လှကျော်ဇော - တရုတ်ပြည်ကို ပေါ့ပ် တေးဂီတ သွင်းလာသူ (Khris Phillip.ဖေ့ရှန်)
Inline image
တရုတ်ရဲ့ကမ္ဘာ့တပ်ပေါင်းစုပေါ်လစီသစ်(၁၃)
တရုတ်ပြည်ကို ပေါ့ပ် တေးဂီတ သွင်းလာသူ (Khris Phillip.ဖေ့ရှန်)
လှကျော်ဇော
(မိုးမခ) စက်တင်ဘာ ၁၈၊ ၂၀၂၃
တရုတ်တွေရဲ့နှစ်သစ်ကူးပွဲတော်မိသားစုတွေ ဆုံစည်းတဲ့နေ့ (နှစ်ဆန်း ၁ ရက်အကူး-ယေဘုယျဖေဖော်ဝါရီလအတွင်း) ည ၈ နာရီ- နှစ်သစ်ကူးချိန်ည ၁၂ နာရီ အထိ တရုတ်ဗဟိုရုပ်မြင်သံကြား ကတိုက်ရိုက်ထုတ်လွှင့်တဲ့ (live–show) အထူးအစီအစဉ်ကို တရုတ်တပြည်လုံးကလူတွေသာမက တကမ္ဘာလုံးမှာပျံ့နေတဲ့ တရုတ်တွေပါ မိသားစုအစုံအလင်နဲ့အားလုံးမကြည့်မဖြစ်ကြည့်ရတဲ့ အစီအစဉ်ပါ။ အဆို၊ အက၊ ကျွမ်းဘား၊ မျက်လှည့် ဟာသပြဇာတ်တို၊ တရုတ်ကွက်စိပ် စသဖြင့်အတော့်ကို ရသစုံလင်တဲ့ပွဲပါ။ နာမည်ကျော်အနုပညာသည်များသာမက မျက်နှာသစ်များကိုလည်း ပွဲထုတ်တတ်ပါတယ်။ အဲဒီအစီအစဉ်မှာ ပွဲထုတ်ခံရသူများဟာမကြာမီကာလတွင်းမှာပဲ အောင်မြင်ကျော်ကြားတဲ့ အနုပညာရှင်များဖြစ်သွားတတ်ပါတယ်။
၁၉၈၇- ခုနှစ်နှစ်သစ်ကူးပွဲမှာတော့ အထူးအစီအစဉ်တရပ်ပါလာပါတယ်။
အဲဒီအစီအစဉ်စကတည်းကကြည့်ရှုနေသူတွေအားလုံး (တပြည်လုံးလို့တောင် ဆိုနိုင်ပါတယ်။) ကြက်သေသေသွားပြီး အစီအစဉ်ပြီးဆုံးတဲ့အထိ (၂၀ မိနစ်ကျော်ကျော်)မျက်တောင်မခတ်အသက်မရှုနိုင်ပဲ ကြောင်တောင်ကြီးကိုမေ့သွားကြပါတယ်။ အဲဒီအစီအစဉ်တခုလုံးမှာ မျောပါသွားကြတာလေ။
မမျောလည်းမခံနိုင်ဘူး။ အဖြစ်ကဒီလို။
အစီအစဉ်မှူးက ... ထိုင်ဝမ်ကအဆိုတော် ဖေ့ရှန်ကတေးသီချင်း (၂) ပုဒ်နဲ့ ဖြေဖျော်ပါတော့မယ်။ ... လို့ကြေညာပီးချိန်မှာ ထွက်လာသူကတော့အရပ် (၁.၉ မီတာရှိသတဲ့။) သွယ်သွယ်မြင့်မြင့် မျက်လုံးပြာပြာ ဆံပင်ကောက်ကောက် အမောက်တထောင်ထောင်နဲ့ အနောက်နိုင်ငံသားရုပ်မျိုးပိုင်ရှင်တေးသံရှင်က တရုတ်သံပီပီသသနဲ့ ... ဆောင်းနှင်းကြားက မီးတိုင်တတိုင်-ဆိုတဲ့ သီချင်း (ပေါပ့်ဂီတ-အချစ်သီချင်း)ကို ဒစ္စကိုအကနဲ့တင်ဆက်သွားတာပါ။
...
