လှကျော်ဇော - တရုတ်ပြည်ရဲ့ခရီးရှည်ချီတက်ပွဲသစ် (၈)
(မိုးမခ) ဇန်န၀ါရီ ၁၃၊ ၂၀၂၃
အ၀တ်ဗလာနဲ့အရာရှိမင်းများ (Naked Official)
၁။ ကျွန်တော်ကို ရဲဝတ်စုံပြည့်လေး ဝတ်ပေးပါ။ အမေ့ကို ကျွန်တော်က ရဲဝန်ထမ်းဖြစ်ပြီလို့ ပြောထားမိလို့ပါ ...
တရုတ်ရုပ်ရှင်ကားတကားထဲက ဇာတ်ဝင်ခန်းတခန်း။
တရုတ်ခရိုင်မြို့လေးတမြို့က လူဆိုးဂိုဏ်းတဂိုဏ်းကို ရဲတွေက၀င်ဖမ်းရာမှာ သတင်းအရင်ရထားတဲ့ လူဆိုးတွေက စပစ်ခတ်တော့ ရဲ (အလုပ်သင်လေး) ထိသွားပါတယ်။ ဒီတော့ အဲဒီကလေးက သူ့ဈာပနအတွက် သူ့ကိုရဲဝတ်စုံပြည့်လေးနဲ့ ကျင်းပပေးဖို့တောင်းဆိုသွားတာပါ။
တကယ်တော့ အဲဒီကလေးဟာ အဲဒီရဲဌာနမှာ အလုပ်သင်လုပ်နေရတာ (၃) နှစ်ရှိပါပြီ။ ပြီးတော့ သူက အာဇာနည်အိမ်ထောင်ကပါ။ ဖခင်ကအဲဒီရဲဌာနကပဲ ကျဆုံးသွားတာ။ ထုံးစံကအလုပ်သင် (၁) နှစ်ပြီးရင် အပြည့်ခန့်ပေးရတာပါ။ဒါပေမဲ့ အဲဒီကာလ (၁၉၉၀) များက ဒေသအတော်များများမှာ သြဇာကြီးနေသူများက ရင်းနှီးမြှုပ်နှံသူ (ငွေရှင်ကြေးရှင်) များပါ။ တရုတ်ပြည်ရဲ့ပေါ်လစီကိုက (အလုပ်အကိုင်တွေများများဖန်တီးနိုင်ဖို့) အရင်းအနှီးဆွဲဆောင်တဲ့ပေါ်လစီဖြစ်နေပါတယ်။ နိုင်ငံခြားက ငွေရှင်ကြေးရှင်များကလည်း ငွေထုပ်ပိုက်ပြီး ပြည်တွင်းကဆွေတွေမျိုးတွေ၊ အသိမိတ်ဆွေတွေရှာဖွေစပ်ဟပ်ပြီး ပါတီတွင်းက အာဏာရအသိုင်းအဝိုင်းကို ကပ်ကြပါတယ်။ အဲဒီမှာတင် ဒေသတွင်း ငွေရင်းနှီးမြှုပ်နှံသူလုပ်ငန်းရှင်ကြီးများနဲ့ အာဏာရပါတီခေါင်းဆောင်အသိုင်းအဝိုင်းများအကြား ကွန်ရက်ကြီးတခုဖြစ်လာပြီး ခရိုနီအရင်းရှင်ကြီးများနဲ့ အကျင့်ပျက်ဗျူရိုကရက်တချို့ (အတော်များပါတယ်) ဆိုတဲ့ အလွှာတရပ်ပေါ်လာပါတော့တယ်။ သူတို့ကဥပဒေကို မလိမ့်တပတ်ရော၊ ပြောင်ပြောင်တင်းတင်းရော၊ အမျိုးစုံချိုးဖောက်နေတာ။
ရဲဌာနများက နှစ်စဉ် ခွဲတမ်းအနေနဲ့ ရဲအပြည့်ခန့်အပ်ရမယ့် အရေအတွက် သတ်မှတ်ချက်ရှိပါတယ်။ အဲဒီခွဲတမ်းတွေကိုဒေသဆိုင်ရာအရာရှိမင်းများကျေးဇူးနဲ့ ခရိုနီကြီးများကအရင်သိပြီး သူတို့ တပည့်တပန်းဆွေမျိုးသားချင်းတွေကို ခန့်ခိုင်းပါတော့တယ်။ (ဒါမှ ရဲအတွင်းသတင်းတွေကို သူတို့ကရမှာလေ။) ဒီလိုနဲ့ အခုနရဲကလေး အလုပ်သင်အဖြစ်ကနေ မတက်နိုင်ဖြစ်နေတာပါ။ ရဲဌာနတခုလုံးကလူဟောင်းများကလည်း အထက်အမိန့်ကို မလွန်ဆန်နိုင်လို့သာ ကြည့်နေရတာ။ ဘယ်စိတ်ကောင်းနိုင်ကြပါ့မလဲ။ ဒါနဲ့ပဲ အဲဒီဝန်ထမ်းတွေက တယောက်နည်းနည်းစုစုပြီး အဲဒီကလေးကို လခဆိုပြီးပေးနေတာ။ သူ့အမေ (အာဇာနည် အိမ်ထောင်) ကိုလည်း သူ့သား ရဲအပြည့်ဖြစ်ပြီ လို့ထင်အောင်လေ။
