ဦးလှရွှေ(ခ)ဦးအောင်သာ (ဘိုကလေး၊ ငွေသောင်ယံ၊ မရမ်း/ကျီးပင်စု)
ဦးလှရွှေ(ခ)ဦးအောင်သာ (ဘိုကလေး၊ ငွေသောင်ယံ၊ မရမ်း/ကျီးပင်စု)
(ကိုယ်တိုင်ရေး ဘ၀အကျဉ်း) မိုးမခ၊ ဇူလိုင် ၁၆၊ ၂၀၂၁
ကိုသီဟလတ်၏ မှတ်စု - ဦးလှရွှေ(အောင်သာPPP) ဇူလိုင်၁၅၊ ညနေ ၇နာရီ ၁၇ မိနစ် မှာဆုံးသွားပါပြီ။
သူ့ဇနီး အန်တီဒေါ်ခင်မာအေးက (၁၁-၄-၂၀၀၆)မှာဆုံးပါတယ်၊ ၂၀၁၂ လောက်မှာ ဦးလှရွှေ ကကျွန်တော့်ကို မိတ္တူကူးထားတဲ့ စာရွက် ၃ ရွက်ပေးပါတယ်၊ သူ့ကိုယ်သူစိတ်မချတော့လို့ထင်ပါတယ်။ သူ့ဆန္ဒတွေဖြည့်ဖို့ အခြေအနေကမပေးတော့၊ စိတ်မကောင်းစွာနဲ့ပဲ သူ့စာကိုဖေါ်ပြလိုက်ပါတယ်။ (စာထဲကအတိုင်း ဦးလှရွှေမွေးနေ့က မြန်မာသက္ကရာဇ် ၁၂၉၉ ခုနှစ် တန်ဆောင်မုန်းလဆန်း ၁၂ရက်ဆိုရင် ၁၄-၁၁-၁၉၃၇ ဖြစ်ပါလိမ့်မယ်)
ဦးလှရွှေ(ခ)အောင်သာ (PPP)
၁။ လူမှုရေး၊ ပညာရေးနှင့် ဘဝဖြစ်စဉ်အကျဉ်း
- ဖျာပုံခရိုင်၊ ဘိုကလေးမြို့နယ်၊ ကျီပင်စုကျေးရွာဇာတိ။
- အဖ- ဦးချစ်ညွန့် (အလုံ၊ မုံရွာ၊ ကံကြီးရွာ)၊ အမိ- ဒေါ်ကြွေ (တိုက်ကြီး၊ ဘောလယ်ကျွန်း)တို့က ၁၂၉၉ ခုနှစ်၊ တန်ဆောင်မုန်းလဆန်း (၁၂) ရက်နေ့တွင် မွေး၊ (၁၄-၁၁-၃၈)၊ ဇာတာနာမည်- အောင်ခင်ညွန့်။ မိဘများ- လယ်ကူလီများဖြစ်။
- မိမိ (၆) နှစ်သား၊ စစ်အတွင်း အမေ ဆုံး၊ အဖေက ဂျပန်ချွေးတပ်ထဲ ပါသွား။ စစ်အပြီး အဖေ ရွာပြန်ရောက်။ မိမိကိုခေါ်ပြီး ဘိုကလေး တက်လာ။ နေစရာ၊ ကျွေးစရာ မရှိလို့ ဘုန်းကြီးကျောင်းပို့ထား။ မွေးချင်း— ကျား-၂၊ မိမိ အကြီး။ အဖေ တတိယအိမ်ထောင်များ ထူထောင်၊ ပရဆေးရောင်း။ ၁၉၆၈ လောက်မှာ ချောင်လည်လာ။
- ပညာရေး— ၁၉၄၆-၄၇၊ ဘုန်းကြီးကျောင်း ‘အ’သုံးလုံးသင်။
- ၁၉၅၀-၅၁ မှာ၊ မြို့လယ်ဓမ္မာရုံ အစိုးရမူလတန်းကျောင်းမှ မူလတန်းအောင်။
- ၁၉၅၁-၅၇ မှာ ၁၀ တန်းအောင်၊ ဘိုကလေး အစိုးရအထက်တန်းကျောင်း။
