ပါတယ်” ဟု အစချီ၍ ဤသို့ ရှင်းပြသည်။

“ရုရှားနိုင်ငံက ဆရာဝန်တွေက နှလုံးရောဂါကုထုံးအသစ်တခု တွေ့ထားတယ်လို့ ယုံကြည်ကြပါ တယ်။ သူတို့ရဲ့ ကုထုံးမှာ အရေးပါတဲ့ အကြောင်းအရာတခုက ဆေးရုံကို အာကာသထဲမှာ တည်ဆောက်ဖို့ ဖြစ်ပါတယ်။ ကမ္ဘာပေါ်မှာဆိုရင် သက်ရှိသတ္တဝါတွေရဲ့ ကိုယ်ခန္ဓာ အစိတ်အပိုင်း၊ ကြွက်သားတွေဟာ ကမ္ဘာ့ဆွဲငင်အားကို အမြဲတမ်း တွန်းလှန်တဲ့အလုပ်ကို လုပ်နေရပါတယ်။ ဒါပေမဲ့ အာကာသထဲကို ရောက်သွားရင် အဲဒီအလုပ်ဟာ လျော့သွားပါတယ်။ နှလုံးသားရဲ့ ကြွက်သားတွေဟာ အာကာသထဲကို ရောက်သွားရင် အလုပ်လုပ်ရတာ တော်တော် သက်သာသွားပါတယ်။ အဲဒီအခါမှာ နှလုံးသားနဲ့ ပတ်သက်တဲ့ ရောဂါတေွကို ကုရာမှာ ပိုပြီး ထိရောက်နိုင်ပါတယ်”

စတီ(လ်)မင်သည် လွန်ခဲ့သောနှစ် အနည်းငယ်က ဒေါက်တာဟပ်နက်နှင့် တွေ့ခဲ့သော အဖြစ် အပျက်ကို ပြန်လည်၍ စဉ်းစားနေမိသည်။ သူသည် ဒေါက်တာဟပ်နက်၏ အာကာသ ဆေး ပညာဆိုင်ရာ သုတေသနကို ပယ်ချခဲ့သည်။ အစည်းအဝေးတွင် ဒေါက်တာဟပ်နက်ကို သူ ဤသို့ မေးခွန်းထုတ်ခဲ့သည်။

“ဒေါက်တာဟပ်နက်… ခင်ဗျားရဲ့သုတေသနလုပ်ငန်းအတွက် အာကာသထဲကို လူတွေအများ ကြီး လွှတ်ရမှာ ဖြစ်ပါတယ်။ ဒီအတွက် ငွေတွေအများကြီး ကုန်ကျမှာ ဖြစ်ပါတယ်။ ဒါသာမက သေးဘူး၊ လူတွေ အများကြီးကို အာကာသထဲ လွှတ်တဲ့ဆီမှာ အန္တရာယ်ကလည်း များပါတယ်။ ဒီလောက် ငွေကုန်ကြေးကျလည်း များ၊ အန္တရာယ်လည်း များတဲ့ အလုပ်ကို ခင်ဗျား ဘာကြောင့် လုပ်ချင်တာလဲ”

ဒေါက်တာဟပ်နက်သည် သူ၏ စီမံကိန်းကို ရှင်းပြခဲ့သည်။ အာကာသဆေးပညာသည် မဖွံ့ဖြိုး သေးသော နယ်ပယ်တခု ဖြစ်သည်။ အာကာသထဲတွင် လူသည် ကမ္ဘာ့ဆွဲငင်အားဒဏ်မှ ကင်းရှင်းသည်။ ထိုအချိန်တွင် ကမ္ဘာပေါ်၌ မထိရောက်သော ဆေးကုထုံးတို့သည် ထိရောက်မှ ရှိသွားနိုင်သည်။ သို့သော် ဒေါက်တာဟပ်နက်သည် စတီ(လ်)မင်ကို ရှင်းပြရာတွင် ချို့ယွင်းချက် များ ရှိသွားသောကြောင့်လားတော့ မသိပါ။ စတီ(လ်)မင်အနေဖြင့် အာကာသဆေးပညာအပေါ် ယုံကြည်မှုရှိလာအောင် မဆွဲဆောင်နိုင်ခဲ့ပါ။ အချုပ်ပြောရလျှင် စတီ(လ်)မင်သည် ဒေါက်တာ ဟပ်နက်၏ သုတေသနအစီအစဉ်ကို ပယ်ချခဲ့သည်။ အမေရိကန်အစိုးရထံမှ ‌ငွေ လုံးဝမရသဖြင့် ဒေါက်တာဟပ်နက်၏ သုတေသနအစီအစဉ်များမှာလည်း ပျက်စီးခဲ့ရသည်။