မင်းရဲ့အချစ်ဟာမောင့်အတွက်တော့ဆောင်းနှင်းတွေကြားမှာတွေ့လိုက်
တဲ့ မီးတိုင်လေးတတိုင်လိုရင်ထဲမှာနွေးထွေးသွားစေပါတယ်။ ... တဲ့။
အဲဒီလို အဓိပွာယ်သက်ရောက်တဲ့သီချင်းကိုဆိုအပြီးမှာတော့ အဲဒီအဆိုတော်လေးက .... ဒီလိုမိတ်ဆက်စကားပြောပါတယ်။
.... ကျွန်တော်ဟာ တရုတ်- အမေရိကန်ကပြားပါ။ ကျွန်တော့်အမေက စန်တုန်းသူ (မှတ်ချက်။ ။ တရုတ်ပြည်မြောက်ပိုင်းက ပြည်နယ်တခုပါ။)
ပါ။ ပီကင်းမှာကျောင်းတက်နေတုန်း သူငယ်ချင်းအဖော်တွေနဲ့ ထိုင်ဝမ်ကို အလည်သွားရာက နိုင်ငံရေးအပြောင်းအလဲနဲ့တိုးပြီး ပြည်မကြီးက မိဘများနဲ့ အနှစ် (၄၀) နီးပါး အဆက်ပြတ်သွားပါတယ်။ ကျွန်တော့်အဖေကတော့ ထိုင်ဝမ်ကျွန်းပေါ်တာဝန်နဲ့ရောက်လာတဲ့ အမေရိကန်စစ်အရာရှိတဦးပါ။
သူတို့နှစ်ယောက်လက်ထပ်ပြီးအဖေအမေရိကန်အပြန်မှာကျွန်တော်တို့လိုက်သွားပေမယ့် အမေကတော့ အဲဒီမှာမပျော်လို့ ထိုင်ဝမ်ပဲပြန်လာပါတယ်။ အမေဟာ ပြည်မကြီးကသူ့မိသားစုနဲ့ အဆက်ရဖို့ ဘက်စုံကနေကြိုးစားလာရာမှာ ၁၉၈၆- မှာစန်တုန်းက အဘွားဆီကစာတစောင်ရောက်လာပါတယ်။ ဒီတင် အမေက မရမက ပြန်မယ်လုပ်တော့ ကျွန်တော်က အဖော်အဖြစ်ပါလာတာပါ။
ဒီရောက်တော့ ဗဟိုရုပ်မြင်သံကြားဌာနက သူတို့ရဲ့ တရုတ်နှစ်သစ်ကူးအစီအစဉ်မှာပါဝင်ပေးဖို့ ဖိတ်ခေါ်လို့ ကျွန်တော်အခုလိုလာဖြေဖျော်တာပါ။
ကျွန်တော်အခုအသက်(၂၆) နှစ်ကျမှပြည်မကြီးကို ပထမဆုံးအကြိမ်ရောက်ဖူးပြီး အမေ့မိသားစုတွေကို တွေ့ဖူးတာပါ။ အခုကျွန်တော်နဲ့အတူအသက် (၈၀)ရွယ် အဘွားနဲ့အမေတို့ပါလာပါတယ်။ (ဒီလိုပြောပြီးအထူးဧည့်သည်တန်းမှာထိုင်နေတဲ့ ဘွားအေကြီးဆီဆင်းလာ၊ ဘွားအေကြီးရဲ့ပါးလေးကိုနမ်း နုတ်ဆက်ပါတယ်။ ဘွားအေကြီးကလည်း မျက်ရည်လေးတစမ်းစမ်းနဲ့) ကျွန်တော်ဆိုမယ့်နောက်သီချင်းတပုဒ်ကတော့ ကျွန်တော့်အဘွား၊ အမေနဲ့ ကျွန်တော်ရပ်ဆွေရပ်မျိုးများအတွက်....မွေးရပ်မြေက တိမ်တမန်... ပါ။ ...တဲ့။