၂။ အဲ့ခရိုင် မြို့တမြို့မှာပဲ ကျောင်းတကျောင်းပြင်ဆင်ဖို့ စားရိတ်အတော်များများ အစိုးရကချပေးခဲ့ပါတယ်။ ကျောင်းအုပ်ဆရာကြီးက သူ့ညီကို ကန်ထရိုက်ပေးလိုက်ပါတယ်။ အစိုးရက တင်ဒါခေါ်ဖို့၊ ဘာညာစည်းကမ်းတွေတော့ ရှိပါတယ်။ ဘယ်သူမှမလိုက်နာပါဘူး။ ဒီတော့ ဆရာတယောက်က အဲဒီကန်ထရိုက် မဟုတ်တရုတ်လုပ်တာတွေတွေ့တော့ ကျောင်းအုပ်ကြီးလည်းတိုင်၊ ပညာရေး ဌာနလည်းတိုင် စတာတွေလုပ်ပါတော့တယ်။ အဲဒီဆရာပဲ စုပ်စမြှုပ်စ ပျောက်ဆုံးသွားပါတယ်။ ဒီတော့ သူ့မိသားစုက ရဲဌာနလူပျောက်တိုင် ဟိုစာရေးတိုင်၊ ဒီစာရေးတိုင် (ဗဟိုအထိ) လုပ်ပါတယ်။ ဘာသတင်းမှမရပါဘူး။ အနှစ် (၂၀) ကျော်ပါတယ်။ အဲဒီကျောင်းအုပ်ကြီးလည်းပင်စင်ယူ၊ ကန်ထရိုက်လည်း ချမ်းသာသထက်ချမ်းသာလာနေတာပါ။ ကျောင်းဆရာရဲ့သမီးက နည်းနည်းမှစိတ်အားမလျှော့ဘဲ၊ နည်းပေါင်းစုံနဲ့ လိုက်စုံစမ်းနေတာပါ။ ဒါကိုကြားတော့ ကန်ထရိုက်က "ဘယ်လိုလိုက်လိုက် ဘယ်တော့မှမပေါ်ဘူး" ဆိုတဲ့ စကားကို မူးမူးရူးရူးနဲ့ ပြောမိပါတယ်။ (ဒီမှာတင် သဲလွန်စရတာပါ) အဲဒီကာလ (၂၀၁၀ ကျော်) နိုင်ငံရေးလေထု တစုံတရာပြောင်းနေပါပြီ။ တချို့ရဲတွေက (အတော်များများ) ပျက်ကြပေမယ့် ကောင်းတဲ့ရဲတွေကလည်း ရှိသင့်သလောက်ရှိနေပါတယ်။ သူတို့အတွက် လုပ်နိုင်ကိုင်နိုင်အခြေ အနေလေးရှိလာနေပါတယ်။ ဒီတော့ရဲဌာနကိုအသစ်ပြောင်းလာတဲ့ ရဲမှူးကို ဆရာ့သမီးက အခြေအနေတွေပြောပြပြီး တိုင်တန်းပါတော့တယ်။ ဒီတင် ကျောင်းပြင်ဆင်စဉ်က အသစ်ခင်းခဲ့တယ်ဆိုတဲ့ ဘောလီဘောကွင်းကို အကုန်ပြန်တူးဖော်ကြည့်တဲ့အခါ အဲဒီဆရာရဲ့ အရိုးစုကို ပြန်ရှာတွေ့ပါတော့တယ်။ ပင်စင်စားနေပြီဖြစ်တဲ့ကျောင်းအုပ်ဆရာကြီး (အသက် ၇၀ ကျော်) ရော၊ အဲဒီကာလပညာရေးဌာနကလူတွေရော၊ ရဲဝန်ထမ်းတွေရော ထောင်ထဲတန်းစီဝင်သွားရပါတော့တယ်။ ကန်ထရိုက်ကတော့ (၂) နှစ်ဆိုင်းငံ့ သေဒဏ်ကျသွားပါတော့တယ်။
ဒါတွေဟာ တကယ့်အဖြစ်အပျက်တွေပါ။
၁၉၉၀ ကျော်ကာလများမှာ ဒီလိုအဖြစ်အပျက်တွေ မနည်းမနောပါ။ အဲဒီကာလမှာ ဒေသတွင်းဖွံ့ဖြိုးတိုးတက်ရေးကိုသာ အဓိကထားတော့ ယိုပေါက်ဟာပေါက်တွေအများကြီးပါ။ ငွေရှင်ကြေးရှင်များကလည်း အစိုးရ၀န်ထမ်းတွေကို ဘက်ပေါင်းစုံကဖျက်ဆီးတာပါ။တကယ်တော့ အမေရိကန်အပါအ၀င် အနောက်အရင်းရှင်းနိုင်ငံကြီးများက တရုတ်ပြည်ကို သူတို့နိုင်ငံများက အရင်းအနှီးမြှုပ်နှံရာမှာပဲဖြစ်ဖြစ်၊ တခြားသူတို့အဖွဲ့အစည်းများ (ဥပမာ - ကမ္ဘာကုန်သွယ်ရေးအဖွဲ့ W.T.O.) ထဲဝင်ခွင့်ပြုတာပဲဖြစ်ဖြစ်၊ သူတို့ရည်ရွယ်ချက်က တရုတ်ပြည်ကြီး အရင်းရှင်နိုင်ငံအဖြစ် ပြောင်းလဲသွားရေးပါ။ ဒါကြောင့်ပဲ အစိုးရထဲကပါတီထဲက အရာရှိကြီးများကို ဘက်ပေါင်းစုံကဖျက်ဆီးပစ်ကြပါတယ်။ ဒါကလည်း ကိုယ်တင်ပါလို့ဖြစ်ရတာ။ ကြံ့ကြံ့ခံနိုင်သူများလည်းရှိပါတယ်။
ဒီမှာတင် နိုင်ငံရေးဝေါဟာရ စကားလုံးအသစ်တလုံးပေါ်ထွက်လာပါတယ်။ အဲဒါကတော့ အ၀တ်ဗလာနဲ့အရာရှိမင်းများ (Naked officials) တဲ့။ ဇနီးနဲ့သားသမီးအားလုံး နိုင်ငံခြားပို့ထားတဲ့ ခရိုင်အဆင့်နဲ့အထက် အစိုးရအရာရှိကြီးများကို ပေးထားတဲ့အမည်ပါ။ အစပိုင်းကတော့သားသမီးများကိုနိုင်ငံခြားကျောင်းများမှာ ကျောင်းအိပ်ကျောင်းစားထားကြတာ၊ ကလေးများကိုစိတ်မချလို့ဆိုပြီး မိခင်တွေကနောက်ကလိုက်ကြ၊ အိမ်တွေဝယ်ကြ၊ စီးပွားရေးတွေလုပ်ကြ၊ နိုင်ငံခြားသားခံယူကြနဲ့၊ ဇယားတွေရှုပ်လာကြပါတယ်။ တကယ်တော့ နိုင်ငံခြားကုမွဏီများအနေနဲ့ ပြည်တွင်းက အရာရှိမင်းများကိုလာဘ်ထိုးဖို့ အဆင်ချောရေးအတွက် တဖက်လှည့်လုပ်ဆောင်ချက်များပါ။အဲသလို တမိသားစုလုံးနိုင်ငံခြားရောက်နေတဲ့ (တရုတ်ပြည်မှာကျန်ရစ်တဲ့) အရာရှိမင်းများမှာ ပျှမ်းမျှအားဖြင့် မှတ်ပုံတင် (အစစ်) ၃-၄ ခုနဲ့ ဗီဇာလည်းအဆင်သင့်လုပ်ပြီးသား ရှိတတ်တယ်။ (အချိန်မရွေး နိုင်ငံခြားထွက်ပြေးဖို့ပြင်ဆင်ထားတာ။)
လွန်ခဲ့တဲ့နှစ်အချို့ ဒီစကားလုံးခေတ်စားလာပြီး အဲသလို အ၀တ်ဗလာနဲ့ အရာရှိမင်းများအတွက်ဆိုပြီး ထူးဆန်းတဲ့ဥပဒေတရပ်ထွက်လာပါတယ်။
၁။ အစိုးရအရာရှိများအနေနဲ့ နိုင်ငံခြားရောက်နေတဲ့ မိသားစုဝင်များကိုပြန်ခေါ်ရမယ်။
၂။ ပြန်ခေါ်မရရင် အငြိမ်းစားယူဖို့အချိန်နီးသူများ စောပြီးအငြိမ်းစားယူရမယ်။
၃။ အငြိမ်းစားမယူနိုင်ဘူးဆိုရင် ရာထူးလုံးဝမတက်စေရ။ အရေးပါ့တဲ့ဌာနမှာလည်း မနေရ ... တဲ့။
ဒီထက် ပိုထူးဆန်းတာကတော့ ....
သမ္မတရှီကျင်းပင်က အစည်းအဝေးတခုမှာပြောသွားတဲ့ စကားပါ။
"ကျွန်တော်က ဒီအ၀တ်ဗလာနဲ့အရာရှိမင်းများနဲ့ ပတ်သက်တဲ့ ဥပဒေထွက်လာဖို့ ကြိုးစားခဲ့တာ အနှစ် (၂၀) ရှိပါပြီ ... တဲ့။
လှကျော်ဇော
၁၁-၁-၂၀၂၃။
-
Join Us @ MoeMaKa Telegramt.me@moemaka
#MoeMaKaMedia
#WhatsHappeningInMyanmar
Posts
