မိုးမခ - အမှတ်တရရုပ်ပုံလွှာများ - သန်းထိုက်(မြန်မာစာ) * မြန်မာပန်းချီဆရာကြီး ဦး​ငွေကိုင် *

မိုးမခ - အမှတ်တရရုပ်ပုံလွှာများ

စက်တင်ဘာ ၂၃၊ ၂၀၂၁

* မြန်မာပန်းချီဆရာကြီး ဦး​ငွေကိုင် *

သန်းထိုက်(မြန်မာစာ)

ငယ်ငယ်ကတည်းက ဆရာကြီးကို အလွန်ချစ်ခဲ့သည်။ ​ဆွေမျိုး ​သွေးသားလည်းမ​တော်စပ်ပါ...၊ ပန်းချီကိုမြတ်နိုးခဲ့​တော့ ... စာအုပ်စာ​ပေ​တွေမှာ ဆရာ့ဓာတ်ပုံ​တွေ့လျှင် ပြုံးရယ်​နေသည့်ပုံ ​တွေ့ရတာများသည်၊ ... ​မေတ္တာဓါတ်ကူးခြင်း​ပေလားမသိပါ။

* ရန်ကုန်​ရောက်​တော့ ဆရာကို​မောင်​မောင်သိုက်နှင့် ဆက်စပ်မိကာ ... ရှုမဝမဂ္ဂဇင်းမှာ ပန်းချီ​ရေးဖြစ်ခဲ့သည်၊ ရှုမဝမဂ္ဂ​ဇင်းတည်​ထောင်သူ ... အယ်ဒီတာ ... ရုပ်ရှင်ထုတ်​ဝေသူ ... ဒါရိုက်တာလည်းဖြစ်ခဲ့သူ ... ဆရာကြီး ( ရှုမဝဦး​​ကျော် )၏ သား ... ဆရာ​မောင်​ဆွေတင့်က မိမိကို ညီအကိုလို ချစ်ခင်ကာ ... ရှုမဝမှာ ရေး​နေသူ ပန်းချီ​ဆရာများ... ကာတွန်းဆရာများ ... စာ​ရေးဆရာများကို ... ညီငယ်သဖွယ်သွန်သင် ဆုံးမ​ပေးဖို့ အပ်နှံ​ပေးခဲ့သည်။ 

* ဆရာပန်းချီဦးဝသုန်...ဆရာကြီးဦး​မောင်စိန် ... ဆရာကာတွန်းဦး​ရွှေမင်းသား ... ဆရာကာတွန်းဦး​ငွေကြည် ... ဆရာကာတွန်းဦး​မောင်ဝဏ္ဏ ... ဆရာကာတွန်းဦးချစ်​ဆွေ ...တို့ကို ငယ်စဉ်ကတည်းက ပညာကို ​လေးစားရင်း ဆရာများအဖြစ် မှတ်ယူခဲ့သည်မှ ... ညီအကို ...ဦး​လေးများသဖွယ် ရင်းနှီးစွာ ဆုံ​တွေ့ခွင့် ရခဲ့သည်။

*  ကာတွန်းပညာနှင့်... မြန်မာ့ရိုးရာ​ရေးဟန်ပန်းချီကိုပါ  နိုင်နင်း... ကျွမ်းကျင်​​သော ... ဆရာ​ကြီးဦးမောင်စိန်က မိမိကို တူသားလိုချစ်ခင်သည်၊ 

ရှူမဝတိုက်​ရောက်​တော့ ... ဆရာက ပြန်ထွက်လာရင်း ဆုံသည်။ 

'ဆရာပြန်​တော့မလား ... ' နှုတ်ဆက်​တော့ ... ' ​အေး ... အချိန်ရတယ် ...၊ ကိုယ်​စောင့်​နေမယ် ... ၊ ကိုဆွေနဲ့ အလုပ်ပြီး​အောင်လုပ် ...'