ပြီးတော့ စင်ပေါ်ပြန်တက်လာပြီး ...အိမ်မှာကျန်ခဲ့ပြီး အခုအချိန်ရုပ်မြင် သံကြားရှေ့မှာရောက်နေမယ့်အသက် (၁၀၀)ရှိနေပြီဖြစ်တဲ့ ဘွားဘွားကြီးရေ။ ကျွန်တော်ကိုမြင်နေရတယ်မှုတ်လား။ အခုကျွန်တော်နောက်သီချင်းတပုဒ်ဆိုပြဦးမယ်နော်။ ... လို့ဆက်ပြောပြီးမှ သီချင်းကိုဆိုပါတော့တယ်။
.... ကိုယ့်ရင်ထဲမှာ ခေါ်သံတခုအမြဲကြားယောင်နေတယ်။ ... ပြန်လာခဲ့ပါ
တော့။ မွေးရပ်မြေကမျှော်နေပါတယ်။ ဘာဖြစ်လို့များအဝေးမှာလေလွင့်နေရတာလဲကွယ်။ .... တဲ့။
Inline image
(၁၉၈၇- နှစ်သစ်ကူးပွဲအစီအစဉ်နေ့ကတွေ့ရတဲ့ အဆိုတော်ဖေ့ရှန်၊ မိခင်နှင့် အဘွား။)
သူအသံနဲ့ဆိုပုံဆိုနည်းကလည်းကောင်း၊ သူ့ခံစားချက်နဲ့ဆိုတာလည်း ဖြစ်တော့ နားထောင်နေသူအားလုံးတချက်မှကိုမလှုပ်နိုင်ရုံမက ဝမ်းပန်းတနည်း ဖြစ်ကုန်ကြပါတယ်။ နောက်ပိုင်းတွေ့ဆုံမေးမြန်းခန်းတခုမှာတေး သံရှင်က ဒီသီချင်းရဲ့အောင်မြင်ရတဲ့အကြောင်းကို ဒီလိုပြောပြဖူးပါတယ်။
.... ကျွန်တော်က အမေရဲ့ အိမ်လွမ်းစိတ်ကိုတောက်လျှောက်သိနေတာလေ။ ဒါကြောင့်အဲဒီခံစားချက်အပြည့်နဲ့ ဆိုမိတာ။ တကယ်လည်း အဲဒီနေ့က အတော်ကို ဒီလိုနဲ့ တရုတ်ဗဟိုရုပ်မြင်သံကြားအစီအစဉ်မှာ ထိုင်ဝမ်ကပထမဆုံးလာသီဆိုတဲ့ အဆိုတော် ဖေ့ရှန်ဟာ ပြည်မကြီးမှာ တခါမှ မတခါဖူးတဲ့ ပေါ့ပ်တေးသီချင်းတွေဆို၊ ဒစ္စကိုတွေ ကနဲ့ တနိုင်ငံလုံးက (အထူးသဖြင့် အမျိုးသမီးပရိသတ်) ပြည်သူများရဲ့မေတ္တာ စေတနာတွေ အားလုံးသိမ်းကြုံးရယူလိုက်နိုင်ပြီး ဟိုးဟိုး ကျော်သွားပါတော့တယ်။
တကယ်တော့ အဲဒီအစီအစဉ်ကို ထုတ်လွှင့်ရာမှာ ဒါရိုက်တာတဖွဲ့လုံး ရင်-မ နေရတာပါ။ အဲဒီအချိန်မှာ တရုတ်ပြည်မှာ တံခါးဖွင့်ပေါ်လစီကျင့်သုံးစပြုနေပြီး ထိုင်ဝမ်အပေါ်မှာလည်း ဆက်ဆံရေးပျော့ ပျောင်းစပြုလာတာမှန်ပေမယ့်၊ ဒီလောက်ကြီးပွင့်လင်းသေးတာမဟုတ်ပါဘူး။ အဲဒီကာလက စင်ပေါ်ကသီချင်းသီဆိုသူများဟာ (အဲ) မြင်သာအောင်ပြောရရင် တလောက သတင်းကွန်ရက်တခုမှာတင်ထားတဲ့ အဆိုတော် ထားနဲ့ သူ့သား ဇော်ဝင်းထွဋ် (အဲတုန်းကလူငယ်လေး) တို့ (၂)ယောက် မြန်မာ့ရုပ်မြင်သံကြားမှာသီဆိုတဲ့အတိုင်းပါပဲ။ လက်ကလေးနှစ်ဖက်ယှက်၊ရှေ့ချထားပြီး မျက်နှာသေနဲ့မလှုပ်မရှားတောင့်တောင့်ကြီး ဆိုကြရတာပါ။