- ၁၉၅၈-၆၁ မှာ ရန်ကုန်တက္ကသိုလ်မှ ဝိဇ္ဇာတန်း (သမိုင်း သုံးဘာသာတွဲ) အောင်။ ဥပဒေဝိဇ္ဇာတန်း ဆက်တက်၊ မပြီး။
- ကျောင်းစရိတ်ရဖို့ လူငယ်သိပ္ပံ(ညကျောင်း) လှည်းတန်း၊ စံရိပ်ငြိမ်မှာ JAT လုပ်။
- ၁၉၆၂၊ ဇူလိုင်လ ၅ ရက်နေ့၊ ကျောင်းသူခေါင်းဆောင်တဦး ဖြစ်တဲ့ ဒေါ်ခင်မာအေး(ပအို့ဝ်၊ တောင်ငူ) နဲ့ လက်ထပ်ခဲ့။
- ၁၉၆၂ ဇူလိုင်လ ၇ ရက်နေ့၊ ကျောင်းသားအရေးတော်ပုံဖြစ်၊ ဝရမ်းပြေးနေရ။ (၁၁-၆-၆၃) မှာ လွတ်-ငြိမ်း အမိန့်ထွက်။ မိသားစုနဲ့ ပြန်ဆုံရ။ B.L. ဆက်တက်တက်။ ဇနီးက D.T တက်။ ကျားစံပြကျောင်း၊ ကမာရွတ်၊ ဝင်းပညာရိပ်သာ၊ သာကေတတို့မှာ SAT လုပ်။
- ၁၉၆၄၊ ကမာရွတ် (၂) ကျားစံပြ အထက်တန်းကျောင်းမှာ ကျောင်းအုပ်ဖြစ်လာ။
- ၁၉၆၃၊ Peace Talk ပျက်။ ထင်ရှားတဲ့ အခြားကျောင်းသားခေါင်းဆောင်များနှင့်အတူ A.S အတွင်း ပါခဲ့။ ၁၉၆၃-၁၉၇၂ အထိ။
- ရွှေလဝင်း စဆရ၊ အဆင့် ၂/၃ အတွင်း ၁၉၆၉၊ အောက်တိုဘာထဲမှာ အဝိုင်းခံရ၊ ဖမ်းမိ။ စစ်ကြောရေးလုပ်၊ မြောင်းမြစစ်ကြောရေးစခန်းမှာ ၃ နှစ် ချုပ်ထား။ ရန်ကုန် MI-6 (ထောက်-၆) ထံ လွှဲ၊ ၆ လချုပ်၊ စစ်မေး၊ သတင်းစာရှင်းလင်းပွဲ မလုပ်လို့ ဆက်ချုပ်။ ၂၂-၁-၁၉၇၂ နှစ်ဦးကျမှ လွှတ်။
- ၁၉၇၂၊ ဧပြီမှာ မိသားစုနှင့် ပြန်ဆုံခွင့်ရ။
- ၁၉၇၂ မှ ၁၉၉၈ နှစ်ဦးအထိ ကြက်မွေးမြူရေးလုပ်ငန်းဖြင့် အသက်မွေးခဲ့။
- ၁၉၈၅ မှာ HGP ဖြေဆိုအောင်မြင်။
- သား - ၂၊ သမီး-၁။ အခု အားလုံး အိမ်ထောင်သည်များ။ စုစုပေါင်း မြေး ၇ ယောက်၊ ကျား (၃)၊ မ (၄)။
- ဇနီးသည် ဒေါ်ခင်မာအေး (၁၁-၄-၂၀၀၆) မှာ နှလုံးရောဂါဖြင့် ကွယ်လွန်ခဲ့။ အခု သမီးငယ်နှင့် သူ့သမီး မြေးကလေးများနှင့် အတူနေ။
(၂) နိုင်ငံရေးဘဝဖြတ်သန်းမှုများ
၁။ ၁၉၅၃-၆၃ အထိ ကျောင်းသားလှုပ်ရှားမှုထဲမှာ ပါဝင်ခဲ့။
- ၁၉၅၃ ခုနှစ်မှစပြီး ကျောင်းသားလှုပ်ရှားမှုထဲမှာ ပါခဲ့။