ယခုအခါ ဒေါက်တာဟပ်နက်သည် သူ၏ အစီအစဉ်များကို ပြန်လည်အသက်သွင်းချင်ပုံရသည်။ သို့သော် စတီ(လ်)မင်အနေဖြင့် ယခုလည်း လက်မခံနိုင်ပါ။ ထို့ကြောင့် ဤသို့ ပြောလိုက်သည်။

“ဒီအကြောင်းတွေကို အချိန်ကုန်ခံပြီး ပြောမနေပါနဲ့ဗျာ။ ကျွန်တော့်ကိုလည်း မျှော်လင့်ချက် ပေးမနေပါနဲ့။ အေးအေးဆေးဆေးပဲ သေပါရစေ”

ဒေါက်တာဟပ်နက်က– “အခုကိစ္စမှာ ကျွန်တော်က ငွေတောင်းဖို့ လာတာ မဟုတ်ပါဘူး။ ဒီ နယ်ပယ်မှာ ရုရှားနိုင်ငံက တော်တော်ရှေ့ရောက်နေပြီ ဆိုတာကို သတင်းပေးချင်လို့ရယ်၊ နောက်ပြီး သူတို့က ခင်ဗျားကို အခမဲ့ ကုပေးဖို့ ကမ်းလှမ်းလာတဲ့အကြောင်း ပြောချင်လို့ပါ”

နောက်ဆုံး အချုပ်ပြောရလျှင် စတီ(လ်)မင်သည် ရုရှားနိုင်ငံသို့ သွားခဲ့သည်။ ရုရှားမှ လွှတ်တင် ထားသော စက်တယ်လိုက်ပေါ်ရှိ ဆေးရုံ၏ ဧည့်ခန်းဆောင်တွင် စတီ(လ်)မင် ထိုင်နေစဉ် အခြား လူနာများကိုလည်း တွေ့ရသည်။ လူနာများထဲတွင် လူငယ်တယောက်နှင့် သူ့အဖော် မိန်းကလေး တယောက်ကို တွေ့ရသည်။ သူတို့နှစ်ဦးစလုံးသည် ငယ်ရွယ်သူများ ဖြစ်ကြသည်။ သနားစရာ။

မကြာမီ သူနာပြုဆရာမသည် စတီ(လ်)မင်ကို ခေါ်၍ ဆရာဝန်နှင့် တွေ့ပေးသည်။

ရက်အနည်းငယ်ကြာသော် စတီ(လ်)မင်သည် ဝါရှင်တန်သို့ ပြန်သည်။ လေယာဉ်ကွင်းတွင် သတင်းထောက်များ စောင့်နေကြသည်။ သူ့ကို မေးခွန်းများ မေးကြသည်။

“အခု ဘယ်လိုအခြေအနေ ရှိသလဲ”

“မကြာမီ ရုံးပြန်တက်နိုင်မှာလား”

“ရုရှားတွေက တကယ်ပဲ ဆေးကုပေးနိုင်မှလား”

စတီ(လ်)မင်သည် စဉ်းစဉ်းစားစားဖြင့် ဖြေလိုက်သည်။

“ရုရှားက ဆရာဝန်တွေက ရောဂါကို ကုပေးနိုင်လိမ့်မယ်လို့ ယူဆကြပါတယ်။ သေတော့ မသေချာသေးပါဘူး”