ပြီးတော့ ဒီအစီအစဉ်ကို ၀တ်စုံပြည့်လေ့ကျင့်တုန်းကလာကြည့်တဲ့ခေါင်းဆောင်က ... ဒီအကကြီးကတော့ တရုတ်ယဉ်ကျေးမှုနဲ့ မကိုက်ဘူး။ ဒါပေမဲ့ ဒီအဆိုတော်ကလည်း တို့ကသွားဖိတ်ထားတာ၊ ဒီတော့ ဒီလိုလုပ် သူသီချင်းဆိုတဲ့အချိန် သူတကိုယ်လုံးကိုကင်မရာကရိုက်မပြနဲ့ ၊ လည်ပင်းအထက် မျက်နှာလေးလောက်ပဲ ရိုက်ပြ ... လို့ အမိန့်ချသွားတာ။
တကယ့်တိုက်ရိုက်ရုပ်မြင်သံကြားလွှင့်ဖို့အချိန်ကျတော့ အဲဒီအခန်းရဲ့ အမျိုးသမီးဒါရိုက်တာ တိန့်က ... ကဲဖြစ် လာသမျှ ကျွန်မတာဝန်ယူမယ်။ ကင်မရာမင်း ... တကိုယ်လုံးသာရိုက်ပေတော့။ ...လို့အမိန့်ချလိုက်ပါတော့တယ်။
Inline image
ဒီလိုနဲ့ တရုတ်ဗဟိုရုပ်မြင်သံကြားအစီအစဉ်မှာ ပထမဆုံးသော ပေါပ့်တေးသီချင်းနဲ့ ဒစ္စကိုအကပေါ်ထွက်လာပြီး အဲဒီအဆိုရှင် ဖေ့ရှန်လည်း ပြည်မကြီးကိုလာသီဆိုဖျော်ဖြေတဲ့ ပထမဆုံးထိုင်ဝမ်ရဲ့အနုပညာရှင်အဖြစ် သမိုင်းတွင်သွားပါတော့တယ်။
အဲဒီအခန်းအနားအပြီးမှာတော့ (ကြာရှည်ကြာများ ယဉ်ကျေးမှုတော်လှန်ရေးရဲ့တင်းကျပ်တဲ့ စည်းကမ်းများအောက်မှာနေခဲ့ရတဲ့) တရုတ်ပြည်က လူငယ်လူရွယ်များဟာ တာရိုးချိုးပေးလိုက်သလိုဖြစ်သွားပြီး တနိုင်ငံလုံးဖေ့ရှန်ကေတွေညှပ်ကြ၊ဖေ့ရှန်အင်္ကျီတွေဝတ်ကြ၊ဖေ့ရှန်အကတွေကကြနဲ့ တနိုင်ငံလုံး ဖေ့ရှန်ရောဂါစွဲကပ်သွားပါတော့တယ်။ဖေ့ရှန်ဆီလာတဲ့ မိတ်ဆက်စာတွေကို အိတ်ကြီးအိတ်ငယ်နဲ့ ထည့်သယ်ရတာ တဲ့။