- ၁၉၅၄-၅၆ ဗကသများအဖွဲ့ချုပ်၊ ဘိုကလေးမြို့နယ် ကျောင်းသားသမဂ္ဂအတွင်းရေးမှူးချုပ်။
- ရန်ကုန်-ကြည့်မြင်တိုင် အနောက်တိုင်းကျောင်း ကျောင်းသားများသမဂ္ဂ G.S အတွင်းရေးမှူး။
- ၁၉၅၆-၅၇၊ R.U၊ ထီးတန်းကောလိပ်ရောက်။
- ထီးတန်းကျောင်းဆောင် သဟာယနှင့် စာဖတ်အသင်း Social And Reading Club (S and R) အတွင်းရေးမှူး။
- ထီးတန်းကောလိပ် ကျောင်းသားညီညွတ်ရေးတပ်ဦး စည်းရုံးရေးမျူး။ R.U, The Student United Front (SUF) တာဝန်ခံစည်းရုံးရေးမှူး။
- ၁၉၅၇-၅၈၊ ပဲခူးဆောင် (S and R), G.S ၊ မန္တလေးဆောင် SUF ကောင်စီဝင်။
- ၁၆၅၉-၆၀ S.R. အဖွဲ့ချုပ်၊ G.S ၊ R.U ကျောင်းဆောင်ကော်မတီ (တကသ) ကိုယ်စားလှယ်။ (ဦးခွန်ဝင်းလှိုင်နှင့်အတူ)
- တကသ အမှုဆောင် အိုးဝေမဂ္ဂဇင်းအယ်ဒီတာ။
- ကျောင်းသားညီညွတ်ရေးတပ်ဦး အထွေထွေအတွင်းရေးမှူး (ဥက္ကဋ္ဌ ဦးညိုဝင်း)
- ဗမာနိုင်ငံလုံးဆိုင်ရာ ကျောင်းသားသမဂ္ဂများအဖွဲ့ချုပ်။
All Burma Federation of Students’ Union (ABSFU)၊ ၆ ကြိမ်မြောက် ကွန်ဂရက်မှ အတွင်းရေးမှူးအဖွဲ့ဝင်အဖြစ် ရွေးချယ်တင်မြှောက်ခံရ။
- ပြည်တွင်းငြိမ်းချမ်းရေးဆွေးနွေးပွဲပျက်၊ ၁၉၆၃ နိုဝင်ဘာ (၁၄) မှာ တက္ကသိုလ်များပိတ်ကြောင်း စစ်အစိုးရက ကြေညာခဲ့။ မိန်းကလေးဆောင်များ အပါအဝင် အာဏာဖီဆန်မှုတိုက်ပွဲကို ၂၂-၁၁-၆၃ နေ့အထိ ခေါင်းဆောင်ခဲ့။ (မိမိ၊ ကိုလှကြည်(ဘိုကလေး)၊ ကိုထွန်းကြည်(ဆေးသိပ္ပံ)တို့ နှင့်အတူ) ရပ်တည်ခဲ့)။ ဆရာကြီး သခင်ကိုယ်တော်မှိုင်းရဲ့ မေတ္တာရပ်ခံမှုကြောင့် R.U နယ်မြေမှ ဆုတ်ပေးခဲ့။
- ၁၉၆၃ ခုနှစ် (၂၂-၁၁-၆၃)၊ ငြိမ်းချမ်းရေးဆွေးနွေးပွဲပျက်အပြီး လူဖမ်းပွဲ ကျင်းပနေသဖြင့် အခြား ကျောင်းသားခေါင်းဆောင်များနှင့်အတူ A.S အတွင်း ပါဝင်ခဲ့။
- ၁၉၆၃ မှ ၁၉၇၂ အထိ A.S အတွင်း ပါခဲ့။
- ၁၉၆၃ မှ ၁၉၇၂ အထိ A.S ထဲမှာ ပါဝင်လှုပ်ရှားခဲ့။
၃။ CBP နှင့်ပတ်သက်သည့် နိုင်ငံရေးဖြတ်သန်းမှုများ