“ဘယ်လောက်ကြာကြာ ကုရမှာလဲ”

“ခြောက်လလောက် ကြာနိုင်ပါတယ်”

“ဒါဆိုရင် ရှေ့နှစ် သမ္မတ ရွေးကောက်ပွဲတော့ မမီတော့ဘူး။ နောက် လေးနှစ်မှာ အရွေးခံဖို့ စဉ်းစားထားလား”

စတီ(လ်)မင်သည် ခဏ စဉ်းစားပြီးမှ ဖြေလိုက်သည်။

“ဒီမေးခွန်းကို ဖြေဖို့ အချိန်နည်းနည်းယူရဦးမယ်။ အခုတော့ ဘာမှ မပြောနိုင်သေးပါဘူး”

သူသည် သူ့ဇနီးနှင့် မြေးများကို လှမ်းတွေ့လိုက်သည်။ ကလေးများသည် သူ့ကို ပြေး၍ ဖက် လိုက်ကြသည်။ သူ့နှလုံးသားထဲတွင် အဖြေကို သိထားပြီး ဖြစ်သည်။

ရက်အနည်းငယ်ကြာသော် စတီ(လ်)မင်သည် သူ၏ရုံးခန်းတွင် ဒေါက်တာဟပ်နက်နှင့် ရုရှားမှ စက်တယ်လိုက်ဆေးရုံ၏ ဒါရိုက်တာတို့ကို ရုပ်မြင်ဖန်သားများပေါ်တွင် တွေ့ဆုံ၍ စကားပြော သည်။

ညာဘက် ရုပ်မြင်သံကြား ဖန်သားပေါ်မှ ဒေါက်တာဟပ်နက်က ပြောလိုက်သည်။

“အားလုံး အဆင်သင့် ဖြစ်နေပါပြီ။ အခု မစ္စတာစတီ(လ်)မင်ကို စက်တယ်လိုက်ဆေးရုံမှာ စောင့် နေကြပါတယ်”

စတီ(လ်)မင်သည် ဘယ်ဘက်ရုပ်မြင်ဖန်သားဘက်သို့ လှည့်၍ ရုရှားမှ ဒါရိုက်တာကို မေးလိုက် သည်။

“ပါမောက္ခကြီးကို ကျွန်တော် တခု မေးချင်ပါတယ်။ စက်တယ်လိုက်ဆေးရုံမှာ ဆေးကုသလိုတဲ့ လူတွေ တော်တော်များပါတယ်။ ဒါပေမဲ့ ကျွန်တော် တွေ့တာက လူအားလုံးကို လက်မခံနိုင်ပါ ဘူး။ အချို့သာ ကုသခွင့်ရပြီး အချို့က ရကြပါတယ်။ ဒီတော့ကာ ဆေးကုသခွင့် ရရှိဖို့အတွက် ဘယ်လိုမူနဲ့ ရွေးပါသလဲ”

“ဟုတ်ပါတယ်။ ကျွန်တော်တို့က လူတိုင်းကို ကုသခွင့်မပေးနိုင်ပါဘူး။ ကုသခွင့် ရရှိတဲ့လူဟာ တော်တော်နည်းပါတယ်”