အဲဒီနောက်မှာတော့ ဖေ့ရှန်ဟာ တနိုင်ငံလုံးလှည့်ပြီး ဆိုရ ကရနဲ့ အဲဒီတနှစ်ထဲ တရုတ်ပြည်ကပြည်နယ် (၁၂)ခုက မြို့ကြီး(၆၅)မြို့မှာ လှည့်လည်ဖြေဖျော်ပြီး အဲဒီပွဲတွေကရသမျှငွေတွေကိုလည်း ၁၉၉၀ ခုနှစ်ပီကင်းမှာကျင်းပတဲ့ အာရှအားကစားပြိုင်ပွဲကြီးအတွက် လှူလိုက်ပါတယ်။ ဒါ့အပြင်တရုတ်ပြည်မှာဘေးဒုက္ခကြုံရင်ဖြစ်ဖြစ် (ငလျင်ဘေးများ) ပွဲကြီးပွဲကောင်းများ (၂၀၀၈- ပီကင်းအိုလံပစ်) မှာပဲဖြစ်ဖြစ်၊ အကြောင်းတိုက်ဆိုင်လာတိုင်း သူက ရက်ရက်ရောရော လှူတတ်ပါတယ်။ ၁၉၉၇ ခုနှစ် ဟောင်ကောင်ကျွန်း ပြည်မကြီးနဲ့ပြန်လည်ပေါင်းစည်းရေးကာလမှာလည်း သူက-တရုတ်လူမျိုးတွေ ဘယ်နေရာပဲရောက်နေနေ-တပေါင်းတစည်းတည်း ချစ်ခင်တတ်ဖို့ အချင်းချင်းကူညီရိုင်းပင်းဖို့ ... ဆော်ဩတဲ့သီချင်းတွေဆိုခဲ့ပါသေးတယ်။ ဒီလိုနည်းနဲ့ သူရဲ့မျိုးချစ်ပြည်ချစ်စိတ်ဓာတ်ကို ပြသခဲ့တာပါ။ ဒါ့ကြောင့်ပဲ တရုတ်တပြည်လုံးက သူ့ကိုဝိုင်းချစ်ခဲ့ကြတာပါ။
အဲဒီအချိန်ကစလို့ တရုတ်ပြည်မကြီးကလူများဟာ အဆိုတော်ဖေ့ရှန် ကိုယ်စားပြုတဲ့ထိုင်ဝမ်ကသွေးချင်း သား ချင်း ညီအကိုမောင်နှစ်မတွေအပေါ် စာနာမှုတွေ၊ နားလည်မှုတွေနဲ့အတူ ချစ်ခြင်းမေတ္တာတွေပေါ်လာပြီး ဆက် ဆံရေးတွေ ညက်ညော ပြေပြစ်လာပါတယ်။ (အစောပိုင်းကပြည်မကြီးကလူတွေက ထိုင်ဝမ်သားတွေကိုအမေရိကန်နောက်လိုက်ခွေးတွေလို့ ခေါ်တတ်တယ်။)
ဒီလိုနည်းနဲ့ ထိုင်ဝမ်ရေလက်ကြားနှစ်ဖက် (ပြည်မကြီးနဲ့ ထိုင်ဝမ်) က တရုတ်လူမျိုးများအကြား ချစ်ကြည်ရေးပေါင်းကူးတံတားကိုတည်ဆောက်လိုက်နိုင်ပါတယ်။
ဒါကြောင့်ပဲအဆိုတော်ဖေ့ရှန်ကိုတရုတ်ပြည်သူများကထိုင်ဝမ်ရဲ့ပထမဆုံးသောပြည်သူ့သံတမန် လို့သတ်မှတ်လိုက်ကြပါတယ်။
Inline image
အခုလည်း အသက်(၆၂)နှစ်ရှိပြီဖြစ်တဲ့ ဖေ့ရှန်ဟာတရုတ်ရာဇ၀င်ကားတကားမှာ ရှေးဘုရင်ဧကရာဇ်ကြီးအဖြစ်သရုပ်ဆောင်ပါဝင်ထားပြီး အဲဒီဇာတ်ကားဟာလည်း တရုတ်ပြည်မှာဝက်ဝက်ကွဲအားပေးခံရပြီး ဝင်ငွေအကောင်းဆုံးရတဲ့အထဲမှာပါဝင်သွားပါပြီ။
တရုတ်မှာရှေးစကားပုံရှိသတဲ့။
သွေးဟာ ရေထက် စေးပျစ်တယ်။ .... တဲ့။
လှကျော်ဇော။
၁၇-၉-၂၀၂၃
-
Join Us @ MoeMaKa Telegramt.me@moemaka
#MoeMaKaMedia
#WhatsHappeningInMyanmar
Posts
