ရဲဘော် ဘိုးညီတင့် - ရဲဘော်ဆက်လုပ်

(မိုးမခ) ဇွန် ၅၊ ၂၀၁၉

ဘိုးညီတင့်က စာကောင်းကောင်းမတတ်ရှာဘူး။ ငယ်ရွယ်စဉ်ကလေးဘာဝ "ဧတံမင်္ဂလ မုတ္တမံ နင့်အမေဖင်ကချီးစော်နံ" အော်ကောင်းတုန်းရှိသေး ရွာဦးဘုန်းကြီးကျောင်းကထွက်ခဲ့ရတယ်။ စာမတတ်လို့ သူ့ကို လူအထင်သေးမှာစိုးရိမ်တယ်။လူအထင်ကြီးအောင် ခေတ်မီမီနေပြတယ်။ စကားပြောရင် အင်္ဂလိပ်စကားညှပ် ညှပ်ပြောတတ်တယ်။ ခေတ်စားနေတဲ့စကားအသုံးအနှုန်းတွေ ဗန်းစကားတွေ ထည့်ပြောလေ့ရှိတယ်။

ပြောရိုးပြောစဉ် "ငါ" "ကျုပ်" စတဲ့ ကိုယ့်ကိုယ်ကိုယ်ရည်ညွှန်းစကားမပြောဘဲ"ကိုယ်တွေက ကိုယ်တွေက"နဲ့ပြောလို့ ရွာသားတွေ နဝေတိမ်တောင်ဖြစ်ကြရတယ်။"ကျမက နှင်းဆီပါမောင်"ခေတ်စားတုန်းက အရက်ပုန်းရောင်းတဲ့မသေးမျှင်ကို "ကျမက ရေသည်မပါမောင်"လို့ပြောမိလို့ ဟိုက သူ့ကို အရက်ကြွေးမပေးတော့ဘူး။

တခါကလည်း ရွာအလှူ တရားဟောဖို့ကြွလာတဲ့ ရွာဦးကျောင်းဆရာတော်ဘုရားကို "ဒို့ဘုန်းဘုန်းက အလန်းဇယားဟေ့"လို့ပြောမိလို့ လူကြားထဲ ဆရာတော့်တောင်ဝှေးနဲ့ ကပ္ပိခံရတယ်။

ဒီနှစ်သင်္ကြန် ရွာလယ်မှာ စတုဒီသာကျွေးနေကြတုန်း လူပျိုကြီးတင်ဇော်ထွန်းကိုသွားပီး"ဟျောင့် ငါ့နွားမက မင်းနွားမထက် ပိုမိုက်တယ်"ပြောမိလို့ တင်ဇော်ထွန်းခမျာ ရှက်ပြီး မျက်နှာနီရဲသွားတယ်။

ခုလည်းဖေ့စ်ဘုတ်မှာ ရဲဘော် ဆိုတဲ့စကားခေတ်စားလာတာတွေ့တော့ ဘိုးညီတင့်ပြောချင်လာတယ်။ရွာက ကောင်တွေပြောလို့နားလည်မှာမဟုတ်ပါဘူး။ မြို့က ဇကလေးတို့ ဦးညီပုကြီးတို့ဆီသွားပြောမှဘဲလို့အကြံရတယ်။ ဒီတော့ ဘိုးညီတင့် အိမ်ကိုအကြောင်းတခုပြ မြို့တော်ကြီးဆီခရီးထွက်ခဲ့တော့တယ်။မြို့ရောက်တော့ ဇကလေးအိမ်အရင်သွားတယ်။ဇကလေးကိုသူ့အိမ်ပေါက်မှာ အဝေးကြီးကလှမ်းမြင်ရတယ်။ဘိုးညီတင့်ကတောသံကြီးနဲ့အော်ပြီးနှုတ်ဆက်လိုက်တယ်။

"ဟေ့ ရဲဘော်ဇကလေး"

ဇကလေးလှည့်ကြည့်လိုက်တော့ ဘိုးညီတင့်ကိုတွေ့ရတယ်။ဇကလေးက တင်္ခနုပ္ပတ္တိဉာဏ် အလွန်ကောင်းသူ။ ဘိုးညီတင့်ကို ချက်ချင်းပြန်နှုတ်ဆက်တယ်။

"ဟာ အလံနီ ဘိုးညီတင့်"တဲ့။

သူ့ရဲဘော်ခေါ်မိတာနဲ့ ငါ့အလံနီ ပြန်ခေါ်ခံရတယ်။ဇကလေးနဲ့ကီးမကိုက်သေးပါဘူး။ဦးညီပုကြီးဆီသွားမှဘဲလို့ စိတ်ကူးမိတယ်။ဘိုးညီတင့်လည်းဇကေလးအိမ်ထဲဝင်မနေတော့ဘဲ ဦးညီပုကြီးအိမ်သွားတော့တယ်။ဦးညီပုကြီးကို အိမ်ရှေ့စာဖတ်နေတာအရံသင့်တွေ့ရတယ်။

"ရဲဘော်ဦးညီပုကြီး" လို့နှုတ်ဆက်တော့ စာဖတ်နေရာကမော့ကြည့်တယ်။ မျက်မှန်ချွန်လိုက်ပြီး ဘိုးညီတင့်ကို လူကြီးတယောက်က အပြစ်လုပ်မိတဲ့ကလေး သနားကြည့်ကြည့်သလို ကြည့်တယ်။ ဘိုးညီတင့်က "ဘာလဲ ရဲဘော်ဦးညီပုကြီး။ ရဲဘော်ခေါ်တာ မကြိုက်ဘူးလား။မခေါရဘူးလား"လို့မေးတော့