- ၁၉၅၃ တွင် CP-UG ဖျာပုံခရိုင်နှင့် အဆက်အသွယ်ရ၊ လေ့လာရေးအစုဝင် ဖြစ်လာ။
- R.U တက်တဲ့အခါ R.U-UG အစုထံ လွှဲပေးခဲ့။
- ၁၉၅၇-၅၈ မှာ PM ဖြစ်လာ။
- ၁၉၅၇-၅၈၊ ထီးတန်း Cell ၊ ၅၈-၅၉ Central Hall ၊ ၁၉၅၉-၆၀ New Hall Cell များရဲ့ အတွင်းရေးမှူး တာဝန်ယူရ။
- ၁၉၆၂-၆၃ မှာ ကျောင်းသားအစု Leading Cell Member (L.C.M.) ဖြစ်လာ။
- ၂၂-၁၁-၆၃ တွင် အခြားကျောင်းသားခေါင်းဆောင် ၄ ဦးနှင့်အတူ C.P.B ဖျာပုံခရိုင်သို့ ဆုတ်ခွာခဲ့။
- ၁၉၆၄ ခုနှစ်၊ ဇူလိုင် ၇ ရက်နေ့တွင် CPB Delta ROC ရုံးသို့ ရွှေ့ခဲ့။ D.ROC စခန်းတွင် (အစိုးရနယ်မြေ) GCA မှ ဆုတ်ခွာလာသည့် လုပ်ငန်းစုအမျိုးမျိုးမှ ရဲဘော်များ တပ်စုတစုစာ စုစည်းမိ။ အထူးစစ်ရေး၊ နိုင်ငံရေးသင်တန်းများ တက်ရောက်ကြရ။
- ၁၉၆၆ ခုနှစ်အတွင်းတွင် ရန်သူ့ဒေသ အထူးကေဒါများ တည်ဆောက်ရေးလုပ်ပြီး တာဝန်ခွဲဝေရေး အစည်းအဝေး ဆက်လုပ်။ ကျရာဒေသများသို့ ခရီးထွက်ကြရ။
- မိမိက မြို့နယ်စည်းရုံးရေးကော်မတီ TOC အဆင့်နှင့် ဖျာပုံခရိုင် ပါတီရုံးအုပ်တာဝန်ယူရ။ ၁၉၆၆-၆၈ အထိ ရုံးအုပ်။
- ၁၉၆၈-၆၉ ခုနှစ်၊ ဘိုကလေးမြို့နယ်ခွဲ၊ မြို့နယ်မှူး။ ငွေသောင်ယံဒေသ (ကေအန်ယူနဲ့) မြို့နယ် မဒညတ ပူးတွဲကော်မတီ (အလံနီ)နဲ့ မြို့နယ်သုံးပါတီ ပူးတွဲကော်မတီဝင် တာဝန်များယူခဲ့။
- ၁၉၆၈-၇၀ အတွင်း၌ ဖျာပုံခရိုင်၊ ထော်ပိုင်ဒေသအတွင်း၊ ရွှေလင်းယုန် မိုးဟိန်းစစ်ဆင်ရေးများ၊ ရွှေလဝင်းစစ်ဆင်ရေးများကို ရင်ဆိုင်ခဲ့ရ။
- ၁၉၆၉ ခုနှစ်အကုန်မှာ DOC အတွင်းရေးမှူး ဦးအေးကျော်နဲ့ ခရိုင်တပ်မှူး ဗိုလ်ဆန်းတို့က စတင်လက်နက်ချသွားကြ။
- ၁၉၆၉ ခုနှစ်၊ အောက်တိုဘာ ၂၄ မှာ ထော်ပိုင်အဖျား၊ ၁၃ ရေးရိုးခွင်မှာ မြို့နယ်ဥက္ကဋ္ဌ ဦးမြလင်း အဖွဲ့နှင့် မိမိတပ်စုပါ ဝိုင်းမိ၊ အညံ့ခံရ။ မြောင်းမြစစ်ကြောရေးစခန်းမှာ L.A နှင့်ဆိုင်တဲ့ ကိစ္စများ စစ်ဆေးအပြီး ၃ နှစ် ချုပ်ထားခံခဲ့ရ။ ၂၂-၃-၇၂ ခုနှစ်ကျမှ MI-6 က လွှတ်ပေးခဲ့။