ဆရာဦးစိန်က ရှုမဝတိုက်​အဝင်ဝ ... ခုံတန်းလျား​လေးမှာ ... ထိုင်​စောင့်​ပေးရှာသည်။ အလုပ်ပြီးပြန်ထွက်လာ​သောအခါမှ  ဆရာက မြို့တွင်းအတူ လမ်း​လျှောက်ပြန်ကာ သူ့ဘဝအ​​တွေ့အကြုံများ​ပြောပြရင်း  အဆာ​ပြေ သား​ရေစာများကို ဆိုင်ထိုင်ကာ ​ကျွေး​မွေးခဲ့တာအမှတ်ရမိသည်။

* ဆရာ့ကာတွန်းတကွက်ကို ဖတ်ခဲ့ရသည်။

' ပန်းချီ​ရေးတာ လွယ်ပါတယ် ... ရွှံ့​တွေ ​ရေးရင် .. ဗွက်အ​ရောင်သုတ်လိုက်​ပေါ့ ...'

* ရှုမဝဦး​ကျော် ... ရုပ်ရှင်ရိုက်​တော့ ဆရာကြီး ဦး​ငွေကိုင်ကို ... မှတ်တမ်းအတွက် သူရုပ်ရှင်ရိုက်​လေရာ ​ခေါ်သွားဖူးသည်၊ ဆရာကြီးက ပန်းချီ​အောက်ဒိုးထွက်​နေရသလို ပန်းချီ​ရေးသည်။ ရှုမဝတိုက်တွင်လည်း ​ဆေး ... စုတ်တန်ရှိ​နေသည်။

* တရက်မှာ ... ရှုမဝတိုက်သို့ ဆရာကြီးက ဝတ်​ကောင်းစားလှ ... ဘန်​ကောက်ပုဆိုးဖြင့် ​အလှူတခုကအပြန် ရောက်လာသည်။ ဆရာကြီးက ပန်းချီ​ရေးချင်သည်ဆို၍ စာစီဖိုမင် ကိုလှ(ဦးလှ​အောင်)တို့က ​ဆေးများ ထုတ်​ပေးကြသည်။ ဆရာကြီးက ပန်းချီကားကို အားပါပါနှင့် ​ရေး​လေရာ ... စုတ်တန်မှ ​ရေ ... ​ဆေးတို့ကို သူ့ပုဆိုးမှာ စစ်ခါသုတ်​လေ​တော့သည်။ ဆရာကြီးသည် သက်မွေးဝမ်း​ကျောင်းအတွက် ...ပိုစတာများလည်း ​ရေးခဲ့​လေရာ ... သူ့စတူဒီယိုတွင် အိမ်​နေပုဆိုးဖြင့် ​ရေး​နေ... လုပ်​နေကျင့်ရှိပါလိမ့်မည်။

သူကလည်း ပန်းချီ​ရေး​​နေရင်း..

' မိုးစိုစို ​လယ်ယာခင်းနားက ... ရွှံ့​တွေ​ပေ​နေတဲ့မြေပြင်ကို ​မောင်စိန်​ပြောသလို ... ဗွက်အ​​ရောင် သုတ်လိုက်​တာပေါ့ ...' ရယ်ရယ်​​​မောမော ​နောက်​ပြောင် ​ပြောသည်။ ဆရာကြီးပြန်​တော့ သူ့ဘန်​ကောက်ပုဆိုးက ​​ခေတ်လွန် အင်ဒိုနီးရှားရောင်စုံပုဆိုးဖြစ်​နေ​လေပြီ။

* ဆရာကြီးက လွန်စွာ စိတ်ရင်း​ကောင်းသည်၊... သူ​ရေးသည့် ပန်းချီကားကို တပည့် ... မိတ်​ဆွေများက စိတ်ဝင်တစားကြည့်ရှုရင်း ...

' ဆရာ​ရေးတာ ​ကောင်းလိုက်တာ ... ဒီ​ရေးချက်... အ​ရောင်​တွေ ဘယ်လိုစပ်လိုက်တာလဲ .... '

ဆရာကြီးက ရှင်းပြမ​နေ​တော့ဘဲ... ချက်ချင်း ... အစအဆုံး ​ရေးပြသည်။ တပည့်များက ရေးသည့်ပန်းချီကားကို သွားပြလျှင်လည်း .... လိုအပ်တာ ​ထပ်ရေး​ပေးလိုက်သည်။

* သူငယ်ချင်း ကိုမျိုးသန့်​အောင်နှင့်ဆက်စပ်မိကာ ...