"ခေါ်ရပါသဗျာ။မြန်မာအဘိဓာန်ထဲမှာ ရဲဘော်ဆိုတာကို ပြည်သူ့တာဝန်ထမ်းဆောင်ဖက် လုပ်ဖော်ကိုင်ဖက် တပ်မတော်သားလို့ အနက်ဖွင့်ထားပါတယ်။ ရဲဘော်ရဲဘက်လို့လဲခေါ်နိုင်ေသးတယ်။ ရဲဘော်ရဲဘက်ကလဲ လုပ်ဖော်ကိုင်ဖက်လို့အနက်ရတယ်မဟုတ်လား။အဲဒါပေမဲ့ ရဲဘော်ကိုဖြုတ်ပြီး ရဲဘက်လို့တော့သွားမခေါ်လိုက်နဲ့ဗျို့"

"သဟာလောက်တော့ အထာပေါက်ပြီးသားပါ ရဲဘော်ဦးညီပုကြီးရာ"

ဘိုးညီတင့်ကရွာမှာအောင့်ထားရသမျှ အားရပါးရ ရဲဘော်တွင်တွင်ကြီးခေါ်တော့တာဘဲ။

ဦးညီပုကြီးက "ဟုတ်မဟုတ်တော့မသိဘူး ဘိုးညီတင့်ရဲ့။ ရဲဘော်နဲ့ပတ်သက်လို့ မဆလခေတ်မှာ ပုံပြင်တပုဒ်ရှိခဲ့ဖူးတယ်ဗျ"

"အလင်း ပြပါအုံးရဲဘော် ဦးညီပုကြီးရ"

"ဒီလိုဗျာ ဟိုတုန်းက ကွန်မြူနစ်တွေက ပကာသနကို အရင်းရှင်ယဉ်ကျေးမှုဆိုပီး ပစ်ပယ်ကြသတဲ့။ကွန်မြူနစ်ခေါင်းဆောင်ကြီးတွေဟာပြည်သူနဲ့အတူနေ။ရဲဘော်တွေနဲ့ အတူအိပ် အတူစား တသားထဲနေကြသတဲ့။ သူတို့ကို ဗိုလ်ချုပ်ကြီး တပ်ချုပ်ကြီး အဘ စသဖြင့်ခေါ်တာမျိုး မကြိုက်ဘူးဆိုပဲ။ ရင်းရင်းနှီးနှီး ရဲဘော်လို့ဘဲခေါ်ရသတဲ့။ ရဲဘော်လီနင် ရဲဘော်စတာလင် ရဲဘော်မော်စီတုန်း အဲသလိုခေါ်ကြသတဲ့။စတာလင်မရှိတဲ့ နောက် ဆိုဗီယက်ရုရှမှာ ခရူးရှက်ခေါင်းဆောင်ဖြစ်လာတယ်။ နှစ်နိုင်ငံချစ်ကြည်ရေးအနေနဲ့ မြန်မာပြည်ဗိုလ်ချုပ်နေဝင်းဆီအလည်လာသတဲ့။ဗိုလ်ချုပ်နေဝင်းကလည်း မင်္ဂလာဒုံလေဆိပ်ကနေ ကော်ဇောနီခင်းကြိုဆိုသတဲ့။လေယာဉ်ပေါ်ကလည်းခရူးရှက်ဆင်းရော။လူထုကလမ်းဘေးဝဲယာကနေ ဆိုဗီယက်အလံတွေဝှေ့ယမ်းသောင်းသောင်းဖျဖျ ကြိုဆိုရသတဲ့။

ပကာသနမကြိုက်ဘူးသာပြောတာ ခရူးရှက်ကြီးကသူ့အဲလိုကြိုဆိုတော့ ပြုံးပြုံး ပြုံးပြုံးနဲ့ လမ်းလျှောက်လာတယ်။ အဲဒီမှာ တယောက်က တိုင်ပေး ပြည်သူအားလုံးက ထုံးစံအတိုင်းလိုက်ဆိုကြရတယ်။

"ရဲဘော် ခရူးရှက် ကျန်းမာပါစေ။ရဲဘော်ခရူးရှက်ကျန်းမာပါစေ"ပေါ့။

ပြုံးပြုံးကြီးလမ်းလျှောက်လာတဲ့ခရူးရှက်ဟာ "ရဲဘော်ခရူးရှက်"လို့အော်လိုက်တိုင်း မျက်နှာကြီးရှုံ့ ခြေလှမ်းတွေတွန့်တွန့်သွားသတဲ့။ဘာလို့အဲလိုဖြစ်ဖြစ်သွားတာပါလိမ့်လို့လူတွေကအစက သဘောမပေါက်ကြဘူး။နောက်မှသိရတာက မရိုသေ့စကားဘိုးညီတင့်ရယ် "ရဲဘော်"ဆိုတဲ့စကားရဲ့အသံထွက်က သူတို့ရုရှလို "ဖာခေါင်း"လို့ အဓိပ္ပာယ်ရသတဲ့ဗျ။"

လူတယောက်ကို"ရဲဘော်"လို့ခေါ်ချင်ရင် မြန်မာအဓိပ္ပာယ်နဲ့ခေါ်ရမလား။ရုရှအဓိပ္ပာယ်နဲ့ခေါ်ရမလား။ဦးညီပုကြီးနဲ့တွေ့မှ ဘိုးညီတင့်ခမျာ ဦးနှောက်စားသွားပါတော့တယ်။ ။။

ရဲဘော် ဘိုးညီတင့်