၄။ ထောင်တွင်းဖြတ်သန်းမှုများ
၁၉၅၉ ခုနှစ် အောက်တိုဘာမှ ၂၀၀၆ ခုနှစ် (၇-၇-၂၀၀၆) အထိ ထောင် ၆ ကြိမ်၊ ၂၆ နှစ်နီးပါး ထောင်ကျခံခဲ့ရပါတယ်။
၁။ ၁၉၅၉ ခုနှစ်၊ အောက်တိုဘာထဲမှာ ရဲဘော်လှကြည်နဲ့အတူ ဖျာပုံခရိုင် ကျောင်းသားသမဂ္ဂ ညီလာခံသို့ သွားရောက်ခေါင်းဆောင်ရင်း ပုဒ်မ (၅) ဖြင့် အဖမ်းခံရ။ စစ်အချုပ်မှာ ၆ လခန့် ချုပ်ထားခံခဲ့ရ။
၂။ ၁၉၆၉ ခုနှစ်၊ အောက်တိုဘာ ၂၄ မှာ ထော်ပိုင် စစ်မြေပြင်မှာ ဝိုင်းပိတ်အဖမ်းခံရ။ ၃ နှစ်ခန့် ချုပ်။
၃။ ၁၉၇၆ ခုနှစ်အတွင်း Rgn UG နှင့် အဆက်ရ။ မြစ်ဝကျွန်းပေါ်မှာ A.S ပြန်လုပ်ရန် (အလယ်/ဗဟိုနှင့် ဆက်သွယ်၊ ဇော်ဦး ဖော်ခဲ့။)
၁၉၈၂ မတ်လ ၂၂ မှ ၁၉၈၅ မတ်လအထိ ပုဒ်မ ၅(ည)နဲ့ ၃ နှစ်။ UG ခေါင်းဆောင် ဇော်ဦး (ဖမ်းမိ) ဖော်တာကြောင့် လူ ၂၇၀ ခန့် အဖမ်းခံရ။ စစ်ကြောရေးမှာ ၇၀ ကျော်လွတ်။ တရားခံ ၇၆ ယောက်၊ အနှစ် ၂၀၊ ၁၀၊ ၅၊ ၃ နှစ်စီ ထောင်ကျခံကြရ။ ပုဒ်မ- ၁၂၂(၁)၊ ၅(ည)နဲ့ ပြစ်ဒဏ်ချ။ မိမိ ပြင်းပြင်းထန်ထန် နှိပ်စက်ညှဉ်းပန်းခံရ။ ထောင် ၃ နှစ်ကျ၊ အပြည့်နေရ။
၄။ ၁၉၇၆ ဝါဝါထွန်း သူလျှိုလုပ်၊ သတင်းပေး၊ ၂၃ ဦး၊ ဘာအထောက်အထားမှ မရ၍ ပုဒ်မ ၁၀(က) ဖြင့် ၃ နှစ် ပိတ်ထားခဲ့။ ၁၅-၇-၈၈ မှာ ပြန်လွှတ်ပေး။ ၈၈ လှုပ်ရှားမှု ဖြစ်နေ။
၅။ ၁၉၈၉ အာဏာဖီဆန်ရေးလှုပ်ရှားမှုဖြင့် ဖမ်း။ စစ်ခုံရုံးဖြင့် ချ (၇) နှစ်။ မန္တလေးထောင်ဟောင်း (သီးသန့်)နဲ့ အိုးဘိုထောင်သစ်မှာ နေရ။ ၆ နှစ်ကျော် နေရ။
၆။ ကျောင်းသားလှုပ်ရှားမှုသမိုင်း ပြုစုရာမှာ ပါဝင်လို့ ၂၀-၂-၈၉ မှာ သခင်အုန်းမြင့် အပါအဝင် ကျောင်းသားခေါင်းဆောင်ဟောင်းများနှင့်အတူ အဖမ်းခံရ။ အထူးရုံးဖြင့်ချ။ ပုဒ်မ ၅(ည)၊ ပုံနှိပ် ၁၇/၂၀ ဖြင့် ပြစ်ဒဏ်ချ။ ၁၄ နှစ်တည်။ ထောင်ထဲမှာ ၉ နှစ်နီးပါး နေရ။ ၄၀၁(၁) သုံးကြိမ် လက်မှတ်ထိုးခိုင်း၊ ငြင်းပယ်ခဲ့။ ၇-၇-၂၀၀၆ မှာ ပြန်လွှတ်ပေး။
၇။ ဇနီး ဒေါ်ခင်မာအေး၊ ၁၉၆၇ ဇူလိုင် ၂၃၊ ဘခက်(မြခက်ရှိန်) ဖော်လို့ ရေကြည်အိုင် ထောက်လှမ်းရေးစခန်းမှာ ၄ နှစ်ကျော် ထိန်းသိမ်းခံရ။ Electric Shock ဖြင့် ၆ လခန့် ညှဉ်းပန်းခံရလို့ မိန်းမဘဝ ဆုံးရှုံးသွား။ ကိုယ်ဝန်မဆောင်နိုင်တော့။
၁၉၉၃ မှာ အမျိုးသားညီလာခံ ဆန့်ကျင်တဲ့ ကြေညာချက်ထုတ်ရာမှာ ပါလို့ ၅(ည) ဖြင့် ၃ နှစ် ထောင်ချခဲ့။
၈။ သားကြီး ဆက်အောင်နိုင်(၄၃ နှစ်)။ ကျောင်းသားလှုပ်ရှားမှုထဲ ပါလို့ ၅(ည) ဖြင့် ထောင် ၃ နှစ်။
၁၉၉၅ (၄ နှစ်)၊ ၁၉၉၈ – ပုဒ်မ ၅(ည)၊ ပုံနှိပ် ၁၇/၂၀ နဲ့ စွဲချက်တင်၊ ထောင် ၂၁ နှစ် ကျခံရ။ အိမ်ထောင်သည်။ သမီးတယောက် အဖေ၊ ထိုင်းဘက်ထွက်၊ ဘယ်ရောက်မှန်း မသိ။
၉။ သားငယ် ဆက်အောင်ခိုင် (၄၂ နှစ်)။ ၂၅-၉-၈၈ မှာ ထိုင်းထွက်။ ABSDF တပ်ရင်း ၂၀၆ တပ်ရင်းမှူး၊ မိုးသီးဇွန် အုပ်စု။ ၁၉၉၂ ထိုင်းမှာ အိမ်ထောင်ကျ။ USA ထွက်ခွင့်ရ။ အိမ်ထောင်သည်။ သား ၃ ယောက်။ အခု USA ကွန်နီတင်ကပ်မှာရှိ။ အဆက်အသွယ် မရ။
၁၀။ သမီးငယ် နေခြည်ဦး(ခ)မေဇွန်ဦး ရဲ့ ခင်ပွန်း မျိုးအောင်နိုင်(ခ)အောင်နိုင် (မင်းကိုနိုင်ရဲ့ ညီတဝမ်းကွဲ)။ ၈၈ မျိုးဆက်ကျောင်းသား။ ၂၀၀၇ စက်တင်ဘာ သံဃာလှုပ်ရှားမှုထဲ ပါခဲ့။ မင်းကိုနိုင်နှင့်အတူ ထောင်ဒဏ် ၆၅ နှစ် ကျခံနေရ။ ကလေးထောင်မှာရှိ။ သမီးငယ် ၈ နှစ်သမီးရှိ။
အချုပ်
မိမိအသက် အခု ၇၄ နှစ်ထဲ ရောက်နေပြီ။ ထောင် ၆ ကြိမ်၊ ၂၆ နှစ်နီးပါး ထောင်ကျခဲ့။ အိမ်ထောင်သက် ၄၆ နှစ်အတွင်း ဇနီးသည်၊ မိသားစုနှင့် နှစ် ၃၀ အတူမနေခဲ့ရ။
၅။ ရှစ်လေးလုံး လှုပ်ရှားမှုအတွင်း ၁၀(က) ဖြင့် ၃ နှစ်ချုပ်ထား။ ၁၅-၇-၈၈ နေ့မှာ ပြန်လွှတ်ပေးခဲ့။
- ၁၉၈၈ ခုနှစ်၊ ဩဂုတ်လ ၂၂ ရက်နေ့မှာ ဦးခင်မောင်မြင့်၊ ဦးညိုဝင်း၊ ဦးတင်မောင်ဝင်း (ခရမ်း NLD လွှတ်တော်ကိုယ်စားလှယ်)တို့နှင့်အတူ စစ်ပြီးခေတ်နဲ့ လွတ်လပ်ရေးခေတ် ကျောင်းသားခေါင်းဆောင်များအစု ဖွဲ့စည်းပြီး ၈၈ ဒီမိုကရေစီလှုပ်ရှားမှုထဲ ပါဝင်ခဲ့။
- ၇၀ နှစ်ပြည့်အလွန် နိုင်ငံရေးထောင်ကျများအစုနှင့် ပူးပေါင်းခဲ့ကြ။
- ၈၈ အရေးတော်ပုံအတွင်း ပေါ်ထွက်လာတဲ့ ကျောင်းသားသမဂ္ဂကြီး ၉ ခုရဲ့ ဖိတ်ကြားချက်အရ ဗကသများအဖွဲ့ချုပ်၊ ပြန်လည်ဖွဲ့စည်းသည့် ကျောင်းသားထုအစည်းအဝေးကြီးတွင် ဖိတ်ကြားချက်အရ (ဗကသများအဖွဲ့ချုပ် ၆ ကြိမ်မြောက် ညီလာခံကြီးက ရွေးကောက်တင်မြှောက်ခဲ့သည့် ABFSU အမှုဆောင်အတွင်းရေးမှူး အဖွဲ့ဝင်တဦးအနေဖြင့်) တကသ မြက်ခင်းပြင်မှာ မိန့်ခွန်းပြောကြားခဲ့။ ၂၈-၈-၈၈ တကသ အဆောက်အဦဟောင်း မြက်ခင်းပြင် တက္ကသိုလ်နယ်မြေ၊ မိန့်ခွန်းကို ဥက္ကဋ္ဌ မင်းကိုနိုင်ထံ ပေးအပ်ခဲ့။
- ဗိုလ်အောင်ကြီးက ၂၄ ဩဂုတ်လ၊ စမ်းချောင်း ပဒုမ္မာကွင်းမှာ မိန့်ခွန်းပြော။ ဒေါ်စုက ၂၆-၈-၈၈ ရွှေတိဂုံအနောက်မုခ် လူထုအစည်းအဝေးကြီးမှာ မိန့်ခွန်းပြောကြားခဲ့။ ၁၈-၉-၈၈ မှာ စစ်တပ်က တတိယအကြိမ် အာဏာသိမ်း။
၂၄-၄-၉၂ မှာ ဗိုလ်စောမောင်ကို ဗိုလ်သန်းရွှေက စတုတ္ထအကြိမ် အာဏာသိမ်းခဲ့။
- ၁-၁၁-၈၉ ခုနှစ်မှာ ဦးခင်မောင်မြင်နဲ့အတူ ပီသုံးလုံးပါတီ ထူထောင်ခဲ့။ ပီသုံးလုံး G.S တာဝန်ယူခဲ့။
- (၂၈-၂-၈၉၀ မှာ (ဒီမိုကရေစီ မဟာမိတ်များအဖွဲ့ - ဒ.မ.ဖ) ကို ဒီမိုကရေစီပါတီ ၁၇ ပါတီနဲ့ စုစည်းဖွဲ့စည်းခဲ့။
- (ဒ.မ.ဖ) ၁၇ ပါတီ လူမျိုးစုအဖွဲ့ချုပ် ၂၂ ပါတီ၊ ဒီမိုကရေစီပါတီနဲ့ ဒီ-ချုပ်တို့ စုစည်းပြီး ‘၄၁ ပါတီ မဟာမိတ်အဖွဲ့’ကို ၆-၆-၈၉ မှာ ဖွဲ့စည်း။ အဖွဲ့ဝင် ၉ ဦးပါ E.C ဖွဲ့။ ဒီ-ချုပ်မှာ ဗိုလ်ချုပ်ကြီးတင်ဦး၊ ဦးဝင်းဝင်၊ ဒ.မ.ဖ မှ ဗိုလ်အောင်နိုင်၊ ဦးလှရွှေ၊ ဆရာဒွန်း၊ မူဆလင်ပါတီစုမှ ဦးအေးသာအောင်၊ ခွန်တင်ရွှေ၊ ဦးကြီးမြင့်(ကျူရှင်ဆရာ)၊ ဦးစိုးမင်း(ဗလစ) တို့ ပါ။
- တပ်ပေါင်းစုရုံးအဖွဲ့ - ဦးလှရွှေ၊ ဦးဝင်းတင်၊ ဦးအေးသာအောင်၊ ခွန်တင်ရွှေ၊ ဦးကြီးမြင့်တို့ ပါဝင်ကြ။
- ၂၁-၆-၈၉ ရက်နေ့မှာ NLD HQ ရုံးမှာ ‘အာဏာဖီဆန်ရေး’ ကြေညာချက် ၈၇-ပါတီ လက်မှတ်ထိုး ကြေညာရာမှာ ပီသုံးလုံး ကိုယ်စား လက်မှတ်ထိုးခဲ့။
- ၂၅-၆-၈၉ နေ့ည ၁၀ နာရီ ၃၀ မိနစ်မှာ ဦးလှရွှေ၊ ဦးခင်မောင်မြင့်(ပီသုံးလုံး)၊ ဒေါက်တာမောင်မောင်ကျော်၊ NLD မှ ဦးဝင်းတင်၊ မင်းသားကြီး ဦးအောင်လွင်၊ ဒီမိုကရေစီပါတီမှ နောင်ရိုးဦးတင်ဝင်း(မာလာ) တို့ စတင်ဖမ်းဆီးခံရ။
- ၂၀-၇-၈၉ ရက်နေ့ ဒေါ်စု၊ ဦးတင်ဦးနဲ့ ထင်ရှားတဲ့ ဒီမိုကရေစီရေး တက်ကြွသူများကို ဖမ်းဆီးထောင်ချ ထိန်းသိမ်းခဲ့။
- မိမိကို ၂၂-၁၂-၈၉ မှာ ရုံးတင်။ ပုဒ်မ ၅(ည) နဲ့ စစ်ခုံရုံး - ၅(က)၊ ၇ နှစ် ထောင်ကျ။
- မန္တလေးထောင်ဟောင်း၊ (တွဲဘက်) နန်းတွင်း။ ထောင်သစ်၊ အိုးဘိုရွာ(မတ္တရာမြို့နယ်)တို့မှာ ၆ နှစ် ၁ လကြာ နေခဲ့ရ။ ၂၅-၅-၉၅ မှာ ထောင်မှလွတ်။
၆။ အတွေ့အကြုံပေါ်မှ ရရှိသည့် ခံယူချက်များ
တန်းရှိတဲ့ နိုင်ငံရေးသမားဟာ
၁။ သမိုင်းခေတ်အပေါ်မှာ သစ္စာရှိရမယ်။
၂။ ပြည်သူလူထုကြီးအပေါ်မှာ သစ္စာရှိရပါမယ်။
၃။ မိမိကိုယ်ပေါ်မှာ သစ္စာရှိရပါမယ်။
၄။ (လက်တွေ့အရ) MSC အပေါ်မှာ သစ္စာရှိရပါမယ်။ (MSC - မာ့ခ်က်ဝါဒ၊ ဆိုရှယ်လစ်စနစ်နဲ့ CPB)
ဒီ ‘သစ္စာလေးပါး’ မမြဲရင် (အသက်ရှင်ရက် သေနေတာပါပဲ)လို့ ခံစားမိတယ်။
(၁) သေရင် - ကွယ်လွန်သူ ဦးချစ်ညွန့်၊ ဒေါ်ကြွေ (မရမ်း-ကျီးပင်စု)၊ ဘိုကလေးမြို့တို့၏ သားကြီး ဦးလှရွှေ(ခ)ဦးအောင်သာ (ဘိုကလေး၊ ငွေသောင်ယံ၊ မရမ်း/ကျီးပင်စု)လို့ ဖော်ပြပါ။
(၂) ဖြစ်နိုင်ရင် - PPP အလံလွှမ်း၊ ထည့်သင်္ဂြိုဟ်ပါ။ ခင်မာ့ ဓာတ်ပုံတပုံ ထည့်ပေးလိုက်ကြပါ။
t.me@moemaka
#MoeMaKaMedia
#WhatsHappeningInMyanmar