မောင်စွမ်းရည် - နယူးယောက် မြန်မာ စာဖတ်သူများအတွက် စာအုပ်အလှူ

(မိုးမခ) အောက်တိုဘာ ၂၈၊ ၂၀၂၀

အလှူတကာ့ အလှူတွေမှာ အသိတရားအလှူ (စာပေဒါန) ဟာ အမြတ်ဆုံးလို့ အဆိုရှိပါတယ်။ ဘုရားဟော ကျမ်းဂန်လာ ‘သဗ္ဗဒါနံ၊ ဓမ္မဒါနံ၊ ဇိနာတိ’ ဆိုတဲ့ စကားကို မှီးပြီး ပြောတာပါ။

အမေရိကန်ပြည်ထောင်စု၊ နယူးယောက်မြို့ကြီးမှာ Queens Libraries ဆိုတာ ရှိပါတယ်။ နယူးယောက်မြို့ရဲ့ မြို့နယ်တိုင်းမှာ ရှိတာပါ။ Queens ဆိုတာကြီးကလည်း အကျယ်ကြီးပါ။ ကွင်းစာကြည့်တိုက်မှာ မြန်မာ စာအုပ်စင် သီးခြားရှိဖို့ဆိုတာ ကျွန်တော်တို့ နယူးယောက် ဗမာလူထုက အတော်ကြာအောင် ကြိုးစားခဲ့ကြရပါတယ်။ Burma Point ဗမာအသင်းက ကိုဖိုးချမ်း၊ ကျောင်းသားခေါင်းဆောင် ကိုနေတင်မြင့် တို့နဲ့ စာရေးဆရာ မောင်စွမ်းရည် တို့ ဦးဆောင်ကြိုးစားခဲ့တာ ဖြစ်ပါတယ်။ ဖွင့်ပွဲမှာ ကျွန်တော်တို့ ဗမာဘက်က ကုလသမဂ္ဂဆိုင်ရာ အမြဲတမ်း ကိုယ်စားလှယ် မြန်မာသံအမတ်ကြီး ဦးဟောက်ဒိုဆွမ်း ပါဝင်အားပေးခဲ့သလို အမေရိကန်ဘက်ကလည်း ပြည်သူ့လွှတ်တော်ကိုယ်စားလှယ် ခေါ်မလား၊ မြို့နယ်အမတ်နဲ့ စာကြည့်တိုက် အကြီးအကဲများ တက်ရောက်အားပေးခဲ့ကြပါတယ်။

ကွင်း စာကြည့်တိုက်ကို ကျွန်တော်က ဈေးဦးဖောက်တဲ့အနေနဲ့ အမေရိကန်လူမျိုး ခရစ်ယာန် သာသနာပြု ဒေါက်တာဂျဒ်ဆင်(ယုဒသန်) ပြုစုတဲ့ အင်္ဂလိပ်-မြန်မာ အဘိဓာန်နဲ့ ခရစ်ယာန် သမ္မာကျမ်းစာအုပ်ကြီးကို မျက်နှာလိုအားရ သွားလှူပါတယ်။ ဈေးဦးပေါက်အလှူကို ဈေးဦးပေါက် ငြင်းဆိုလိုက်ပါတယ်။ ‘အဟောင်း လက်မခံ’ တဲ့။ ဘာရမလဲ။ အသစ်မှ လက်ခံတယ်ဆိုရင်လည်း အသစ်လှူမှာပေါ့လို့ အားခဲပြီး အသစ် သွားလှူလိုက်ပါတယ်။ ‘နိုး’ တဲ့။ ကက်တလောက် ရေးပြီးသား မပါရင် လက်မခံဘူးတဲ့။ ကက်တလောက် ပါတယ်လေ ဆိုပြန်တော့ အမေရိကန်ကွန်ဂရက် လိုက်ဘရေရီက စာအုပ်အမှတ်စဉ်နံပါတ် ပါမှ လက်ခံမယ်တဲ့ ဗျား။ အဲဒါကလည်း ဗမာပြည်က ‘သန့်သော်ကောင်း’ ပို့ပေးတဲ့ စာအုပ်မှ လက်ခံမယ်တဲ့။ မှတ်ကရော။

‘သန့်သော်ကောင်း’ ဆိုတာက ဗမာပြည်က ရန်ကုန်တက္ကသိုလ်များဗဟိုစာကြည့်တိုက်မှူးကြီး ဦးသော်ကောင်း ရဲ့ သားပါ။ သူက နယူးယောက်မှာ မြန်မာစာကြည့်တိုက်(စာအုပ်စင်) ရတယ် ဆိုတဲ့သတင်း ကြားလျှင်ကြားချင်း အပြေးအလွှား လာရောက်ပြီး လိုအပ်တဲ့ ကက်တလောက်ပုံစံနဲ့ ကွန်ဂရက်လိုက်ဘရေရီ စာအုပ်စဉ်အမှတ် ရေးပြီးသား မြန်မာစာအုပ်သစ်တွေကို သူ ပို့ပေးမယ်လို့ တာဝန်ယူသွားသတဲ့။ စာကြည့်တိုက် ဖြစ်မြောက်ရေး၊ မြန်မာအဖွဲ့နဲ့တော့ တွေ့မသွားခဲ့ပါ။ ကျွန်တော်တို့အဖွဲ့အနေနဲ့လည်း ဘာမှ လုပ်ပိုင်ခွင့်လည်း မရှိ။ လုပ်စရာ အလုပ်လည်း မရှိတော့လို့ အဖွဲ့ရဲ့ အလိုအလျောက် ဖျက်သိမ်းလိုက်ရပါ တယ်။ ကျွန်တော် တခေါက် သွားကြည့်တော့ အာရှစာအုပ်ခန်းကြီးရဲ့ ပြတင်းပေါက်ဘောင်ပေါ်မှာ စာအုပ် တရာလောက် ဆံ့တဲ့ အိပ်ရာဘေး စာအုပ်စင်ငယ်လေးမျိုးနဲ့ စာအုပ် တရာလောက် စီထည့်ထားတာ တွေ့ရပါတယ်။ တင်မိုးနဲ့ မောင်စွမ်းရည်တို့ရဲ့ ကဗျာပေါင်းချုပ် စာအုပ်အသစ်စက်စက်တွေ မြင်ခဲ့ရပါတယ်။ နောက်တခေါက် မရောက်သေးပါ။ ဘာတွေ ထပ်ရောက်နေသလဲ သွားကြည့်ပါဦးမယ်။

ဒီနေ့ဘဲ Facebook ပေါ်မှာ ရဲဘော်သံခဲရဲ့ စာအုပ် မန္တလေး လူထုကြီးပွားရေးတိုက်က ရိုက်နေတယ် ဆိုတဲ့ သတင်းတက်လာပါတယ်။ (ဘဝထဲက ဝတ္ထု၊ ဝတ္ထုထဲက ဒိုင်ယာရီ) တဲ့။ သံခဲ တို့၊ သံဒုတ် တို့ဆိုတာ မန်းတက္ကသိုလ်က ကျွန်တော်တို့ရဲ့ ရဲဘော်သူငယ်ချင်း ကိုစိုးဝင်းမောင်ရဲ့ သားတွေပါ။ ကျောက်ဆည်မှာ အိမ်ထောင်ကျပါတယ်။ သူကလည်း ‘ဘုတလင်ရွှေစိုး’ ကလောင်အမည်နဲ့ တင်မိုး၊ မောင်စွမ်းရည်တို့နဲ့အတူ ကလောင်သွေးခဲ့သူပါ။ ခုတော့ ကွယ်လွန်ရှာပါပြီ။ သူတို့အဖေရဲ့ စာမူတွေတောင် ပြန်လည်စုစည်းပြီး စာအုပ်ထုတ်ပါလားလို့ ကျွန်တော် တိုက်တွန်းခဲ့ဖူးပါတယ်။ ကိုစိုးဝင်းမောင်က အလွန်အေးပါတယ်။ သူ့သားတွေကတော့ တောခိုကျောင်းသားတပ်မတော်က ခေါင်းဆောင်တွေပါ။ ရဲဘော်သံခဲနဲ့ ပန်းချီဝင်းဖေရယ်၊ ကဗျာဝင်းဖေ(မောင်စွမ်းရည်) ရယ် ဂျပန်ပြည်၊ တိုကျိုမြို့မှာ အတူသွား အတူလာ ဆုံခဲ့ကြဖူးပါတယ်။

ရဲဘော်သံခဲ စာအုပ်ထွက်မယ်ဆိုတော့ ကျွန်နတော်က ကိုယ့်တူ ကိုယ့်သား တယောက်ရဲ့ စာအုပ် ဆိုတော့ အထူးစိတ်ဝင်စားမိတယ်။ ဒါကြောင့် နယူးယောက် စာကြည့်တိုက်ကိုလည်း လှူပါ။ ငါ့ဆီကိုလည်း လူထုကျော်ရင်မြင့်ကတဆင့် ပို့ပေးပါလို့ သတင်းပို့လိုက်ပါတယ်။ စာကြည့်တိုက် လှူနည်းကိုလည်း လမ်းကြောင်းရှာရပါတယ်။ ရန်ကုန်တက္ကသိုလ်များ ဗဟိုစာကြည့်တိုက်မှူးကြီး ဦးသော်ကောင်း ဆိုတာကိုတော့ လူတိုင်း သိမှာမဟုတ်လား။ ခုတော့ အငြိမ်းစားယူပြီး ဝင်ဒါမီယာထဲမှာ နေတယ်။ သူ့သား (သန့်သော်ကောင်း) နာမည်နဲ့ မင်းတို့ စာအုပ်တွေ ပို့ထားလိုက်ပါ။ သူက စာကြည့်တိုက်အလိုကျ ကက်တလောက်ကြည့်ပြီး တဆင့်ပို့ပေးပါလိမ့်မယ် ဆိုပြီး နည်းပေးလိုက်ပါတယ်။

ကဲ… နယူးယောက် ‘ကွင်း လိုက်ဘရေရီ’ရဲ့ မြန်မာစာအုပ်စင်ကို စာအုပ်လှူလိုသူများအနေနဲ့ သန့်သော်ကောင်းက တဆင့်သာ စာအုပ်ပေးလှူကြပါ။ သန့်သော်ကောင်းကိုတော့ အကျိုးအကြောင်း ဘာမှ မပြောရသေးပါ။ သူက စင်ကာပူမှာ နေတယ်လို့ သတင်းကြားပါတယ်။ သူနဲ့ ကျွန်တော်တို့နဲ့ အဆက်အသွယ် မရှိပါ။ ဒါပေမဲ့ သူ့ဖခင် ဦးသော်ကောင်းနဲ့သာ ဆက်လိုက်ရင် လမ်းကြောင်းပွင့်သွားမှာပါ။

စပ်မိလို့ မိတ်ဆက်စကားထဲမှာ ဖြည့်ပြောပါရစေ။

ဦးသော်ကောင်း ဆိုတာ ကျွန်တော်တို့ရဲ့ လွတ်လပ်ရေးခေတ်ဦး (ပညာမင်းကြီး)တဦးပါ။

ဦးချို၊ ဦးကောင်း ဆိုတာ တကယ့်ပညာရှင်ကြီးတွေ၊ တကယ့်ပညာရေးသမားကြီးတွေပါ။

ဦးသော်ကောင်း တို့၊ သန့်သော်ကောင်း တို့က မင်းကြီးဦးကောင်းရဲ့ အတ္ထုပ္ပတ္တိ ပြုစုထုတ်ဝေဖို့ ကောင်းပါတယ်။ နှောင်းခေတ် တို့ဗမာတွေ လေးစားအားကျထိုက်တဲ့ ပုဂ္ဂိုလ်ကျော်ကြီးတွေပါ။

မြန်မာစာကြည့်တိုက်များ တိုးတက်ထွန်းကားပါစေ။

ဦးဝင်းဖေ
စာကြည့်တိုက်မှူး(ငြိမ်း)၊ အခြေခံပညာဦးစီးဌာန
ရန်ကုန်