 ဆရာ​ရွှေ(ကို​ရွှေ​အောင်သိမ်း).... ဆရာ​ဖေ (WPM )တို့ကို ခင်မင်ကာ ..  ပညာများလည်း ရယူခဲ့ရသည်။

ဆရာ​ရွှေက ... ဆရာ​​ဖေကို ...

' မင်းက ... ဦးငွေကိုင် အ​သေးစားလေးပဲကွ ... ' ဟု ​ပြောခဲ့ဖူးသည်။

* ၁၉၈၇ မှာ ဦးမြင့်လွင်(​ဆရာတေဇာလင်း)က Golden Valley Art Centre ဖွင့်သည်။ ယခင်အခါကတည်းက ပြခန်းများရှိ​သော်လည်း GV Art Centre စဖွင့်လာသည်တွင် ထူးခြားစွာ ပန်းချီကားအ​ရောင်းအဝယ်  ​အောင်မြင်သည်။

ဆရာ့ဆရာကြီးများ၏ပန်းချီကားများကိုလည်း  ပြည်တွင်း ပြည်ပမှ ဝယ်ယူစု​ဆောင်းလာကြသည်။

ဆရာဦးလွန်းကြွယ်က  GV Art Centre တွင် ပန်းချီကားများပြသရင်း ပန်းချီသင်တန်းပါ ပို့ချ​ပေးသည်။ ​

ဆရာက ... 

ရှေးယခင် ပန်းချီဆရာကြီးများ ပန်းချီကားအ​ရောင်းအဝယ် သိပ်မ​ကောင်းလှသဖြင့် ... ပန်းချီနှင့်ပတ်သက်ဆက်စပ်ရာ ... ပိုစတာ ... မဂ္ဂဇင်းသရုပ်​ဖော်ပုံ .. အစရှိရာ အလုပ်များလုပ်ခဲ့ကြရသည်။

' တခါက ဆရာကြီးဦး​ငွေကိုင်​ပုံ​ရေး​နေစဉ် ဆရာကြီးက​တော်က အိမ်မှာ ​စျေးဖိုးပြတ်လပ်​နေ​ကြောင်း ​ပြော သည်။ ဆရာကြီးက တပည့်တဦးကို ... အလုပ်ရှင်တဦးထံ ​သုံးစရာငွေ​တောင်းဖို့ လွှတ်လိုက်သည်။ 

ပန်းချီပညာကိုမြတ်နိုးကာ အားကြိုးမာန်တက်​ ရေးဆွဲတတ်​သော ဆရာကြီးအဖို့ ဘဝ​ရှေ့​ရေးအတွက် ... စုမိ​ဆောင်းမိဖို့ ​နေ​နေသာသာ ...  ​မိသားစု ... နေ့စဉ်ဝမ်း​ရေးအတွက် များစွာရုန်းကန်ခဲ့ရ​ကြောင်း ...' ပြန်​ပြောပြသည်။

* ​လေးစားကြည်ညိုခဲ့ရ​သော အနုပညာကိုမြတ်နိုးခဲ့ကြသည့် ဆရာ ... ဆရာကြီးများ  ဘဝကို ရုန်းကန်ခဲ့ကြရသည်ကို မှတ်မိသမျှ ​ရေးမိတာပါ။

* သည်ဖက် ဒီမိုက​ရေစီပျက်သုဉ်း​လေ​သော မြန်မာပြည်​ထောင်စုကြီးမှာ အနုပညာရှင်... အတတ်ပညာရှင် ... ပြည်သူပြည်သားအားလုံး ... စားဝတ်​နေ​ရေးအတွက် ... ဒုက္ခ ... လှလှ ​တွေ့ကြပြန်​လေပြီ။

မြန်မာပြည်​ထောင်စု ပြည်သူ ပြည်သားအားလုံး ... ကျန်းမာ ချမ်းသာကြပါ​စေ ... ... ...

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar