ကျော်လွင်အောင် - ကော့သောင်း ၊ သုံးဆူနဲ့ ဟွေ့မလိုင်း နေ့ရက်များ (၂)

(မိုးမခ) ဩဂုတ် ၁၆၊ ၂၀၂၀

8888 (3) ရနောင်းရောက်ကျောင်းသား (400 +) ခေါင်းဆောင်များအစည်းအဝေး

ရနောင်းကမ်းရောက်ပြီး နောက်တစ်နေ့ ပထမဆုံး မနက်ခင်းမှာ ရှေ့က ထွက်သွားတဲ့ အဖွဲ့ (ပြောင်ကြီး (ကိုမောင်မောင်သိန်း၊ ယခု အမေရိက) ၊ ကိုသောင်း(ဂျပန်မ)၊ ဝင်းကျော့မှူးနဲ့ မျောက်တို့အဖွဲ့)က ထားရစ်တဲ့ Hint "ကြီးငယ့် ဂိုထောင်၊ မနက် ဆယ်နာရီ" ကို ကိုဇော်နဲ့အတူ သွားခဲ့တယ်။

ကြီးငယ့် ဂိုဒေါင်

မဲတူးနေတဲ့ သစ်သားတိုင်တွေနဲ့ ဂိုထောင်ကြီး လေးဘက်ပွင့် အပေါ်ထပ် သစ်သားကြမ်းခင်း အကန့်မရှိ ဟောခန်းမကြီး ။ ကိုယ်တွေအရွယ် ကျောင်းသားတွေ ဟိုနားတစ်စု ဒီနားတစ်စု ခေါင်းချင်းဆိုင်လို့။

"ဟောဗျာ တွေ့ပါပေါ့" မောင်ကြက်ဂဠုန်ဆင်(ဝင်းကျော့မှူး) သူကျောပြင် ရှည်လျားလျားက ခေါင်ငုံ့ထားပစေဦး
ရောင်ထုံးက ပေါ်လွင်နေတယ် သူ့ကျောပြင် သွားဖက်လိုက်တော့မှ

" ဟာ ကိုလေး လာ လာ " ဆိုပြီး ဟိုဘက်ဒေါင့်နားရွှေ့ မေးခွန်းတွေ အတောင့်လိုက်ချွေတော့တာကိုး။

"ဘယ်နှစ်ယောက်ပါလဲ ။ကိုလေး လူစာရင်းပေး"

မုဒုံ+သံဖြူဇရပ်+ကျိုက္ခမီ နဲ့ မော်မြိုင်စုစုပေါင်း လေးဆယ် လောက်ရှိမယ်။

သူတို့ အကြောင်းမေးကြည့်တော့ ပြောင်ကြီး ခေါင်းဆောင်တဲ့ ကိုသောင်းတို့အဖွဲ့ (141 Group)က ဟတ်စွန်ဖန်ကမ့် camp မှာ နေရကြောင်း၊ မင်းနောင်နဲ့ အခြားမော်လမြိုင်က တချို့လည်းအဲဒီမှာရှိကြောင်းပြောတယ်။

ဒီရက်ပိုင်းအတွင်း ရနောင်းရောက် ကျောင်းသားလေးရာကျော် ရဲ့ ခေါင်းဆောင်တွေ အစည်းအဝေးလုပ်ဖို့ရှိပြီး
ကိုလေးလည်း တက်စေချင်ကြောင်းပြောပါတယ်။ အဲဒီနေ့ည ဂိုဒေါင်အစည်းအဝေးမှာ အားလုံးသိချင်တဲ့ ဆက်လုပ်ဖို့လုပ်ငန်းစဥ်တွေကို အစည်းအဝေးဆုံးဖြတ်ချက်နဲ့ တစ်ဖွဲ့ တစ်စည်းတည်း လုပ်သွားမှာဖြစ်ကြောင်း ရှင်းပြခဲ့။

နောက် သုံးလေးရက်မှာတော့ အစည်းအဝေးကို ရနောင်းမြို့ပိုင် ဂါဗင်နာ Governer ရုံးခန်းမမှာ ကျင်းပဖြစ်ပါတယ်။ ခန်းမ အပြင်အဆင် သောက်ရေချိုင့်/ဖန်ခွက်စတာတွေ snacks & Lunch စတာတွေ စီစဥ်ပေးပြီး ရနောင်း ဂါဗင်နာက အားလုံးကို နှုတ်ဆက် အခန်းတံခါး ကိုယ်တိုင်ဆွဲပိတ် ထွက်သွားပါတော့တယ်။

ပထမနေ့ ရနောင်းရောက် ကျောင်းသားစာရင်း စိစစ်။ တက်ရောက်လာတဲ့ ကျောင်းသားခေါင်းဆောင်တွေ ကျစ်လျစ် စုစည်း။ စီအီးစီ အဖွဲ့ဝင်စာရင်း ပြုစု ။ အတည်ပြု။ တစ်နေကုန်သွားပေါ့။ ညဘက် ခေါင်းဆောင်တွေ ညစာနဲ့ တည်းခိုဖို့ကအစ အပြည့်အစုံပါ။

ဒုတိယနေ့မှာတော့ လူမများတော့ မနေ့က အတည်ပြုတဲ့ စီအီးစီ 14 ယောက်ပဲ ရှိတော့တယ်။ ကော်မတီတွေဖွဲ့လို့ တာဝန်တွေ ခွဲဝေယူကြပေါ့။ လုပ်ရမယ့်အလုပ်တွေကို တို့တတွေချည်းပဲ လုပ်နေလို့မဖြစ်သေး။ (မဲဆောက်) သေဘောဘိုး(KNU နယ်မြေ)ကို ရောက်နေတဲ့ ကျောင်းသားတစ်သောင်းနီးပါးအဖွဲ့တွေနဲ့ ချိတ်ဆက်ဖို့ ဘယ်သူတွေသွားမလဲ ?။

ထွန်းထွန်ဝင်း
တင်ခက်
ထင်ကျော် နောက်?
ကိုယ် ... နာမယ်စာရင်းပေးလိုက်တယ်။

ဟုတ်တယ် ကိုယ်သွားရမယ် ။ ကရင်တော်လှန်ရေးနယ်မြေက ကျောင်းသားတွေနဲ့ ရနောင်းအဖွဲ့ ချိတ်ဆက်ဖို့ အပြင် အခြား အကြောင်းရင်း ကိုယ်မှာ အပြည့်အစုံ ရှိတယ် (နောက်တစ်ပိုင်းကိုရှု)။

ဒီလိုနဲ့ သွားရမယ့်နေ့မှာ ဘန်ကောက်-မဲဆောက် ခရီးစဥ် စထွက်တယ်။ စီစဥ်ပေးတဲ့အတိုင်း ရဲဖမ်းမယ့်အန္တရာယ်ကင်းအောင်တဲ့ တန်ဖိုးနည်း ဒေသတွင်းသွား ဘတ်စ်ကားကြမ်းကြီးပေါ် ထိုင်ခုံမဲ့ ကြမ်းပြင်မှာ သတင်းစာခင်း အိပ်ငိုက်ရင်း တစ်ညလုံး ကြက်အိပ်ကြက်နိုးပေါ့။ မိုးစင်စင်လင်းတော့ ဘန်ကောက်ရောက်ခဲ့ပေါ့ဗျာ။

တောသားလေးယောက် ယောင်နနနဲ့ မြင်သမျှ အဆန်းချည်း ။ တွိုင်းလက်က အထွက် မျက်နှာပါတခါတည်းသစ် ။ တွိုင်းလက်တစ်ရှုးတွေနဲ့ မျက်နှာသုတ်တော့ စက္ကူစတွေက ဟိုကပ် သည်ကပ် ဖြတ်သွားဖြတ်လာတွေက လူထူးလူဆန်းတွေလို ဝိုင်းကြည့်ကြ ။

ထွန်းထွန်းဝင်းကတော့ အများသုံးဖုန်းနဲ့ အလုပ်ရှုပ်နေတယ်။

သူ့မိန်းမရဲ့ ဦးလေးက ဦးရဲကျော်သူလေ ။ စီအာဒီဘီအဖွဲ့က။ သိပ်မကြာခင် တက္ကစီတစ်စင်းပေါ်ကဆင်းလာတဲ့ ချာတိတ်တစ်ယောက်က - အကိုတို့လား ၊ ကျနော် ဦးနုရဲ့မြေးပါတဲ့ ။ လိုက်ခဲ့ကြ ဆိုပြီး - AA House Hotel ကိုခေါ်သွား ဆယ်ထပ်ကျော်မြင့်တဲ့ အဆောက်အဦပေါ်က ခေါင်မိုးထပ် မှန်ကာအိမ်ကလေး ဦးရဲကျော်သူနဲ့အတူ စီအာဒီဘီ ဦးတင်မောင်ဝင်းတို့က ရင်းနှီးကြိုဆိုပြီး ရေမိုးချိုးခိုင်းလို့ သူ့ရေချိုးကန်ထဲဝင်စိမ်လိုက်တဲ့အခါ ကိုယ့်ဆီကထွက်တဲ့ ချွေးတွေဂျီးတွေနဲ့ ရေတွေမဲညစ်ကုန်လို့ ဖောက်ထုတ်ပြီးရေသစ်လဲပစ်ရသေး ... အဟေး။

သူတို့အောက်ထပ်က အခန်းနှစ်ခန်းမှာ အနားယူ ။ စားချင်တာမှာစား ။ ညနေမှာ စကားစမြည်ပြော ။ မှာစရာရှိတာမှာလို့ မနက်က လာကြိုတဲ့ကလေးကပဲ မဲဆောက်သွားမယ့် ကားဂိတ်ကို လိုက်ပို့ရှာတယ်။

မဲဆောက်-ဘန်ကောက် ဗီအိုင်ပီ ကားကြီးက အမြင့်ကြီး ။ အပေါက်မှာစောင့်နေတဲ့ ယာဥ်မယ်လေးက ချစ်စရာလေး ။ လက်မှတ်တွေပြတော့ နေရာတကျ လိုက်ပြပေးတယ် ။ အပေါ့အလေးသွားဖို့ ကားနောက်ဖက်ဆုံးကအိမ်သာခန်းကို ညွှန်ပြတယ် ။ ကားထွက်တော့ ကိုကာကိုလာတစ်ခွက်နဲ့ မုန့် တစ်ခုစီ လိုက်ဝေတယ်။ ကားကြီးက ငြိမ့်နေတာ ရှေ့ခုံနောက်ကျောက ကွင်းကလေးထဲ ထည့်ထားတဲ့ ကုတ် တစ်စက်မဖိတ်ဘူး။

မနေ့က အိပ်ရေးပျက်တဲ့ဒဏ်နဲ့ အိပ်ငိုက်ရင်း လွန်ခဲ့တဲ့ ငါးနှစ်ကျော် 1982 က "ကောလိပ်ကျောင်းသားသစ် ဖရက်ရှာ ဘဝမှာ ကျောင်းတက်ရင်း ကွန်မြူနစ်ဝါဒလေ့လာရေးအဖွဲ့ Communism Studying Group ထဲဝင် ၊ 'ပန်းဦးနေခြည်' ကဗျာစာအုပ် အမှုနဲ့ အင်းစိန်ထောင်မှာ တစ်လ၊ မော်လမြိုင်ထောင်မှာ တစ်နှစ်သုံးလ နေခဲ့ရတာတွေ အိပ်မက်နေခဲ့။

'ပန်းဦးနေခြည် 1982' ကဗျာ သုံးအုပ် အမှုနဲ့ အက်စ်ဘီတို့ ခရု ခါးတောင်းကျိုက်ဖမ်းခြင်း

8888 (4) - ကဗျာစာအုပ် ၃ အုပ်အမှု အက်စ်ဘီတို့ ခရု ခါးတောင်းကျိုက်ဖမ်းခြင်း

ရှစ်လေးလုံးအရေးနဲ့ လေးယောက်သား မဲဆောက်အသွား ကားပေါ်မှာ လွန်ခဲ့တဲ့ ငါးနှစ်ကျော် ကို သတိရနေမိတယ်။

၁၉၈၂ ဇွန်လရဲ့ မိုးစက်စက်ညမှာ 'ကိုယ်တို့နဲ့ ခဏလိုက်ခဲ့ပါ ' ဆိုပြီး ခေါ်သွားခံရတာ တစ်နှစ်ခွဲနီးပါး တောရဆောက်တည်ခဲ့ အကြောင်းက ...

မော်လမြိုင်ကောလိပ်မှာ ကျောင်းတွင်း ရေး/ထုတ်/ဖြန့် ။ ၁၉၈၀ ပြည့်နှစ်က 'အရှေ့လေ' ၁၉၈၁ 'မျှော်လင့်ခြင်းတေးသံ '။

၁၉၈၂ က ကိုယ်တွေအဖွဲ့ "ကွန်မြူနစ်ဝါဒ လေ့လာရေးအဖွဲ့ Communism Studying Group" က ထွက်တဲ့ 'ပန်းဦးနေခြည်' ကဗျာစာအုပ် ၃ အုပ်နဲ့ ပတ်သက်တဲ့ မော်လမြိုင်ကောလိပ်ကျောင်းသား ကိုယ်တွေအပါ ၁၁ ယောက်ကို အမ်အိုင် ၅ က ဖမ်း စစ်၊ SB ကိုလွှဲ ချာတာဖလိုက်နဲ့ ရန်ကုန်ပို့ ။ အင်းစိန်ထောင်မှာ တစ်လ စစ်၊ မော်လမြိုင်ထောင်ပြန်ပို့လို့ ထောင်တွင်းတရားရုံးမှာ ပုဒ်မ ၅(ည)နဲ့ အမှုစစ်လိုက်တာ တစ်နှစ်ကျော်ကြာတယ်။

အချုပ်ကြီးမှာ အန်ကယ်၊ ဆရာတော်၊ မျက်မှန်။ အထူးတိုက်မှာ ကိုကျော်သိမ်း၊ ဆရာရွှေရ။ ကြိုးတိုက်မှာ မြင့်ကျော်၊ အောင်ဆန်း။ ၅ ဆောင်ပေါ်မှာ ကျော်မြတ်ငြိမ်း ။ ဘေးမှာ ကိုယ် ။ တစ်ဖက်ဘေးမှာ ကိုအေးမင်း။ သူ့ဘေးက ကျော်ကျော်ညိမ်း။ တန်းစီ အိပ်ခဲ့ရတဲ့ ညပေါင်းများစွာလေ ။ ပြောရရင် ဆုံးမထင်တော့ ။

ထောင်ထဲမှာ ထူးထူးခြားခြား ရင်းနှီးမိတာ အန်ကယ်တို့အချုပ်ကြီးဆောင်က ဖိုသူကြီး ကျောက်ခဲ နဲ့ ထောင်ကျဆောင်က ကိုမန်းငြိမ်း(မောင်)တို့ပါ။

၁၉၈၃ အောက်တိုဘာလ ထောင်ကလွတ် ။ ကျောင်းပြန်အတက်မှာ ကျော်မြတ်ငြိမ်းကဆိုတယ် ။ KNU ဘက် သွားစို့ တဲ့။ ဟိုဘက်က ကမ်းလှမ်းသူက ထောင်ထဲက ခင်ခဲ့တဲ့ ကိုမန်းငြိမ်း(မောင်)ဆိုပဲ။ ကဲ ... သွားဆိုလည်း သွားတာပေါ့ဗျာ။

၁၉၈၅ အဖေဆုံးတယ် ။ စက္ကန်းရီးယား တက်နေတဲ့ ကိုယ်နဲ့ ညီ ၂ ယောက် ကျောင်းတန်လန်းနဲ့ ။ ကိုယ်မလိုက်ဖြစ်တော့ဘူး။

ကိုယ့်အဆောင်ကို သူ ကျော်မြတ်ငြိမ်း ရောက်လာတယ်။
"သွားတော့မယ်" တဲ့ မုတ်ဆိတ်တိုနှံ့နှံ့၊ လုံချည်အနွမ်းလေးဝတ်လို့ သွယ်ညွှတ်ညွှတ် ခန္ဓာကိုယ်လေးနဲ့ ကိုယ်ပေးလိုက်တဲ့ ပုဆိုးအသစ်လေး လွယ်အိတ်ထဲထည့် ။ အဆောင်ရှေ့ တိုက်ဝါကြီးနား ကုက္ကိုပင်အောက်မှာ နှုတ်ဆက်သွားတယ် ။

"လက်နက်ကိုင်တော်လှန်ရေး" လုပ်မလို့တဲ့ကွယ်။

သူ့ကို ကိုယ်ဘယ်တော့မှ ပြန်မတွေ့ရတော့ဘူး။

သူနဲ့အတူ သန်းဦး၊ အောင်ဆန်းနဲ့ ကောင်မလေးတစ်ယောက် ပါသွားတယ်ကြားတယ်။

နောက်ပိုင်း သတင်းရတော့ ကျော်မြတ်ငြိမ်း ရောဂါနဲ့ဆုံးပါး၊ အောင်ဆန်း က ဗကပ ဘက်ကူး၊ သန်းဦးက KNU တပ်မဟာ ၆ ဝေါလေမှာ ကျောင်းဆရာ၊ ကောင်မလေးက .... ။

ကဲ ... ၈၈၈၈ အရေး မဲဆောက်ကို မနက်လင်းအားကြီးမှာ လေးယောက်သား ကားပေါ် ကအဆင်း။ ကိုယ်တို့ခေါင်းဆောင် ထွနိးထွန်းဝင်းက ဖုန်းရုံထဲ KNU က ဗိုလ်မှူးစိုးစိုးတို့ဆီ ချိတ်နေတုန်း ကိုယ်တွေက လူခွဲပြီး ဖုန်းရုံနဲ့ ခပ်လှမ်းလှမ်းပေါ့။

ပက်ထရို ရဲနှစ်ယောက်နဲ့ဆုံ ။ ကိုယ်နဲ့ ထင်ကျော်ကို ရဲစခန်း ခေါ်သွားခဲ့ ။ တော်သေးလို ဟိုနှစ်ယောက်ကို သတိမထားခဲ့ကြ။ စခန်းက အချုပ်ထဲမထည့်ပဲ ထိုင်နေကြတုန်း တရုတ်တစ်ယောက် ဝင်လာ ကိုယ်တွေကို သူ့အိမ်ခေါ်သွား ။ လက်ဖက်ရည် မုန့်တွေကျွေးပြီး ဗိုလ်မှူးစိုးစိုးတို့ဆီ လိုက်ပို့ ။ လေးယောက်သားပြန်ဆုံ ။ ဗိုလ်မှူးနဲ့မိတ်ဆက်နေတုန်း ။ အိမ်ထဲဝင်လာတာက ကိုကျောက်ခဲ ။ ဟုတ်ပ ... မလမထောင်ထဲက ဖိုခေါင်း(သူကြီး)ကျောက်ခဲ။ သူ့နောက်ကဝင်လာသူက Dr. စင်သီယာမောင်၊ ဗိုလ်ကျောက်က ရင်းရင်းနှီးနှီး မိတ်ဆက်ပေးတော့ ကိုယ်က "ကျော်လွင်အောင်ပါ"

"အေး အမိုးတို့ပြောတာ ကြားဖူးတယ်"
"ကျော်မြတ်ငြိမ်း အရိုးကောက်ပွဲ လုပ်ပြီး အထိမ်းအမှတ် တခုခု. .. "
"နေပါစေ သူ ငြိမ်ချမ်းနေရာ ရှိပါစေ" အပြုံးလေးနဲ့ပြောတယ် သူ့အပြုံးက လေးစားဖို့ကောင်းတယ်။
ဗိုလ်ကျောက်တို့ကောင်းမှုနဲ့ စားသောက်ပြီး နာမည်ကြီး " သေဘောဘိုးစခန်း " လူတွေ တအုန်းအုန်းထနေတဲ့ စခန်းကြီးကို လေးယောက်သား ယောင်နနနဲ့ ရောက်ခဲ့ ရောက်ရှိခဲ့ . . . .

ဆက်ရန်
To be continued. . .
(5) 8888 - သေဘောဘိုး သို့မဟုတ် ဒီမို ပွဲစျေးတန်း