စက်တယ်လိုက်ဆေးရုံ၏ ဒါရိုက်တာသည် စတီ(လ်)မင်၏ မေးခွန်းကို ရှောင်၍ ဖြေနေခြင်း ဖြစ် သည်။ သို့သော် စတီ(လ်)မင်၏ စိတ်ထဲတွင် အဖြေကို သိနေပါသည်။ စက်တယ်လိုက်ဆေးရုံ တွင် ကုသခွင့်ရရှိရေးအတွက် ငွေကြေးတတ်နိုင်ဖို့ လိုသည်မှာ ထင်ရှားပါသည်။ သို့သော် ငွေကြေးနှင့်အတူ အရေးကြီးသောအရာများ ရှိပါသည်။ တခုမှာ ထင်ရှားကျော်စောမှု၊ အရေးပါ မှု၊ အာဏာရှိမှုတို့ ဖြစ်သည်။ ထိုမှသာ သူတို့၏ အာကာသဆေးပညာ သုတေသနအတွက် ဝါဒဖြန့်မှုကို ရရှိမည် ဖြစ်ပါသည်။ ဒေါက်တာဟပ်နက်၏အနေဖြင့် အာကာသဆေးပညာကို အမေရိကန် ပြည်သူများအား ဝါဒဖြန့်လိုသည်။ ထိုအခါကျမှသာ အမေရိကန်အစိုးရကလည်း ထိုလုပ်ငန်းသုတေသနအတွက် ငွေထုတ်ပေးမည် ဖြစ်သည်။ ရုရှားပါမောက္ခများအနေဖြင့်လည်း အမေရိကန်နိုင်ငံမှ ထင်ရှားသော နိုင်ငံရေးသမားတယောက်ကို ကုသပေးချင်သည်။ ထိုအခါ တွင် ရုရှားနိုင်ငံ၏ အောင်မြင်မှုကို တကမ္ဘာလုံးက သိမည် ဖြစ်သည်။

သို့သော် စတီ(လ်)မင်၏ စဉ်းစားနေသောအရာမှာ အခြားကိစ္စ ဖြစ်သည်။ သူသည် ဧည့်ခန်းတွင် တွေ့ခဲ့သော လူငယ်နှစ်ဦးအကြောင်းကို စဉ်းစားနေသည်။ သူတို့နှစ်ဦးထဲမှ တဦးသည် ဆေး ကုသခွင့်မရလျှင် သေရမည် ဖြစ်သည်။

စတီ(လ်)မင်သည် ဆုံးဖြတ်ချက် ခိုင်မာစွာဖြင့် ပြောလိုက်သည်။

“အားလုံးကို ကျေးဇူးတင်ပါတယ် ခင်ဗျာ။ ဒါပေမဲ့ ကျွန်တော် စက်တယ်လိုက်ဆေးရုံကို မတက် လိုတော့ပါဘူး”

သူသည် ရုပ်မြင်ဖန်သားနှစ်ခုစလုံးကို ပိတ်လိုက်သည်။ သူ့စိတ်ထဲတွင် တော်တော်ပေါ့ပါးသွား သည်။

နွေရာသီ ရောက်လာသည်။ သူနှင့် သူ့ဇနီးတို့သည် မြေးများကို ခေါ်၍ ဝါရှင်တန်ဒီစီရှိ သမ္မတ၏ အိမ်ဖြူတော်ကို အလည်အပတ်သွားကြသည်။ တခန်းဝင် တခန်းထွက် လျှောက်ကြည့်ကြသည်။ မကြာမီ သူ မောလာ၍ အနားယူချင်လာသည်။

“ကလေးတွေကို အခြားအခန်းတွေ လိုက်ပြပါ။ ငါ ဒီမှာ ခဏနားဦးမယ်”

ဟု သူ့ဇနီးကို ပြောလိုက်သည်။

“နေကောင်းရဲ့လား”

“ကောင်းပါတယ်၊ ခဏနားချင်လို့ပါ”

သူ့ဇနီးသည် ကလေးများကို အခြားအခန်းများဆီသို့ ခေါ်သွားသည်။ စတီ(လ်)မင်သည် ပိုတိုမစ် မြစ်ကြီးကို လှမ်းကြည့်လိုက်သည်။ သူ့စိတ်ထဲတွင် အေးချမ်းနေသည်။ သူသည် သမ္မတ ဘယ်တော့မှ ဖြစ်တော့မည် မဟုတ်ပါ။ သို့သော် သူ့မှာ စိတ်ပျော်ရွှင်မှု၊ အေးချမ်းမှု ရရှိနေပါ သည်။

သူ ထိုင်နေစဉ် အေးအေးချမ်းချမ်း၊ နာကျင်မှုနှင့် အကြောက်ကင်းမဲ့စွာဖြင့် သူသည် ဤလောက ထဲမှ ထွက်ခွာသွားလေတော့သည်။